Mangalore Diocese News

By Wilson Pinto

Taccode - Moodbidri, June 16 : Women's Association of Holy Cross Church, Taccode organised Father's Day celebration on Sunday, 15th June 2025 in the Church hall.

ಸ್ತ್ರೀ ಸಂಘಟಣ್ ತಾಕೊಡೆ ಘಟಕಾಂತ್ "ಬಾಪಾಯಾಂಚೊ ದಿವಸ್" ಆಚರಣ್

ಸ್ತ್ರೀ ಸಂಘಟಣ್ ತಾಕೊಡೆ ಘಟಕಾಚ್ಯಾ ಮುಖೆಲ್ಪಣಾರ್, ಭಾಗೆವಂತ್ ಖುರ್ಸಾಚಿ ಫಿರ್ಗಜ್ ತಾಕೊಡೆಚ್ಯಾ ಸಭಾ ಸಲಾಂತ್ ತಾರಿಕ್ 15-06-2025 ಆಯ್ತಾರಾ ದೀಸ್ ಮಿಸಾ ಉಪ್ರಾಂತ್ ತಾಕೊಡೆ ಫಿರ್ಗಜೆಚ್ಯಾ ಸರ್ವ್ ಬಾಪಯಾಂಕ್ ಬಾಪಾಯಾಂಚೊ ದಿವಸ್ ವ್ಹಡ್ ಗದ್ದಾಳಾಯೆನ್ ಆಚರಣ್ ಕೆಲೊ. ಸ್ತ್ರೀಯಾಂಚಾ ಪ್ರಾರ್ಥನಾ ಗಿತಾಂ ತಶೆಂಚ್ ಸ್ವಾಗತ್ ನೃತ್ಯ ದ್ವಾರಿಂ ಹೆಂ ಕಾರ್ಯೆಂ ಸುರ್ವಾತ್ಲೆಂ. ವೆದಿ ಕಾರ್ಯೆಂ ಸುರ್ವಾತ್ ಕರ್ಚಾ ಪಯ್ಲೆಂ ತ್ಯಾ ದಿಸಾಚೊ ಲಕ್ಕಿ ಬಾಪಯ್ ಕೊಣ್ ಮ್ಹಣ್ ಚೀಟ್ ಕಾಡ್ಚಾ ಮುಖಾಂತ್ರ್ ವಿಂಚ್ಲೆ ಆನಿ ಮಾನೆಸ್ತ್ ಸಿಲ್ವೆಸ್ಟರ್ ಪಿಂಟೊ ತ್ಯಾ ದಿಸಾಚೊ ಲಕ್ಕಿ ಬಾಪಯ್ ಜಾವ್ನ್ ವಿಂಚುನ್ ಆಯ್ಲೊ. ಉಪ್ರಾಂತ್ ವೆದಿ ಕಾರ್ಯೆಂ ಸುರ್ವಾತ್ಲೆಂ. ಅಧ್ಯಕ್ಷ್ ಸ್ಥಾನ್ ಫಿರ್ಗಜ್ ವಿಗಾರ್ ಮಾ|ಬಾ| ರೋಹನ್ ಲೋಬೊ, ಮುಖೆಲ್ ಸಯ್ರೆ ಗೊವ್ಳಿಕ್ ಪರಿಷದೆಚೆ ಉಪಾಧ್ಯಕ್ಷ್ ಮಾನೆಸ್ತ್ ಫ್ರಾನ್ಸಿಸ್ ಮೆಂಡೋನ್ಸಾ, ಕಾರ್ಯದರ್ಶಿ ಮಾನೆಸ್ತ್ ಆಲ್ವಿನ್ ಪಿಂಟೊ, ಆಯೋಗ್ ಸಂಯೋಜಕ್ ಮಾನೆಸ್ತ್ ಪಾವ್ಲ್ ಡಿಸೋಜ, ಕೊವೆಂತಾಚಿ ವ್ಹಡಿಲ್ನ್ ಸಿಸ್ಟರ್ ರೀನಾ , ಸಂಪನ್ಮೂಳ್ ವ್ಯಕ್ತಿ ಮಾನೆಸ್ತಿಣ್ ಸಬಿತಾ ರೋಡ್ರಿಗಸ್, ಬಾಪಯಾಂ ತರ್ಫೆನ್ ಮಾನೆಸ್ತ್ ಸಿಲ್ವೆಸ್ಟರ್ ಪಿಂಟೊ, ಸ್ತ್ರೀ ಸಂಘಟನೆಚಿ ಅಧ್ಯಕ್ಷ್ ಶ್ರೀಮತಿ ಐವಿ ಕ್ರಾಸ್ತಾ, ಕಾರ್ಯದರ್ಶಿ ಶ್ರೀಮತಿ ಶಾಂತಿ ಪಿಂಟೊ ವೆದಿರ್ ಹಾಜಾರ್ ಆಸ್‍ಲ್ಲಿಂ.

ಅಧ್ಯಕ್ಷ್ ಐವಿ ಕ್ರಾಸ್ತಾನ್ ವೆದಿರ್ ಆಸ್‍ಲ್ಲ್ಯಾ ಸರ್ವ್ ಮಾನಾಚ್ಯಾ ಸಯ್ರ್ಯಾಂಕ್ ಆನಿ ಜಮ್ಲೆಲ್ಲ್ಯಾ ಸಮೇಸ್ತಾಂಕ್ ಸ್ವಾಗತ್ ಮಾಗ್ಲೊ. ಅಧ್ಯಕ್ಷ್ ಸ್ಥಾನ್ ಘೆತ್‍ಲ್ಲ್ಯಾ ವಿಗಾರ್ ತಶೆಂಚ್ ಘಟಕಾಚ್ಯಾ ಅತ್ಮಿಕ್ ನಿರ್ದೇಶಕ್ ಬಾಪಾನಿಂ ಕುಟ್ಮಾಂತ್ ಬಾಪಾಯಾಂಚ್ಯಾ ಜವಾಬ್ದಾರೆ ವಿಶ್ಯಾಂತ್ ಪಿಂತ್ರಾಯ್ಲೆಂ ಪಿಂತುರ್ ಉಗ್ತೆಂ ಕರ್ಚಾ ಮುಖಾಂತ್ರ್ ಕಾರ್ಯಾಚೆಂ ಉಗ್ತಾವಣ್ ಕೆಲೆಂ ವೆದಿರ್ ಆಸ್‍ಲ್ಲ್ಯಾ ಮಾನಾಚ್ಯಾ ಸಯ್ರ್ಯಾನಿಂ ಸಾಂಗಾತ್ ದಿಲೊ. ಸ್ತ್ರೀಯಾನಿಂ ಉಲ್ಲಾಸಾಚೆಂ ಗೀತ್ ಗಾಂವ್ಚಾ ಮುಖಾಂತ್ರ್ ಹಾಜಾರ್ ಆಸ್‍ಲ್ಲ್ಯಾ ಸರ್ವ್ ಬಾಪಾಯಾಂಕ್ ಉಲ್ಲಾಸ್ ಪಾಠಯ್ಲೊ. ಗೊವ್ಳಿಕ್ ಪರಿಷದೆಚೆ ಕಾರ್ಯದರ್ಶಿ ಮಾನೆಸ್ತ್ ಆಲ್ವಿನ್ ಪಿಂಟೊ , ಕುಟ್ಮಾಂತ್ ಬಾಪಯಾಂಚೊ ಪಾತ್ರ್, ಜವಾಬ್ದಾರಿ ಆನಿ ತಾಂಕಾ ಕುಟ್ಮಾಂತ್ ಮೆಳ್ಚೊ ಗೌರವ್ ಹ್ಯಾ ವಿಶಿಂ ಬಾಪಾಯಾಂಕ್ ಉದ್ದೇಶಿಸುನ್ ಉಲೈಲೆ. ಕಾರ್ಯಾಚೆ ಅಧ್ಯಕ್ಷ್ ಸ್ಥಾನ್ ಘೆತ್‍ಲ್ಲ್ಯಾ ವಿಗಾರ್ ಬಾಪಾನಿಂ ತಾಣಿಂ ಬರೈಯ್ಲ್ಯಾ ಕವನಾ ದ್ವಾರಿಂ ತ್ಯಾ ದಿಸಾಚೊ ಸಂದೇಶ್ ಪಾಟಯ್ಲೊ.

ಉಪ್ರಾಂತ್ ಸಂಪನ್ಮೂಲ್ ವ್ಯಕ್ತಿ ಮಾಜಿ ಫಿರ್ಗಜ್ ಗೊವ್ಳಿಕ್ ಪರಿಷದೆಚಿ ಉಪಾಧ್ಯಕ್ಷಿಣ್ ತಶೆಂಚ್ ಪ್ರಸ್ತುತ್ ಸ್ತ್ರೀ ಸಂಘಟನ್ ವಾರಾಡೊ ಖಜನ್ದಾರ್ ಜಾವ್ನಾಸ್ಚಿ ಮಾನೆಸ್ತಿಣ್ ಸಬಿತಾ ರೋಡ್ರಿಗಸ್ ಹಿಣೆಂ ಕುಟ್ಮಾಂತ್ ಬಾಪಾಯಾಂಚಾ ಮಹತ್ವಾ ವಿಶಿಂ, ಪರ್ದ್ಯಾ ಪಾಟ್ಲ್ಯಾನ್ ಬಾಪಾಯ್ನ್ ಕುಟ್ಮಾಖಾತಿರ್ ವಾವುರ್ಚಾ ವಿಶಿಂ, ಆವಯ್ ನಾತ್‍ಲ್ಲ್ಯಾ ವೆಳಾರ್ ಅಪ್ಣಾಚೆ ಎಕ್ಸುರ್‍ಪಣ್ ದಾಖಯ್ನಾಸ್ತಾಂ ಭುರ್ಗ್ಯಾಂಕ್ ಮೋಗ್ ದೀವ್ನ್ ವಾಡೊಂವ್ಚಾ ವಿಶಿಂ, ಬಾಪಾಯಾನಿಂ ಕುಟ್ಮಾಕ್ ದಿಂವ್ಚಾ ತ್ಯಾಗ್ ಆನಿ ಸಾಕ್ರಿಫಿಸಾ ವಿಶಿಂ ಏಕ್ ಬೊರೊ ಸಂದೇಶ್ ದಿಲೊ.

ಉಪ್ರಾಂತ್ ಸ್ತ್ರೀ ಸಂಘಟನೆಚ್ಯೊ ಸ್ತ್ರಿಯೊ ಲೀಜಾ ರೋಡ್ರಿಗಸ್, ಶಾಂತಿ ಪಿಂಟೊ ಆನಿ ಸಬಿತಾ ರೋಡ್ರಿಗಸ್ ಹಾಣಿಂ ವಿವಿಧ್ ಖೆಳ್ ಚಲವ್ನ್ ವೆಲೆ ಜೀಕ್ ಅಪ್ಣಾಯ್ಲ್ಯಾಂಕ್ ಬ್ರದರ್ ಜೋನ್ಸನ್ ಕ್ರಾಸ್ತಾ ಹಾಣಿಂ ಇನಾಮಾಂ ದೀವ್ನ್ ಉಲ್ಲಾಸಿಲೆಂ. ಸ್ತ್ರೀಯಾನಿಂ ಸಾದರ್ ಕೆಲ್ಲ್ಯಾ ವಿವಿಧ್ ಮನೋರಂಜನ್ ಕಾರ್ಯಾ ದ್ವಾರಿಂ ಸರ್ವಾಂಕ್ ಮನೋರಂಜಿತ್ ಕೆಲೆಂ. ಜಮ್ಲೆ‍ಲ್ಲ್ಯಾ ಸರ್ವ್ ಬಾಪಯಾಂ‌ ತರ್ಫೆನ್ ಮಾನೆಸ್ತ್ ಚಾರ್ಲ್ಸ್ ಕ್ರಾಸ್ತಾನ್ ಕಾರ್ಯಕ್ರಮಾಚಿ ಭೊಗ್ಣಾಂ ಉಚಾರ್ಲಿಂ. ಸಿಸ್ಟರ್ ರೀನಾ ಹಿಣೆಂ ಜೆವ್ಣಾಚೆರ್ ಆಶಿರ್ವಾಚನ್ ಮಾಗ್ಲೊ. ಘಟಕಾಚಿ ಉಪಾಧ್ಯಕ್ಷಿಣ್ ಶ್ರೀಮತಿ ರೇಶ್ಮಾ ಲೋಬೊನ್ ಕಾರ್ಯೆಂ ಚಲವ್ನ್ ವೆಲೆಂ ಆನಿ ಘಟಕಾಚಿ ಕಾರ್ಯದರ್ಶಿ ಶಾಂತಿ ಪಿಂಟೊ ನ್ ಧನ್ಯವಾದ್ ಪಾಟಯ್ಲೊ. ಜೆವ್ಣಾಸವೆಂ ಕಾರ್ಯೆಂ ಅಖೇರ್ ಜಾಲೆಂ.