Udupi Diocese News

ಉಡುಪಿ ದಿಯೆಸೆಜಿಚಾ ಉತ್ತರಾಚಾ ಕುಶಿನ್ ಅಖ್ರೇಕ್ ಅಸ್ಚ್ಯಾ ಬೈಂದೂರಾಂತ್, ಕರಾವಳ್ ತಡಿಚಾ ಬಗ್ಲೆರ್, ಅಗಾಧ್ ಪ್ರಕೃತಿ ಸೊಭಾಯೆನ್ ನೆಟೊನ್ ಆಸ್ಚ್ಯಾ ಸುಂದರ್ ಪರಿಸರಾಂತ್ ಚಾರಿತ್ರಿಕ್ ಖುರ್ಸಾ ಗುಡ್ಯಾಚಾ ಪಾಂಯಾ ಥಳಾ ಭಾಗೆವಂತ್ ಸಾಂತ್ ಖುರ್ಸಾಚಿ ಫಿರ್ಗಜ್ ರಾಜ್ ಕರುನ್ ಆಸಾ. ಮಂಗ್ಳುರ್ ಶ್ಹೆರಾ ಥಾವ್ನ್ ಸುಮಾರ್ 130 ಕಿ.ಮಿ. ಪಯ್ಣ್ ಆಸೊನ್, ಉಡುಪಿ, ಕುಂದಾಪುರ್ ಉತ್ರೊನ್ ರಾಷ್ಟೀಯ್ ರಸ್ತೊ 66 ಜಾತೆಚ್ ದೇಡ್ ಕಿ.ಮಿ. ಭಿತರ್ ಅಸ್ತಮ್ತೆಕ್ ಫಿರ್ಗಜೆಕ್ ವೆಚಿ ವಾಟ್ ಜಾವ್ನಾಸಾ, ಸುಮಾರ್ 15-20 ಕಿಲೋ ಮೀಟರ್ ಅಂತರಾರ್ ತ್ರಾಸಿ, ಗಂಗೊಳ್ಳಿ ಆನಿ ಪಡುಕೋಣೆ ಫಿರ್ಗಜ್ ಆನಿ ಕಾರ್ವಾರ್ ದಿಯೆಸೆಜಿಚೆ ಭಟ್ಕಳ್ ಫಿರ್ಗಜ್ ಲಾಗ್ಶಿಲಿಂ ಫಿರ್ಗಜ್ ಜಾವ್ನಾಸಾತ್, ಉಡುಪಿ ಆನಿ ಕಾರ್ವಾರ್ ದಿಯೆಸೆಜಿಂ ಮಧೆಂ ಬೈಂದೂರ್ ಫಿರ್ಗಜ್ ಗಾಂಚ್ ಜಾವ್ನಾಸಾ.

ಬೈಂದೂರ್ ಫಿರ್ಗಜೆಕ್ ಗಂಗೊಳ್ಳಿ ಫಿರ್ಗಜ್ ಮಾಂಯ್ ಫಿರ್ಗಜ್ ಜಾವ್ನಾಸಾ. ಪುರಾತನ್ ಕಾಳಾಚಾ ಚರಿತ್ರೆಚಾ ಥೊಡ್ಯಾ ದಾಖ್ಲ್ಯಾಂ ಪ್ರಕಾರ್ ಟಿಪ್ಪು ಸುಲ್ತಾನಾಚಾ ರಾಜ್ಯ್ ಕಾರ್ಬಾರಾಂತ್ ಕೆನಾರಾ ಕ್ರಿಸ್ತಾವಾಂಚಾ ಬಂದಡೆ ಪಯ್ಲೆಂಚ್ ಹಾಂಗಾಸರ್ ಇಗರ್ಜ್ ಆಸ್ ಲ್ಲಿ, ಹಿಂ ಇಗರ್ಜ್ 1783 ಇಸ್ವೆಂತ್ ನಿರ್ಮಾಣ್ ಜಾಲ್ಲಿಂ, ಟಿಪ್ಪು ಸುಲ್ತಾನಾ ಥಾವ್ನ್ ಹಿ ಇಗರ್ಜ್ ನಿರ್ನಾಮ್ ಜಾಲಿಂ ಮ್ಹಣ್ ಕಳೊನ್ ಯೆತಾ.

ಚರಿತ್ರೆಚಾ ಪಾನಾಂನಿ ವಾಚುಂಕ್ ಮೆಳ್ಚ್ಯಾ ಪ್ರಕಾರ್, 150 ವರ್ಸಾಂ ಆದಿಂ ದರ್ಯಾ ಪಯ್ಣಾ ದ್ವಾರಿಂ ವ್ಯಾಪಾರ್-ವಹಿವಾಟ್ ಚಲಂವ್ಚ್ಯಾ ಗೊಂಯ್ಕಾರ್ ಕ್ರಿಸ್ತಾಂವಾಂನಿ ಖುರ್ಸಾ ಗುಡ್ಯಾರ್ ರುಕಾಚೊ ಖುರಿಸ್ ಉಬಾರುನ್ ಖುರ್ಸಾ ಗುಡ್ಯಾಚ್ಯಾ ಪಾಯಾಂಥಳಿಂ ವಸ್ತಿ ಕರುಂಕ್ ಸುರು ಕೆಲೆಂ ಮ್ಹಣ್ ಕಳೊನ್ ಯೆತಾ ತರ್, ಆನ್ಯೇಕಾ ರೀತಿನ್ ಥೊಡ್ಯಾ ಜಾಣಾರಿ ಮಾಲ್ಘಡ್ಯಾಂಚಾ ತೊಂಡಾಂನಿ ಆಯ್ಕೊಂಕ್ ಮೆಳ್ಚ್ಯಾ ಪ್ರಕಾರ್, ಕ್ರಿಸ್ತಾಂವಾಂ ವಿರೋಧ್ ಟಿಪ್ಪುಸುಲ್ತಾನಾಚಿ ಕಾಟ್ಕಾಯ್ ಆನಿ ಇಜಾ ಸೊಸುಂಕ್ ಜಾಯ್ನಾಸ್ತಾನಾಂ ಕ್ರಿಸ್ತಾಂವ್ ಲೋಕ್ ಮೈಸೂರ್, ಮಂಗ್ಳುರ್, ಉಡುಪಿ, ಶಿವಮೊಗ್ಗ ಆನಿ ಕಾರ್ ವಾರ್ ಇತ್ಯಾದಿ ಜಾಗ್ಯಾ ಥಾವ್ನ್ ಪೋಳ್ನ್ ಆಯಿಲ್ಲೆ ಕ್ರಿಸ್ತಾಂವ್ ಆರಂಭಾರ್ ಕುಂದಾಪುರ್, ಗಂಗೊಳ್ಳಿ ಫಿರ್ಗಜೆಚಾ ವಠಾರಾಂತ್ ವಸ್ತಿ ಕರುಂಕ್ ಲಾಗ್ಲೆ, ಉಪ್ರಾಂತ್ ಬೈಂದೂರ್ ಖುರ್ಸಾ ಗುಡ್ಯಾಚಾ ಭೊಂವಾರಿ ಜಿಯೆಲೆ ಮ್ಹಳ್ಳೊ ವಿಷಯ್ ಆಯ್ಕೊಂಕ್ ಮೆಳ್ತಾ.

ತಾಚಾ ಉಪ್ರಾಂತ್ 1850 ಇಸ್ವೆಂತ್ ಹಾಂಗಾಸರ್ ಏಕ್ ಮಿಸಾಂವ್ ಠಾಣೊ ಪ್ರಾರಂಭ್ ಜಾಲೊ, 1894 ಇಸ್ವೆಂತ್ ಹೊ ಮಿಸಾಂವ್ ಠಾಣೊ ಏಕ್ ಇಗರ್ಜ್ ಜಾವ್ನ್ ವಿಸ್ತರಣ್ ಜಾಲೊ ಆಸ್ತಾಂ, ಗಂಗೊಳ್ಳಿ ಫಿರ್ಗಜೆಚಾ ತಾಬೆಂತ್ ಇಗರ್ಜೆಚಿ ಜವಾಬ್ದಾರಿ ಆನಿ ಸೆವಾ ಆಸ್‍ಲ್ಲಿ.

1909 ಇಸ್ವೆಂತ್ ಗಂಗೊಳ್ಳಿ ಫಿರ್ಗಜೆಂತ್ ವಿಗಾರ್ ಜಾವ್ನಾಸ್ಲಲೊ ಆನಿ ಸಾಂಗಾತಾ ಬೈಂದೂರ್ ಇಗರ್ಜೆಚಿ ಜವಾಬ್ದಾರಿ ಪಳೆಂವ್ಚೊ ಮಾ| ಬಾ| ಸೌರೆಜ್ ಹಾಣಿಂ ಕ್ರೀಸ್ತಾಂವ್ ಭುರ್ಗ್ಯಾಂ ಖಾತಿರ್ ಇಗರ್ಜೆಚಾ ವಠಾರಾಂತ್ ‘ಹೊಲಿ ಕ್ರೊಸ್ ಎಲಿಮೆಂಟರಿ ಇಸ್ಕೊಲ್' ಆರಂಭ್ ಕೆಲೆಂ.

1912 ಇಸ್ವೆಂತ್ ಬಾ| ಕಜೇತನ್ ಸುವಾರಿಸ್ ಪಯ್ಲೊ ಖಾಯಂ ಆಡಳಿತ್ ವಿಗಾರ್ ಜಾವ್ನ್ ನೇಮಕ್ ಜಾಲೊ. ಅನಿವಾರ್ಯ್ ಕಾರಣಾನ್ ವಿಗಾರಾಚಿ ಸೆವಾ ಚಡ್ ಕಾಳ್ ಲಾಭ್ಲಿನಾ, ಪಯ್ಲೆಂಚೆ ಪರಿಂ ಗಂಗೊಳ್ಳಿ ಫಿರ್ಗಜೆಚಾ ತಾಬೆಂತ್ ತಾತ್ಕಾಲಿಕ್ ಸೆವಾ ಪುನಾರವರ್ತಿತ್ ಜಾಲಿ. 1915 ಇಸ್ವೆಂತ್ ಬಾ| ಎ.ಇ. ಕುವೆಲ್ಲೊ ಆಡಳಿತ್ ವಿಗಾರ್ ಜಾವ್ನ್ ಆಯ್ಲೆಂ ಆಸ್ತಾ, ಹಾಂಗಾಸರ್ ಯೀ ವಿಗಾರಾಚಿ ಸೆವಾ ಚಡ್ ಕಾಳ್ ಲಾಭ್ಲಿನಾ, ಪರ್ತ್ಯಾನ್ ಗಂಗೊಳ್ಳಿ ಫಿರ್ಗಜೆಚಾ ತಾಬೆಂತ್ 1925 ಮ್ಹಣಾಸರ್ ಸೆವಾ ಮುಂದರುನ್ ಗೆಲಿ.

ಮಾರ್ಚ್ 11, 1928 ವೆರ್ ತವಳ್ಚೆ ಮಂಗ್ಳುರ್ಚೆ ಬಿಸ್ಪ್ ಬೋವ್ ಮಾನಾಧಿಕ್ ಬಾ| ವಲೇರಿಯನ್ ಜೆ. ಡಿ'ಸೋಜಾನ್ ಗಂಗೊಳ್ಳಿ ಸ್ವತಂತ್ರ್ ಫಿರ್ಗಜ್ ಮ್ಹಣ್ ಪರಿವರ್ತಿತ್ ಕರುನ್ ಅಧಿಕೃತ್ ಘೋಷಣ್ ಕೆಲೆಂ. ಗಂಗೊಳ್ಳಿ ಫಿರ್ಗಜೆಕ್ ವರ್ತ್ಯಾ ಮ್ಹಿನತೆನ್ ಸೆವಾ ದಿಲ್ಲೊ ಬಾ| ಆಲೆಕ್ಸ್ ಪಿ. ಡಿ'ಸೋಜಾ ಬೈಂದೂರ್ ಫಿರ್ಗಜೆಕ್ ಪಯ್ಲೊ ಅಧಿಕೃತ್ ಫಿರ್ಗಜ್ ವಿಗಾರ್ ಜಾವ್ನ್ ನೇಮಕ್ ಜಾಲೊ.

ನವೆಂಬರ್ 10, 1929 ವೆರ್ ಬಾ| ಚಾರ್ಲ್ಸ್ ಸಲ್ಡಾನ್ಹಾ ಹಾಣಿ ಇಗರ್ಜೆಕ್ ಗರ್ಜ್ ಆಸ್ ಲ್ಲಿ ಘಾಂಟಿಚಿ ತೋರ್ ಉಬಾರ್ಲಿ.
ಮಾ| ಬಾ| ಲಿಯೋ ಪಿ. ಡಿ'ಸೋಜಾ ಹಾಣಿಂ ಮೇ 1, 1936 ವೆರ್ ಲೂರ್ದ್ ಸಾಯ್ಭಿಣಿಚೊ ಗ್ರೊಟ್ಟೊ ಪ್ರತಿಷ್ಟಾಪನ್ ಕೆಲೊ.
1954 ಇಸ್ವೆಂತ್ ಬಾ| ಪಿ.ಪಿ. ಡಿ’ಸೋಜಾನ್ ಇಗರ್ಜೆಚೆಂ ಬಾಂದಾಪ್ ವಿಸ್ತರಣ್ ಕರ್ನ್ ದೆವಾಳಾಚಾ ಮುಖ್ಲ್ಯಾ ಬಾಂದ್ಪಾಚೊ ಮಂಟಪ್ ಸಜವ್ನ್ ನವೀಕರಣ್ ಕೆಲೆಂ, ಸಾಂಗಾತಾ ನವೆಂ ಘಾಂಟಿಚಿ ತೋರ್ ಉಬಾರ್ಲಿ.

ಮೇ 3, 1985 ವೆರ್ ಬಾ| ಮ್ಯಾಕ್ಸಿಮ್ ಫುರ್ಟಾದೊ ಹಾಣಿಂ ಚಾರಿತ್ರಿಕ್ ಖುರ್ಸಾ ಗುಡ್ಯಾರ್ ಶಾಶ್ವಿತ್ ಉಗ್ಡಾಸಾಚೆ ಸ್ಮಾರಕ್ ಬಾಂದಾಪ್ ಜಾವ್ನ್ ಕೊಪೆಲ್ ಉಬಾರ್ಲೆಂ. ಸಾಂಗಾತಾ ಜನೆರ್ 13, 1984 ವೆರ್ ಇಗರ್ಜೆ ಇಸ್ಕೊಲಾಕ್ ನವ್ಯಾ ಇಸ್ಕೊಲಾಚೆಂ ಬಾಂದಾಪ್ ಸಂಪಯ್ಲೆಂ.

ಮೇ 27, 1984 ವೆರ್ ಫಾತಿಮಾ ಮೆಳಾಚಾ ಧರ್ಮ್ ಭಯ್ಣಿಂಚೆ ಹೊಲಿ ಕ್ರೊಸ್ ಕೊವೆಂತ್ ಉಗ್ತಾವಣ್ ಜಾವ್ನ್ ಇಗರ್ಜೆಕ್ ಧರ್ಮ್ ಭಯ್ಣಿಂಚಿ ಸೆವಾ ಆರಂಭ್ ಜಾಲಿ.

ಏಪ್ರಿಲ್ 10, 1991 ವೆರ್ ಬಾ| ಫರ್ಡಿನಾಂಡ್ ಗೊನ್ಸಾಲ್ವಿಸ್ ಹಾಣಿಂ ಇಗರ್ಜೆಕ್ ನವ್ಯಾ ಹೊಲಾಚೆ ಬಾಂದಾಪ್ ಬಾಂದ್ಲೆಂ.

1998 ಇಸ್ವೆಂತ್ ಬಾ| ಆಂಡ್ರ್ಯು ನಜ್ರೆತ್ ಹಾಣಿಂ ಪ್ರಸ್ತುತ್ ಆಸ್‍ಲ್ಲಿ ನವಿ ಇಗರ್ಜ್ ಬಾಂದುನ್ ಅರ್ಪಣ್ ಕೆಲಿ, ಹ್ಯಾ ನವ್ಯಾ ಇಗರ್ಜೆಚೆಂ ಆಶೀರ್ವಚನ್ ಆನಿ ಉಗ್ತಾವಣ್ ತವಳ್ಚೊ ಮಂಗ್ಳುರ್ ದಿಯೆಸೆಜಿಚೊ ಬಿಸ್ಪ್ ಅ| ಮಾ| ಅಲೋಶಿಯಸ್ ಪಾವ್ಲ್ ಡಿ'ಸೋಜಾನ್ ಮೇ 28, 1998 ವೆರ್ ಕೆಲೆಂ.

ಬಾ| ಥೋಮಸ್ ಡಿ'ಸೋಜಾ ಹಾಣಿಂ ಖುರ್ಸಾ ಗುಡ್ಯಾಕ್ ವೆಚಿ ವಾಟ್ ಇಸ್ಕೊಳ್ ಕರುನ್ ಪೂನ್ ಶೆತಾಕ್ ಯೆಂವ್ಚ್ಯಾ ಯಾತ್ರಿಕಾಂಕ್ ಖುರ್ಸಾ ವಾಟೆಚೆಂ ಭಕ್ತಿಪಣ್ ಆಧಾರುಂಕ್ ಇಗರ್ಜೆ ಥಾವ್ನ್ ವಯ್ರ್ ಖುರ್ಸಾ ಗುಡ್ಯಾ ಪರ್ಯಾಂತ್ ಸ್ತೆಸಾಂವಾಂ ಬಾಂದ್ಲಿಂ.

2006-2013 ಪರ್ಯಾಂತ್ ಬಾ| ಫ್ರಾನ್ಸಿಸ್ ಕರ್ನೆಲಿಯೊ ವಿಗಾರ್ ಜಾವ್ನಾಸೊನ್ ಫಿರ್ಗಜೆಕ್ ಗರ್ಜೆಚಿ ಯೋಜನಾ ಜಾವ್ನಾಸ್ ಲ್ಲಿಂ ಗರ್ಜೆವಂತ್ ಭುರ್ಗ್ಯಾಂಕ್ ಶಿಕ್ಪಾ ನಿಧಿ (Needy Children Education Fund) ಆನಿ ಇಗರ್ಜೆಕ್ ರುಕಾಡಾಚೆ ಬಾಂಕ್ ಕರುನ್ ಬಸ್ಕಾಚಿ ವಿಲೆವಾರಿ ಕೆಲಿ, ಸಾಂಗಾತಾ ಫಿರ್ಗಜ್ ಜಿವಾಳ್ ಆನಿ ಕಾರ್ಯಾಳ್ ದವ್ರುನ್ ಲೊಕಾ ಮೊಗಾಳ್ ಜಾವ್ನ್ ಫಿರ್ಗಜೆಕ್ ವರ್ತಿ ಸೆವಾ ದಿಲಿ.

2013-2019 ಪರ್ಯಾಂತ್ ಬಾ| ರೊನಾಲ್ಡ್ ಮಿರಾಂದ ವಿಗಾರ್ ಜಾವ್ನಾಸೊನ್ ಪವಿತ್ರ್ ಖುರ್ಸಾ ಗುಡ್ಯಾರ್ ಪರ್ನೆಂ ಕೊಪೆಲ್ ಮೊಡುನ್ ಸಪ್ತೆಂಬರ್ 14, 2014 ವೆರ್ ನವ್ಯಾ ಕೊಪೆಲಾಚೆಂ ಉಗ್ತಾವಣ್ ಕೆಲೆಂ. 2017 ಇಸ್ವೆಂತ್ ಇಗರ್ಜೆಕ್ ನವ್ಯಾ ಹೊಲಾಚೆ ಯೋಜನ್ ಮಾಂಡುನ್ ಹಾಡುನ್ ಹೋಲಿ ಕ್ರೊಸ್ ಸಮುದಾಯ್ ಭವನ್ ದಸೆಂಬರ್ 9, 2018 ವೆರ್ ಉಗ್ತಾವಣ್ ಕೆಲೆಂ.

ಪ್ರಸ್ತುತ್ ಆತಾಂ ಬಾ| ವಿನ್ಸೆಂಟ್ ಕುವೆಲ್ಲೊ ವಿಗಾರ್ ಜಾವ್ನ್ ಸೆವಾ ದೀವ್ನ್ ಆಸಾತ್.

(Courtesy : byndoorchizalak.com)