Mangalore Diocese News

By Wilson Pinto

Taccode - Moodbidri, July 15 : Women's Association & Catholic Sabha units of Holy Cross Church , Taccode organised Monsoon Food Fest on 13th July 2025 in the parish hall.

ತಾಕೊಡೆ ಫಿರ್ಗಜಿಂತ್ "ಭುರ್ಗ್ಯಾಂ ಸವೆಂ ಪಾವ್ಶಿಲಿಂ ಖಾಣಾಂ-ಪಾಕ್ವಾನಾಂ" ಕಾರ್ಯೆಂ

ಸ್ತ್ರೀ ಸಂಘಟನ್ ಆನಿ ಕಥೊಲಿಕ್ ಸಭಾ ಹಾಂಚಾ ಜೋಡ್ ಆಶ್ರಯಖಾಲ್ ಭಾಗೆವಂತ್ ಖುರ್ಸಾಚಿ ಫಿರ್ಗಜ್ ತಾಕೊಡೆಚ್ಯಾ ಸಭಾ ಸಲಾಂತ್ ತಾರಿಕ್ 13-07-2025 ವೆರ್ ಆಯ್ತಾರಾ ದೀಸ್ ಸಕಾಳಿಂ 10:30 ವೊರಾಂಚೆರ್ "ಭುರ್ಗ್ಯಾಂ ಸವೆಂ ಪಾವ್ಶಿಲಿಂ ಖಾಣಾಂ-ಪಾಕ್ವಾನಾಂ" ಮ್ಹಳ್ಳೆಂ ಅಪೂರ್ಬಾಯೆಚೆಂ ಕಾರ್ಯೆಂ ಮಾಂಡುನ್ ಹಾಡ್ಲೆಂ. ಕಾಫಿ-ಫಳ್ಹಾರ್ ಜಾಲ್ಲೆಂಚ್ ಸ್ತ್ರೀಯಾಂಚ್ಯಾ ಪ್ರಾರ್ಥನ್ ಗಿತಾಂ ದ್ವಾರಿಂ ವೆದಿ ಕಾರ್ಯೆಂ ಸುರ್ವಾತ್ಲೆಂ. ಅಧ್ಯಕ್ಷ್ ಸ್ಥಾನ್ ಘೆವ್ನ್ ಫಿರ್ಗಜ್ ವಿಗಾರ್ ಮಾ|ಬಾ| ರೋಹನ್ ಲೋಬೊ, ಸಂಪನ್ಮೂಲ್ ವ್ಯಕ್ತಿ ಶ್ರೀ ರಾಜೇಶ್ ಡಿಸೋಜ, ಪ್ರಾಧ್ಯಾಪಕ್ ಆಳ್ವಾಸ್ ಪಿ.ಯು ಕಾಲೇಜ್ ಮೂಡುಬಿದ್ರಿ, ಆಯೋಗ್ ಸಂಯೋಜಕ್ ಮಾನೆಸ್ತ್ ಪಾವ್ಲ್ ಡಿಸೋಜ, ಬೆಥೆನಿಕೊವೆಂತಾಚಿ ವ್ಹಡಿಲ್ನ್ ಸಿಸ್ಟರ್ ರೀನಾ, ಬ್ರದರ್ ಜೋನ್ಸನ್ ಕ್ರಾಸ್ತಾ, ಸ್ತ್ರೀ ಸಂಘಟನೆಚಿ ಅಧ್ಯಕ್ಷಿಣ್ ಐವಿ ಕ್ರಾಸ್ತಾ ಆನಿ ಕಾರ್ಯದರ್ಶಿ ಶಾಂತಿ ಪಿಂಟೊ, ಕಥೊಲಿಕ್ ಸಭೆಚಿ ಅಧ್ಯಕ್ಷಿಣ್ ಶೆರಿ ನಜ್ರೆತ್ ವೆದಿರ್ ಹಾಜರ್ ಆಸ್‍ಲ್ಲಿಂ.

ಸ್ತ್ರೀ ಸಂಘಟನಾಚಿ ಅಧ್ಯಕ್ಷಿಣ್ ಐವಿ ಕ್ರಾಸ್ತಾನ್ ವೆದಿರ್ ಆಸ್‍ಲ್ಲ್ಯಾ ಸರ್ವ್ ಮಾನಾಚ್ಯಾ ಸಯ್ರ್ಯಾಂಕ್ ಆನಿ ಜಮ್ಲೆಲ್ಲ್ಯಾ ಸಮೇಸ್ತಾಂಕ್ ಸ್ವಾಗತಾಚಿ ಉತ್ರಾಂ ಉಲೈಲಿ. ಕಾರ್ಯದರ್ಶಿ ಶಾಂತಿ ಪಿಂಟೊನ್ ವೆದಿರ್ ಆಸ್‍ಲ್ಲ್ಯಾ ಮಾನಾಚ್ಯಾ ಸಯ್ರ್ಯಾಂಕ್ ಗುಲೊಬ್ ದೀವ್ನ್ ಸ್ವಾಗತ್ ಕೆಲೊ. ಅಧ್ಯಕ್ಷ್ ಸ್ಥಾನ್ ಘೆತ್‍ಲ್ಲ್ಯಾ ವಿಗಾರ್ ಬಾಪಾನಿಂ ಪಾವ್ಶಿಲ್ಯಾ ಖಾಣಾ ಪಾಯ್ಕಿ ಏಕ್ ಜಾವ್ನಾಸ್‍ಲ್ಲೆಂ "ಪೊನ್ಸಾಚಿ ಪಾತೊಳಿ ಉಗ್ತಿ ಕರ್ನ್ ಕಾತರ್ಚ್ಯಾ ಮುಖಾಂತ್ರ್ ಕಾರ್ಯಾಚೆಂ ಉಗ್ತಾವಣ್ ಕೆಲೆಂ. ಸರ್ವ್ ಭುರ್ಗ್ಯಾಂ ತರ್ಫೆನ್ ಏಕ್ ಭುರ್ಗೊ ತಶೆಂಚ್ ವೆದಿರ್ ಆಸ್‍ಲ್ಲ್ಯಾ ಸರ್ವಾನಿಂ ಉದ್ಘಾಟನ್ ಕಾರ್ಯಾಕ್ ಸಾಂಗಾತ್ ದಿಲೊ.

ಫಿರ್ಗಜ್ ಆಯೋಗ್ ಸಂಯೋಜಕ್ ಮಾನೆಸ್ತ್ ಪಾವ್ಲ್ ಡಿಸೋಜ ಹಾಣಿಂ ಕಾರ್ಯಾಕ್ ಉದ್ದೇಶಿಸುನ್ ದೋನ್ ಉತ್ರಾಂ ಉಲೈಲೆ.ಪಾವ್ಶಿಲಿಂ ಖಾಣಾಂ-ಪಾಕ್ವಾನಾಂ ವ್ಹಡಿಲಾಂ ಸವೆಂ ಖುದ್ದ್ ಭುರ್ಗ್ಯಾನಿಂ ಶಿಕೊಂಕ್ ಜಾಯ್ ಮ್ಹಣ್ ಭುರ್ಗ್ಯಾಂಕ್ ಹಿಶಾರೊ ದಿಲೊ. ಕೆವೆಂತಾಚಿ ವ್ಹಡಿಲ್ನ್ ಸಿಸ್ಟರ್ ರೀನಾ ಹಾಣಿಂ ತಾಂಚಾ ಉತ್ರಾನಿಂ ಕಾರ್ಯಾಕ್ ಬೊರೆಂ ಮಾಗ್ಲೆಂ ಆನಿ ತಾಂಚಾ ಲ್ಹಾಣ್ಪಣಾಲ್ಯಾ ಪಾವ್ಶಿಲ್ಯಾ ಖಾಣಾಂಚ್ಯೊ ಯಾದಿ ಉಡಾಸಾಕ್ ಹಾಡ್ಲ್ಯೊ.

ತ್ಯಾ ದೀಸ್ ಖಾಣಾಂ-ಪಾಕ್ವಾನಾಂ ರಾಂದುನ್ ಹಾಡ್‍ಲ್ಲ್ಯಾಂಕ್ ತಶೆಂಚ್ ಆಧಾರ್ ದಿಲ್ಲ್ಯಾಂಕ್ ವಿಗಾರಾನಿಂ ಗುಲೊಬ್ ದೀವ್ನ್ ಉಲ್ಲಾಸಿಲೆಂ. ಹೆಂ ಕಾರ್ಯೆಂ ಸ್ತ್ರೀ ಸಂಘಟಟನೆಚಿ ಉಪಾಧ್ಯಕ್ಶಿಣ್ ರೇಶ್ಮಾ ಲೋಬೊನ್ ಚಲವ್ನ್ ವೆಲೆಂ. ವಿಗಾರಾನಿಂ ತ್ಯಾ ದಿಸಾಚೊ ಬೊರ್ಯಾಂತ್ಲೊ ಬೊರೊ ಸಂದೇಶ್ ದಿಲೊ. ಭಾಯ್ಲೆಂ ಬೇಕರಿಚೆಂ ಖಾಣ್ ಆನಿ ಆಮಿ ಘರಾ ರಾಂದ್‍ಲ್ಲ್ಯಾ ಖಾಣಚ್ಯಾ ವ್ಯಾತ್ಯಾಸಾ ವಿಶಿಂ ಆನಿ ಗೂಣ್ ಅವ್ಗುಣಾ ವಿಶಿಂ ಭುರ್ಗ್ಯಾಂಕ್ ಬೊರಿ ಸಮ್ಜೊಣಿಂ ದಿಲಿ ತಶೆಂಚ್ ಹೆಂ ಕಾರ್ಯೆಂ ಆಯೋಜನ್ ಕೆಲ್ಲ್ಯಾ ದೊನೀ ಸಂಘಟನಾಕ್ ಶಾಭಾಸ್ಕಿ ಪಾಟಯ್ಲಿ. ಉಪ್ರಾಂತ್ ಸಂಪನ್ಮೂಳ್ ವ್ಯಕ್ತಿ ಮಾನೆಸ್ತ್ ರಾಜೇಶ್ ಡಿಸೋಜ ಹಾಣಿಂ ಭುರ್ಗ್ಯಾಂಕ್ ಉದ್ದೇಶಿಸುನ್ ಭಾಷಣ್ ಕಲೆ ವಿಶ್ಯಾಂತ್ ಬೊರಿ ತರ್ಭೆತಿ ದಿಲಿ. ವೆದಿರ್ ಉಲೊಂವ್ಕ್ ವೆಚಾ ಪಯ್ಲೆಂ ಶಿಸ್ತ್, ಆಸಕ್ತ್, ತಯಾರಾಯ್ ಹೆ ತೀನ್ ವಿಷಯ್ ಮತಿಂತ್ ದವರುಂಕ್ ಜಾಯ್ ಆನಿ ವೆದಿಚೆರ್ ಉಲೈತಾನಾ ಮುಕಾರ್ ಬೊಸ್‍ಲ್ಲ್ಯಾ ಲೊಕಾಂಕ್ ಪಳೆವ್ನ್ ಉಲೈಜಯ್ ಅಶೆಂ ಭುರ್ಗ್ಯಾಂಕ್ ಬೊರಿ ಮಾಹೆತ್ ದಿಲಿ.

ಸ್ತ್ರೀ ಸಂಘಟನಾಚಿ ಜಾಗರಣ್ ಪತ್ರಾಚಿ ಪ್ರತಿನಿಧಿ ಸಬಿತಾ ರೋಡ್ರಿಗಸ್ ಹಿಣೆಂ ಭುರ್ಗ್ಯಾಂಕ್ ಖೆಳ್ ಚಲವ್ನ್ ವರ್ಚ್ಯಾ ಸವೆಂ ಸರ್ವಾಂಕ್ ಮನೋರಂಜಿತ್ ಕೆಲೆಂ.ಬ್ರದರ್ ಜೋನ್ಸನ್ ಕ್ರಾಸ್ತಾ ಹಾಣಿಂ ಖೆಳಾಂತ್ ಜಿಕ್‍ಲ್ಲ್ಯಾಂಕ್ ಇನಾಮಾಂ ವಾಂಟ್ಲಿಂ ಆನಿ ಜೆವ್ಣಾಚೆರ್ ಆಶಿರ್ವಾದ್ ಮಾಗ್ಲೊ. ದೊನೀ ಸಂಘಟನಾಚ್ಯಾ ಅಧ್ಯಕ್ಷಾನಿಂ ಸಾಂಪ್ರದಾಯಿಕ್ ರಿತಿನ್ ಭುರ್ಗ್ಯಾಂಕ್ ಜೆವ್ಣಾಕ್ ಉದಾಕ್ ದಿಲೆಂ. ಸರ್ವ್ ಭುರ್ಗ್ಯಾಂಚಿ ಏಕ್ ತಸ್ವೀರ್ ಕಾಡ್ತಚ್, ರುಚಿಕ್ "ಪಾವ್ಶಿಲಿಂ ಖಾಣಾಂ-ಪಾಕ್ವಾನಾಂ" ಸೆಂವ್ಕ್ ಭುರ್ಗಿಂ ಪಂಗ್ತೆರ್ ಬೊಸ್ಲಿಂ.ಜೆವ್ಣಾಚ್ಯಾ ಅಖೇರಿಕ್ ಸೊಮ್ಯಾಕ್ ಧಿನ್ವಾಸುನ್ "ಲಾವ್ದತೆ" ಕಂತಾರ್ ಮ್ಹಣೊನ್ ಕಾರ್ಯೆಂ ಅಖೇರ್ ಕೆಲೆಂ. ಕಥೊಲಿಕ್ ಸಭೆಚಿ ಅಧ್ಯಕ್ಷಿಣ್ ಶೆರಿ ನಜ್ರೆತ್ ಹಿಣೆಂ ಧನ್ಯವಾದ್ ಪಾಟಯ್ಲೊ, ನಿಕಟ್‍ಪೂರ್ವ್ ಅಧ್ಯಕ್ಷ್ ಚಾರ್ಲ್ಸ್ ಕ್ರಾಸ್ತಾನ್ ಕಾರ್ಯಕ್ರಮ್ ಚಲವ್ನ್ ವೆಲೆಂ. ಸುಮಾರ್ 130 ಜಣಾ ಹಾಜಾರ್ ಆಸೊನ್ ಕಾರ್ಯೆಂ ಬೋವ್ ಯಶಸ್ವಿ ರಿತಿನ್ ಸೊಂಪ್ಲೆ.