Associations' / Institutions' News

Media Release

Mangaluru, April 29, 2025: Mandd Sobhann conducted certificate distribution ceremony to students of Sur Sobhan (music training) and Baila-Hope (dance training) at Kalangan, Shaktinagar, on April 27.

ಕಲಾಂಗಣ್ : ಪ್ರಮಾಣ್ ಪತ್ರ್ ವಿತರಣ್

"ಬುಡ್ತುಗೊಲಾ ವೆಳಾರ್ ನೊಯೆಚ್ಯಾ ಆರ್ಕಾಂತ್ ಫುಡಾರಾ ಖಾತಿರ್ ಬರ್ಯಾಂತ್ಲೆಂ ಬರೆಂ ದೆವಾನ್ ಉರಯಿಲ್ಲೆಂ. ತೆಚ್ ಪರಿಂ ಕಲಾಂಗಣ್ ಕೊಂಕ್ಣಿ ಸಂಸ್ಕೃತಿ ಉರೊವ್ನ್ ವಾಡೊಂವ್ಚೆಂ ನೊಯೆಚೆಂ ಆರ್ಕ್. ಹಾಂಗಾ ಯೆಂವ್ಚೊಚ್ ಏಕ್ ಸಂಭ್ರಮ್. ಹಾಂಗಾಚ್ಯಾ ಕಾರ್ಯಕ್ರಮಾಂನಿ ಕೊಂಕ್ಣೆಕ್ ಬಾಳ್ವಿ ದಿಲ್ಯಾ, ಉಂಚಾಯ್ ದಿಲ್ಯಾ. ಹಾಂಗಾ ಆಜ್ ಗಾಯಾನ್ ಆನಿ ನಾಚಾಂತ್ ತರ್ಬೆತಿ ಜೊಡ್ಲಲಿಂ ಭುರ್ಗಿಂ ಪ್ರಮಾಣ್ ಪತ್ರ್ ಜೊಡ್ತಲಿಂ. ತಿಂ ಭವಿಷ್ಯಾಚ್ಯಾ ಸಂಸ್ಕೃತೆಚಿಂ ರಾಯ್'ಭಾರಿ. ಹಿ ಪರಂಪರಾ ಫುಡೆಂ ವರುಂಕ್ ತಾಂಕಾಂ ಉಲೊ ದಿತಾಂ" ಮ್ಹಣ್ ಉಜ್ವಾಡ್ ಪಂದ್ರಾಳ್ಯಾಚೊ ಸಂಪಾದಕ್ ಮಾ.ಬಾ. ಆಲ್ವಿನ್ ಸಿಕ್ವೇರಾನ್ ಬರೆಂ ಮಾಗ್ಲೆಂ.

ತೊ 27.04.25 ವೆರ್ ಕಲಾಂಗಣಾಂತ್, ಮಾಂಡ್ ಸೊಭಾಣ್ ಸಂಸ್ಥ್ಯಾನ್ ಮಾಂಡುನ್ ಹಾಡ್ಲಲ್ಯಾ ಸುರ್ ಸೊಭಾಣ್ ಗಾಯಾನ್ ಆನಿ ಬಾಯ್ಲಾ-ಹೊಪ್ ನಾಚ್ಪಾ ತರ್ಬೆತಿ ಜೊಡ್ಲಲ್ಯಾಂಕ್ ಪ್ರಮಾಣ್ ಪತ್ರಾಂ ವಿತ್ರಾವ್ನ್ ಉಲಯ್ತಾಲೊ. ಸುರ್ ಸೊಭಾಣ್ 60 ವೊರಾಂಚಿಂ ಹಿಂದೂಸ್ತಾನಿ ಸಂಗೀತ್ ಆನಿ ಕೊಂಕ್ಣಿ ಗಾಯಾನಾಚಿ ತರ್ಬೆತಿ ತರ್, ಬಾಯ್ಲಾ–ಹೊಪ್ ಕೊಂಕ್ಣಿ ಬಾಯ್ಲಾ ಪ್ರಕಾರ್ ಆನಿ ಪಾಶ್ಚಿಮಾತ್ಯ್ ಹಿಪ್ ಹೊಪ್ ನಾಚ್ಪಾ ಪ್ರಕಾರಾಚಿ 40 ವೊರಾಂಚಿಂ ತರ್ಬೆತಿ. ಸುರ್ ಸೊಭಾಣ್ ವಿದ್ಯಾರ್ಥಿಂನಿ ಮೌಖಿಕ್ ಆನಿ ಲಿಖಿತ್ ಪರಿಕ್ಷಾ ಫುಡ್ ಕೆಲ್ಲಿ. ಸುರ್ ಸೊಭಾಣಾಕ್ 70 ಆನಿ ಬಾಯ್ಲಾ ಹೊಪಾಕ್ 27 ವಿದ್ಯಾರ್ಥಿಂನಿ ನಾಂವಾಂ ದಾಖಲ್ ಕೆಲ್ಲಿಂ.

ತರ್ಬೆತ್'ದಾರಾಂ ಶಿಲ್ಪಾ ಕುಟಿನ್ಹಾನ್ ಸುರ್ ಸೊಭಾಣ್ ತರ್ಬೆತಿವಿಶಿಂ ಆನಿ ರಾಹುಲ್ ಪಿಂಟೊನ್ ನಾಚ್ಪಾ ತರ್ಬೆತಿ ವಿಶಿಂ ಮಾಹೆತ್ ದಿಲಿ. ಮಾಂಡ್ ಸೊಭಾಣ್ ಗುರ್ಕಾರ್ ಎರಿಕ್ ಒಝೇರಿಯೊನ್ ``ಭುರ್ಗ್ಯಾಂನಿ ಇತ್ಲ್ಯಾರ್ ರಾಂವ್ಚೆಂ ನ್ಹಯ್, ಆಪ್ಲ್ಯಾ ಆಸಕ್ತೆಚ್ಯಾ ಶೆತಾಂತ್ ಚಡಿತ್ ಮಿನತ್ ಘಾಲಿಜೆ ಆನಿ ಶ್ರೇಷ್ಟತಾಯೆ ಕುಶಿನ್ ಚಮ್ಕಾಜೆ'' ಮ್ಹಣ್ ಉಲೊ ದಿಲೊ. ವಿದ್ಯಾರ್ಥಿಂನಿ ಆಪ್ಣೆಂ ಶಿಕ್ಲಲೆಂ ಏಕ್ ಪದ್ ಆನಿ ನಾಚ್ ಸಾದರ್ ಕೆಲೆ.

ವಿತೊರಿ ಕಾರ್ಕಳಾನ್ ಪ್ರಮಾಣ್ ಪತ್ರಾಂ ಜೊಡ್ಚ್ಯಾ ಭುರ್ಗ್ಯಾಂಚಿಂ ನಾಂವಾಂ ವಾಚ್ಲಿಂ ಆನಿ ಜೂನ್ ಪಯ್ಲ್ಯಾ ಆಯ್ತಾರಾ ಥಾವ್ನ್ ಸುರು ಜಾಂವ್ಚ್ಯಾ ಸುರ್ ಸೊಭಾಣ್ ಗ್ರೇಡ್ 1 ಆನಿ ಗ್ರೇಡ್ 2 ಸಂಗೀತ್ ತರ್ಬೆತೆಚಿ ಮಾಹೆತ್ ದಿಲಿ. ಸಹ ತರ್ಬೆತ್'ದಾರ್ ಡಿಯೆಲ್ ಡಿಸೋಜ, ಆಶ್ವಿಲ್ ಕುಲಾಸೊ ಆನಿ ಡೆಲಿಶಿಯಾ ಪಿರೇರಾ ಹಾಂಕಾಂ ಮಾನ್ ಕೆಲೊ.

ವೆದಿರ್ ಮಾಂಡ್ ಸೊಭಾಣ್ ಅಧ್ಯಕ್ಷ್ ಲುವಿ ಜೆ ಪಿಂಟೊ ಆನಿ ಸುಮೇಳ್ ಸಮನ್ವಯಿ ರೈನಾ ಸಿಕ್ವೇರಾ ಹಾಜರ್ ಆಸ್ಲಲಿಂ. ವಿಕಾಸ್ ಕಲಾಕುಲ್ ಹಾಣೆಂ ಸೊಭಿತ್ ರಿತಿನ್ ಕಾರ್ಯೆಂ ಚಲಯ್ಲೆಂ.