Articles / Special

Media Release

Mangaluru, May 24, 2025 : The faithful are preparing to celebrate the 59th World Day of Social Communications on Sunday, 1st June this year. This year's theme, "Share with gentleness the hope that is in your hearts" (cf. 1 Peter 3:15-16), speaks to the heart of our mission as communicators in a divided and digitalised world. The Holy Father's message encourages all of us to be gentle, truthful, and hope-filled in our communication.

Click here to read Message of the Holy Father

The Konkani translation of Holy Father's message has been prepared by Fr Jovin Vishwas Sequeira (Rome), a member of the Diocesan Commission for Social Communication.

59ವ್ಯಾ ವಿಶ್ವ್ ಸಾಮಾಜಿಕ್ ಸಂವಹನ್ ದಿಸಾಕ್ ಪಾಪಾಚೊ ಸಂದೇಶ್

“ತುಮ್ಚ್ಯಾ ಕಾಳ್ಜಾಂನಿ ಆಸ್ಲ್ಲೊ ಭರ್ವಸೊ ನಮ್ರತೆನ್ ವಾಂಟುನ್ ಘೆಯಾ.” (1 ಪೆದ್ರು 3:15-26)

ಆಮಿ ಜಿಯೆಂವ್ಚ್ಯಾ ಹ್ಯಾ ಕಾಳಾರ್ ಚೂಕ್ ಮಾಹೆತ್ ಆನಿ ಧ್ರುವಿಕರಣಾ ತಸಲಿಂ ಪಂಥಾಹ್ವಾನಾ ಆಸಾತ್. ಥೊಡೆಚ್ ವ್ಯಕ್ತಿ ಆನಿ ಸಕ್ತಿ, ಮಾಹೆತಿಚ್ಯಾ ಆಪೂರ್ವ್ ಸಂಗ್ರಹಾಚೆರ್ ನಿಯಂತ್ರಣ್ ದವರ‍್ತಾತ್. ಅಸಲ್ಯಾ ಕಾಳಾರ್ ಸಂವಹನ್ಕಾರ್ (Communicator) ಆನಿ ಪತ್ರ್ಕರ್ತಾಂಚೊ ವಾವ್ರ್, ಪಯ್ಲೆಂಚ್ಯಾಕೀ ಚಡ್ ಗರ್ಜೆಚೊ.ಸಾಮೂಹಿಕ್ ಆನಿ ವಯುಕ್ತಿಕ್ ಜವಾಬ್ದಾರಿ ಆಸ್’ಲ್ಲೆಂ ಸಂವಹನ್ ರಚುಂಕ್ ತಾಂಚೊ ಧಯ್ರಾಧಿಕ್ ವಾವ್ರ್ ಖಂಡಿತ್ ಗರ್ಜ್ ಆಸಾ. ಅಸಲ್ಯಾ ಸಂಕಷ್ಟಾಚ್ಯಾ ಕಾಳಾರ್ ಏಕ್ ಕುರ್ಪೆಚಿ ಘಡಿ ಜಾವ್ನ್, ಹ್ಯಾ ವರ್ಸಾ ಆಮಿ ಸಂಭ್ರಮ್ಚ್ಯಾ ಜುಬ್ಲೆವಾಚೆರ್ ನಿಯಾಳ್ ಕರ‍್ತಾನಾ, ಸುವಾರ್ತೆಚ್ಯಾ ಸ್ಪಿರಿತಾಂತ್ ಸಂವಹನ್ ವಾವ್ರಾಚೆಂ ಆನಿ ಮಿಸಾಂವಾಚೆಂ ನವೀಕರಣ್ ಕರುನ್, ‘ಭರ್ವಶ್ಯಾಚೆ ಸಂವಹನ್ಕಾರ್ʼ ಜಾಂವ್ಚ್ಯಾಕ್ ಪಾಪಾಸಾಯ್ಬ್ಹ್ಯಾ ಸಂದೇಶಾಂತ್ ಉಲೊ ದಿತಾ.

1. ಸಂವಹನ್ ನಿಶಸ್ತ್ರ್ ಕರುಂಕ್.

ಆಜ್ ಕಾಲ್ ಸಂವಹನ್ ವಾ ಮಾಧ್ಯಮಾಂ ಭರ್ವಶ್ಯಾ ಬದ್ಲಾಕ್ ಭಿರಾಂತ್, ನಿರಾಶಾ, ಪೂರ್ವಾಭಿಪ್ರಾಯ್, ಹಗೆಂ, ಮತಾಂಧ್ಪಣ್ ಆನಿ ಧ್ವೇಷ್ ರಚ್ತಾತ್. ಆಮ್ಚ್ಯಾ ಭೊಂವಾರಾತ್ಲೆಂ ವಾಸ್ತವ್ ಸಮ್ಜುಂಕ್ ಕಷ್ಟ್. ಪೂಣ್ ಮಾಧ್ಯಮಾಂ ವಾಸ್ತವ್ ಇತ್ಲೆಂ ಸೊಂಪೆಂ ಕರ‍್ತಾತ್ಕೀ, ತಾಚ್ಯೆ ದ್ವಾರಿಂ ಮನ್ಶಾಚಿ ಸಂಯ್ಬಿಕ್ ಪ್ರತಿಕ್ರಿಯಾ ಚಾಳ್ವಯ್ತಾತ್. ಉತ್ರಾಂ ವಾಕೊರ್ ಜಾವ್ನ್ ವಾಪಾರ‍್ತಾತ್. ಲೊಕಾಕ್ ಉಚಾಂಬಳ್ ಕರುಂಕ್ ವಾ ದುಕಂವ್ಕ್ ಮ್ಹಣ್ಚ್ ಫಟ್ ವಾ ಚಾಲಾಕೆನ್ ರಚ್ಲಲಿ ಚೂಕ್ ಮಾಹೆತ್ ಸಯ್ತ್ ವಾಪಾರ‍್ತಾತ್.ದೆಕುನ್ ಪಾಪಾ ಸಂವಹನ್ ನಿಶಸ್ತ್ರ್ ಕರುಂಕ್ ಉಲೊ ದಿತಾ. ಟಿ.ವಿ. ಕಾರ್ಯಕ್ರಮಾಂ ಥಾವ್ನ್ ಆರಂಭ್ ಕರ‍್ನ್ ಸಾಮಾಜಿಕ್ ಮಾಧ್ಯಮಾಂನಿ ಸಬ್ದ್ ವಾಪಾರ‍್ನ್ ಕರ‍್ಚ್ಯಾ ಹಲ್ಲ್ಯಾ ಮ್ಹಣಾಸರ್ – ಸ್ಪರ್ಧ್ಯಾಚೊ, ವಿರೋಧ್ಪಣಾಚೊ ಆನಿ ಫಟವ್ನ್ ಲೊಕಾಭಿಪ್ರಾಯ್ ಬದ್ಲುಂಚೊ ಏಕ್ ನಮುನೊ ಪ್ರಬಲ್ ಜಾಂವ್ಚೆಂ ಆಮ್ಕಾಂ ಸಕ್ಡಾಂಕ್ ದಿಸ್ತಾ.

ಆಜ್ಕಾಲ್ ಡಿಜಿಟಲ್ ತಂತ್ರಗ್ಯಾನಾನ್, ಆರ್ಥಿಕ್ ಸಂಸಾರಾಕ್ ಆಧಾರ್ ಜಾಂವ್ಚೆ ಪರಿಂ, ಆಮ್ಚೆಂ ಗುಮಾನ್ ತಾಕಾ ಜಾಯ್ ಜಾಲ್ಲ್ಯಾ ಕುಶಿಕ್ ಮಾತ್ರ್ ವೆಚ್ಯಾ ಪರಿಂ ಪ್ರೊಗ್ರಾಮಾಂ ಕೆಲ್ಯಾಂತ್. ಅಶೆಂ ಹೆಂ ಹರೇಕ್ಲ್ಯಾಕ್ ವೆವೆಗ್ಳಿ ವಾಸ್ತವಿಕತಾ ರಚ್ತಾ ಜಾಲ್ಲ್ಯಾನ್, ಆಮಿ ಸಮುದಾಯ್ ಜಿವಿ ಮ್ಹಳ್ಳೆಂ ವಿಸ್ರಾಶೆಂ ಕೆಲಾಂ. ದೆಕುನ್ ಆಮ್ಕಾಂ ಹೆರಾಂಕ್ ಸಮ್ಜುಂಕ್, ತಾಂಕಾಂ ಆಧಾರ್ ದಿಂವ್ಕ್ ತ್ರಾಸ್ ಜಾತಾತ್. ಹೆರಾಂ ಆಮ್ಕಾಂ ದುಸ್ಮಾನ್ ಕಶೆಂ ದಿಸ್ತಾತ್. ಆನಿ ದುಸ್ಮಾನಾಂಕ್ ಕೆಂಡುನ್, ತಾಂಚೆಂ ಘನ್-ಮಾನ್ ಲೆಕಿನಾಸ್ತಾಂ ಆಕ್ಮಾನ್ ಕರ‍್ನ್ ಭರ್ವಸೊ ನಾತ್ಲ್ಲೊ ಸಮಾಜ್ ರಚ್ತೆಚ್ ಆಸಾಂವ್. ಇತಾಲಿಯಾನ್ ಬಿಸ್ಪ್ ಆನಿ ಬರವ್ಪಿ ಟೊನಿನೊ ಬೆಲ್ಲೊ ಹಾಣೆಂ ಸಾಂಗಲ್ಲ್ಯಾ ಪರಿಂ, ’ಮನ್ಶಾಂಚಿಂ ಮುಖಾಮಳಾಂ ಕರ್ಗೊನ್ ಮಾಯಾಗ್ ಜಾತಾನಾ ಸರ್ವ್ ಸಂಘರ್ಷ್ ಸುರು ಜಾತಾತ್.ʼ

ಭರ್ವಸೊ ಸುಲಭ್ ನ್ಹಯ್. ಜೊರ್ಜೆಸ್ ಬೆರ್ನಾನೊಸಾನ್ ಸಾಂಗಲ್ಲ್ಯಾ ಪರಿಂ, ʼಭರ್ವಸೊ ಸಾಹಸಾಂ ಮಧ್ಲೊ ಸಾಹಸ್.ʼ ಆನಿ ಕೊಣೆಂ ಜ್ಯಾ ಫಟಿಂನಿ ಆನಿ ಭ್ರಾಂತಾಂತ್ ಸುಶೆಗ್ ಸೊದ್ಲಲೊ ಆನಿ ಆತಾಂ ತ್ಯಾಚ್ ಫಟಿಂಕ್ ಪಾಟ್ಕರ‍್ನ್ ಯೆತಾತ್, ತಾಂಕಾಂ ಮಾತ್ರ್ ಭರ್ವಸೊ ಸಾದ್ಯ್. ಅಸಲೊ ಸಾಹಸ್ ಭರ್ವಸೊ ಘಡ್ತಾ. ಭರ್ವಸೊ ಏಕ್ ಸೊಸ್ಣಿಕ್ ಆನಿ ಗುಪಿತ್ ಮೌಲ್ಯ್. ಕ್ರಿಸ್ತಾಂವಾಂಕ್ ಹಾಂತುನ್ ವಿಂಚವ್ಣ್ ನಾ, ಬಗಾರ್ ಕಡ್ಡಾಯ್ ಜಾವ್ನ್ ಆಸುಂಕ್ ಜಾಯ್ ಜಾಲ್ಲೆಂ ಮೌಲ್ಯ್. ಪಾಪಾ ಬೆನೆದೆಕ್ತ್ ಸೊಳಾವೊ ಆಪ್ಲ್ಯಾ ದಸ್ತಾವೆಜ್ ಸ್ಪೆ ಸಾಲ್ವಿ ಹಾಂತುನ್ ಮ್ಹಣ್ತಾ ಭರ್ವಸೊ ಮ್ಹಳ್ಯಾರ್ ಕೇವಲ್ ಸಕಾರಾತ್ಮಕ್ ಚಿಂತಾಪ್ ನ್ಹಯ್. ಬಗಾರ್ ಆಮ್ಚೆಂ ಜಿವಿತ್ ಬದ್ಲುಂಕ್ ಸಕ್ಚೆಂ ಕ್ರಿಯಾಳ್ ಮೌಲ್ಯ್. ಭರ್ವಸೊ ಆಸಲ್ಲೊ ವೆಗ್ಳೆಚ್ ರಿತಿನ್ ಜಿಯೆತಾ ಆನಿ ಅಸಲ್ಯಾಕ್ ನವ್ಯಾ ಜಿವಿತಾಚೆಂ ದೆಣೆಂ ಲಾಭ್ಲಾಂ.

ಆಮ್ಚೆ ಥಂಯ್ ಆಸ್ಚೊ ಭರ್ವಸೊ ನಮ್ರತೆನ್ ಜಾಣಾ ಜಾವ್ಯಾಂ.

ಸಾಂ ಪೆದ್ರುಚ್ಯಾ ಪಯ್ಲ್ಯಾ ಪತ್ರಾಂತ್(3:15-16), ಸಂವಹನ್ ಆನಿ ಕ್ರೀಸ್ತಿ ಸಾಕ್ಸ್ ದಿಂವ್ಚೆಂ ಕಶೆಂ ಭರ್ವಶ್ಯಾಕ್ ತಾಳ್ ಪಡ್ತಾ ಮ್ಹಳ್ಳೆಂ ಪಳೆವ್ಯೆತ್: “ಕ್ರಿಸ್ತಾಕ್ ಸೊಮಿ ಮ್ಹಣ್ ತುಮ್ಚ್ಯಾ ಅಂತಸ್ಕರ್ನಾಂನಿ ಮಾನಾನ್ ಒಳ್ಕಾ. ತುಮ್ಚೇ ಥಂಯ್ ಆಸ್ಲಲ್ಯಾ ಭರ್ವಶಾಚೆಂ ಕಾರಣ್ ವಿಚಾರ‍್ತಲ್ಯಾ ಹರೇಕ್ಲ್ಯಾಕ್ ಜಾಪ್ ದಿಂವ್ಕ್ ಸದಾಂಚ್ ತಯಾರ್ ಆಸುಂಕ್ ಜಾಯ್, ತರಿ ಪುಣ್ ಹೆಂ ಕಾಮ್ ನಮ್ರತೆನ್ ಆನಿ ಮರ್ಯಾದ್ ದೀವ್ನ್ ಕರಾ.” ಹ್ಯಾ ವಾಕ್ಯಾಂತ್ ತೀನ್ ಸಂದೇಶ್ ಆಮ್ಕಾಂ ಮೆಳ್ತಾತ್.

1. “ಕ್ರಿಸ್ತಾಕ್ ಸೊಮಿ ಮ್ಹಣ್ ತುಮ್ಚ್ಯಾ ಅಂತಸ್ಕರ್ನಾಂನಿ ಮಾನಾನ್ ಒಳ್ಕಾ.”: ಕ್ರಿಸ್ತಾಂವಾಂಚ್ಯಾ ಭರ್ವಶ್ಯಾಕ್ ಜಿವಂತ್ ಜೆಜುಚೆಂ ಮುಕಾಮಳ್ ಆಸಾ. ಪವಿತ್ರ್ ಆತ್ಮ್ಯಾಚ್ಯಾ ದೆಣ್ಯಾಂ ಮುಕಾಂತ್ರ್ ಆಮ್ಚೆ ಸಂಗಿಂ ಸದಾಂಚ್ ಆಸ್ತಲೊಂ ಮ್ಹಣ್ ಸೊಮ್ಯಾನ್ ಕೆಲ್ಲಿ ಭಾಸಾವ್ಣಿ, ಹೆರ್ ಸರ್ವ್ ಭರ್ವಶ್ಯಾಂ ವಿರೋಧ್ ಸಯ್ತ್ ಭರ್ವಸುಂಕ್ ಆನಿ ಸರ್ವಾಂತ್, ಸಲ್ವಣೆಂತ್ ಸಯ್ತ್ ಗುಪಿತ್ ಬರೆಂಪಣ್ ಆನ್ಬೋಗ್ ಕರುಂಕ್ ಆಧಾರ್ ದಿತಾ.

2. “ತುಮ್ಚೇ ಥಂಯ್ ಆಸ್ಲಲ್ಯಾ ಭರ್ವಶಾಚೆಂ ಕಾರಣ್ ವಿಚಾರ‍್ತಲ್ಯಾ ಹರೇಕ್ಲ್ಯಾಕ್ ಜಾಪ್ ದಿಂವ್ಕ್ ಸದಾಂಚ್ ತಯಾರ್ ಆಸುಂಕ್ ಜಾಯ್”: ಕ್ರಿಸ್ತಾಂವಾಂ ದೆವಾವಿಶಿಂ “ಉಲಂವ್ಚಿ” ಪರ್ಜಾ ನ್ಹಯ್, ಬಗಾರ್ ದೆವಾಚ್ಯಾ ಮೊಗಾಚಿ ಸೊಭಾಯ್ ಆನಿ ನವಿ ಜಿಣ್ಯೆರೀತ್ ಪ್ರತಿಫಲನ್ ಕರ‍್ಚಿ ಪರ್ಜಾ. ದೆಕುನ್ ಅಸಲೊ ಮೋಗ್ ಜಿಯೆವ್ನ್ ದಾಕಯ್ತಾನಾ, “ತುಂ ಕಿತ್ಯಾಕ್ ಅಸೊ ವಾ ಅಶಿ? ತುಜಿ ಜಿಣಿ ಕಿತ್ಯಾಕ್ ಅಶಿ?” ಮ್ಹಳ್ಳಿಂ ಸವಾಲಾಂ ಯೆತಾತ್ ಆನಿ ತಾಂಕಾಂ ಆಮಿ ಜಾಪಿ ದಿಂವ್ಕ್ ಆಸಾ.

3. “ಹೆಂ ಕಾಮ್ ನಮ್ರತೆನ್ ಆನಿ ಮರ್ಯಾದ್ ದೀವ್ನ್ ಕರಾ.” ಕ್ರೀಸ್ತಿ ಸಂವಹನ್ ಮಾತ್ರ್ ನ್ಹಯ್, ಹರೇಕ್ ರಿತಿಚೆಂ ಸಂವಹನ್ ನಮ್ರತೆನ್ ಆನಿ ಸಂಗಿಂ ಪಯ್ಣ್ ಕರ‍್ಚ್ಯಾ ಸಾಂಗಾತ್ಯಾಂ ಪರಿಂ ಆಪ್ತ್ಪಣಾನ್ ಭರ‍್ಲಲೆಂ ಆಸುಂಕ್ ಜಾಯ್. ಹೆಂಚ್ ವಿಧಾನ್ ಸರ್ವ್ ಕಾಳಾಂಚೊ ವರ್ತೊ ಸಂವಹನ್ಕಾರ್ ಜೆಜು ನಜರೆನ್ಗಾರಾನ್ ವಾಪಾರ‍್ಲಲೆಂ. ಎಮ್ಮಾವ್ಸಾಚ್ಯೆ ವಾಟೆರ್ ದೋಗ್ ಶಿಸಾಂ ಸಾಂಗಾತಾ ಚಲೊನ್, ತಾಂಕಾಂ ಸರ್ವ್ ಘಡಿತಾಂ ದೆವಾಚ್ಯಾ ಉತ್ರಾಚ್ಯಾ ಉಜ್ವಾಡಾನ್ ವಿವರುನ್ ತಾಂಚಿಂ ಕಾಳ್ಜಾಂ ತಾಣೆಂ ಪೆಟಾಶಿಂ ಕೆಲಿಂ.

ಹ್ಯಾ ಸಂಕಷ್ಟಾಚ್ಯಾ ಕಾಳಾರ್ ಆಮ್ಚ್ಯಾ ಭಾವಾಭಯ್ಣಿಂ ಸಾಂಗಾತಾ ಚಲುನ್ ತಾಂಕಾಂ ಭರ್ವಸುಂಕ್ ಪಾಟಿಂಬೊ ದಿಂವ್ಚಿಂ ಸಹಪಯ್ಣಾರಿ ಆಮ್ಕಾಂ ಕರ‍್ಚೆ ತಸಲೆಂ; ರಕ್ಷಣಾತ್ಮಕ್ ಆನಿ ರಾಗಾಚಿಂ ಸ್ವಾಭಾವಿಕ್ ಭೊಗ್ಣಾಂ ನ್ಹಯ್ ಬಗಾರ್ ಇಶ್ಟಾಗತ್ ಆನಿ ಉಗ್ತೊ ಮನೋಭಾವ್ ಉಬ್ಜಂವ್ಚೆಂ, ಕಾಳ್ಜಾಂ ಮಧೆಂ ಜಾಂವ್ಚೆಂ ತಸಲೆಂ; ನಿರಾಶೆನ್ ಭರ‍್ಲಲ್ಯಾ ಸನ್ನಿವೇಶಾಂನಿ ಸಯ್ತ್, ಭರ್ವಶ್ಯಾಚೆರ್ ಕೇಂದ್ರಿಕೃತ್ ಜಾಲ್ಲೆಂ, ಹೆರಾಂ ಥಂಯ್ ಭಿರ್ಮತ್ ಆನಿ ಜವಾಬ್ದಾರಿ ರಚುಂಕ್ ಸಕ್ಚೆ ತಸಲೆಂ; “ಹರೇಕಾ ಮನ್ಶಾಚಿ ಘನತಾ ವಳ್ಕುಂಕ್ ಆನಿ ಪೃಥ್ವಿ ಮ್ಹಳ್ಳೆಂ ಆಮ್ಚೆಂ ಘರ್ ಸಾಂಬಾಳುಂಕ್ ಸಾಂಗಾತಾ ವಾವ್ರುಂಕ್” (ದಿಲೆಕ್ಸಿತ್ ನೊಸ್, 217) ಕುಮೊಕ್ ಕರ‍್ಚೆ ತಸಲೆಂ ಸಂವಹನ್ ಆಸಾಜೆ ಮ್ಹಳ್ಳಿ ಆಶಾ ಪಾಪಾ ಫ್ರಾನ್ಸಿಸಾಚಿ.

ಭ್ರಾಂತ್ ವಾ ಭಿರಾಂತ್ ರಚಿನಾಸ್ತಾನಾ, ಭರ್ವಸುಂಕ್ ಕಾರಣಾಂ ದಿಂವ್ಚೆಂ ಸಂವಹನ್ ದೆಖುಂಕ್ ಪಾಪಾ ಆತ್ರೆಗ್ತಾ. ಮಾರ್ಟಿನ್ ಲೂಥರ್ ಕಿಂಗ್ ಮ್ಹಣ್ತಾ: “ಜರ್ ಹಾಂವ್ ಪಾಶಾರ್ ಜಾತಾನಾ ಕೊಣಾಯ್ಕೀ ಕುಮೊಕ್ ಕರುಂಕ್ ಸಕ್ತಾಂ, ಜರ್ ಮ್ಹಜ್ಯಾ ಉತ್ರಾನ್ ವಾ ಗಿತಾ ದ್ವಾರಿಂ ಕೊಣಾಯ್ಕಿ ಖುಶಿ ಕರುಂಕ್ ಸಕ್ತಾಂ,.. ತರ್ ಮ್ಹಜೆಂ ಜಿವಿತ್ ವ್ಯರ್ಥ್ ಜಾಂವ್ಚೆಂನಾ.” ಅಶೆಂ ಕರುಂಕ್, ಆಮಿ ಆಮ್ಚ್ಯಾ ಸ್ವ-ಪರ್ಗಟ್ಣೆಚ್ಯಾ ಆನಿ ಸ್ವ-ಮಗ್ನತೆಚ್ಯಾ ಪಿಡೆಂ ಥಾವ್ನ್ ಗೂಣ್ ಜಾಂವ್ಕ್ ಜಾಯ್. ತಶೆಂಚ್ ಆಮ್ಚೊ ತಾಳೊ ಆಯ್ಕಾಶೆಂ ಕರುಂಕ್ ಹೆರಾಂಚೆರ್ ಬೊಬ್ ಘಾಲ್ಚೊ ಆಪಾಯ್ ಚುಕೊಂವ್ಕ್ ಜಾಯ್.ಏಕ್ ಬರೊ ಸಂವಹನ್ಕಾರ್, ಆಪ್ಣಾಕ್ ಆಯ್ಕುಂಚಿಂ, ವಾಚ್ಚಿಂ ಆನಿ ಪಳೆಂವ್ಚಿಂ ಮಗ್ನ್ ಜಾವ್ನ್, ತಾಂಚ್ಯಾ ಜಿಣ್ಯೆಂತ್ಲೊ ಭೊವ್ ಬರೊ ವಾಂಟೊ ಸೊಧುನ್ ಕಾಡಿಶೆಂ ಕರ‍್ತಾ; ಅಸಲ್ಯಾ ಮನೋಭಾವಾನ್ ಸಾಂಗ್ಚ್ಯಾ ವಿಷಯಾಂಚ್ಯಾ ಭಿತರ್ ಸರುಂಕ್ ಕರ‍್ತಾ. ಅಶೆಂ ಸಂವಹನ್ ಕರ‍್ತಾನಾ, ಜುಬ್ಲೆವಾಚ್ಯಾ ವರ್ಸಾಚ್ಯಾ ಧ್ಯೇಯಾ ಸಾರ್ಕೆಂ “ಭರ್ವಶ್ಯಾಚಿಂ ಯಾತ್ರಿಕಾಂ” ಜಾಂವ್ಕ್ ಆಧಾರ್ ಮೆಳ್ತಾ.

ಸಾಂಗಾತಾ ಭರ್ವಸ್ಯಾಂ

ಭರ್ವಸೊ ಸದಾಂಚ್ ಏಕ್ ಸಾಮುದಾಯಿಕ್ ಯೆವ್ಜಣ್. ಹ್ಯಾ ಕುರ್ಪೆಚ್ಯಾ ವರ್ಸಾಚಿ ವ್ಹಡ್ಪಣ್ ಚಿಂತ್ಯಾಂ. ಸಗ್ಳೆಂ ಪರತ್ ಸುರ‍್ವಾತುಂಕ್, ದೆವಾಕ್ ಆಮ್ಕಾಂ ಉಕ್ಲುಂಕ್, ಆಮ್ಕಾಂ ಪೊಟ್ಲುನ್ ಧರುಂಕ್ ಆನಿ ಆಪ್ಲ್ಯಾ ಕಾಕುಳ್ತಿಚೊ ಶಿಂವರ್ ಆಮ್ಚೆರ್ ವೊತುಂಕ್ ಸೊಡ್ಚ್ಯಾಕ್ ಆಮ್ಕಾಂ ಹರೇಕ್ಲ್ಯಾಕ್ ಆಪವ್ಣೆಂ ಆಸಾ. ಹಾಂತೂನ್ ವಯುಕ್ತಿಕ್ ಆನಿ ಸಾಮೂದಾಯಿಕ್ ಸಂಗ್ತಿ ವಿಂಗಡ್ ಕರುಂಕ್ ಜಾಯ್ನಾಂತ್ ತಿತ್ಲೆ ಘಡ್ಸಲ್ಯಾತ್. ಆಮಿ ಸಾಂಗಾತಾ ಆರಂಭ್ ಕರ‍್ನ್, ಸಬಾರ್ ಭಾವ್ ಭಯ್ಣ್ಯಾಂ ಸಾಂಗಾತಾ ಚಮ್ಕಾತಾಂವ್ ಆನಿ ಸಾಂಗಾತಾ ಪವಿತ್ರ್ ದಾರ್ವಟ್ಯಾಂತ್ಲ್ಯಾನ್ ಪಾಶಾರ್ ಜಾತಾಂವ್.

ಹ್ಯಾ ಜುಬ್ಲೆವಾ ಥಾವ್ನ್ ಸಬಾರ್ ಸಾಮಾಜಿಕ್ ಪರಿಣಾಮಾಂ ಆಸಾತ್. ದಾಕ್ಲ್ಯಾಕ್, ಬಂದಿಖಾನಾಂತ್ ಆಸ್ಚ್ಯಾಂಕ್ ಮೆಳ್ಚೊ ಜುಬ್ಲೆವಾಚ್ಯಾ ಕಾಕುಳ್ತಿಚೊ ಆನಿ ಭರ್ವಶ್ಯಾಚೊ ಸಂದೇಶ್, ಆನಿ ಸಮಾಜೆಚ್ಯಾ ಮೆರಾಂನಿ ಆಸ್ಚ್ಯಾ ಆನಿ ಕಶ್ಟೊಂಚ್ಯಾ ಲೊಕಾಕ್ ಮೆಳ್ಚೊ ಮೊವಾಳಾಯೆಚೊ ಆನಿ ಆಪ್ತ್ಪಣಾಚೊ ಉಲೊ ಖಂಡಿತ್ ಆಮಿ ಚಿಂತ್ಯೆತ್. ಹೊ ಜುಬ್ಲೆವ್ “ಸಮಾಧಾನ್ ಹಾಡುಂಕ್ ವಾವುರ‍್ತಾತ್. ತಾಂಕಾಂ ದೆವಾಚಿಂ ಭುರ್ಗಿಂ ಮ್ಹಣ್ತಲೆ” ಮ್ಹಳ್ಳೆಂ ಉಗ್ಡಾಸಾಕ್ ಹಾಡ್ತಾ. ಅಶೆಂ ಆಮ್ಕಾಂ ಭರ್ವಸುಂಕ್ ಪ್ರೇರಿತ್ ಕರ‍್ತಾ, ಏಕ್ ಚೀತ್ ದೀವ್ನ್, ನಿಯಾಳುನ್ ಆನಿ ನಮ್ರತೆನ್ ಕರ‍್ಚ್ಯಾ ಸಂವಹನಾಚಿ ಗರ್ಜ್ ದಾಕಯ್ತಾ ಆನಿ ಸಂವಾದ್ ರಚುಂಕ್ ವಾಟೊ ದಾಕಯ್ತಾ. ದೆಕುನ್ ಭಾಂಗಾರ್ ಸೊದ್ಪಿ ರೆವೆಂತ್ ಬಾಂಗಾರಾಚೆಂ ಕಣ್ ಸೊದ್ತಾತ್ ತಶೆಂ, ಖಬ್ರಾಂ ಮಧೆಂ ಲಿಪೊನ್ ಆಸಲ್ಲೆ ಬರೆ ವಿಷಯ್ ಸೊದುನ್ ಪರ್ಗಟ್ ಕರುಂಕ್ ಪಾಪಾ ಹುಮೆದ್ ದಿತಾ. ಅಶೆಂ ಭರ್ವಶ್ಯಾಚೆಂ ಭಿಂ ಸೊಧುನ್ ಪರ್ಗಟ್ಚೊ ನಿಜಾಯ್ಕಿ ಬರೊ ವಿಷಯ್. ಹೆಂ ದುಬ್ಳ್ಯಾಂಚ್ಯಾ ರುದಾನಾಕ್ ಆಮ್ಚ್ಯಾ ಸಂಸಾರಾನ್ ದಾಕಂವ್ಚಿ ಬೆಪರ್ವಾ ಆನಿ ಕೆಪ್ಪೆಂಪಣ್ ಉಣೆಂ ಕರ‍್ತಾ. ಭರ್ವಸುಂಕ್ ಪ್ರೇರಿತ್ ಕರ‍್ಚೆಂ ಮಿಣ್ಮಿಣ್ಚೆಂ ಬರೆಂಪಣ್ ಆಮ್ಕಾಂ ಸದಾಂಚ್ ಮೆಳುಂ. ಅಸಲೆಂ ಸಂವಹನ್ ಎಕ್ತಾರ್ ಘಡುಂಕ್, ಎಕ್ಸುರ‍್ಪಣ್ ಉಣೆಂ ಕರುಂಕ್ ಆನಿ ಸಾಂಗಾತಾ ಚಲ್ಚೊ ಮಹತ್ವ್ ಪರತ್ ಸೊಧುಂಕ್ ಸಕ್ತಾ.

ಕಾಳಿಜ್ ವಿಸ್ರಾನಾಕಾತ್.

ತಂತ್ರಗ್ಯಾನಾಚ್ಯಾ ವಿಜ್ಮಿತ್ ಕರ‍್ಚ್ಯಾ ಸಾಧನಾಂ ಮುಕಾರ್, ಆಮ್ಚ್ಯಾ ಕಾಳ್ಜಾಚೊ ವಾ ಅಂತರಿಕ್ ಜಿಣ್ಯೆಚೊಯ್ ಹುಸ್ಕೊ ದಾಕಂವ್ಕ್ ಪಾಪಾ ಉಲೊ ದಿತಾ.

ಭೊಳಿಂ ಜಾಯಾ ಆನಿ ಹೆರಾಂಚಿಂ ಮುಕಾಮಳಾಂ ಕೆದಿಂಚ್ ವಿಸ್ರಾನಾಕಾತ್. ತುಮಿ ಸೆವಾ ಕರ‍್ಚ್ಯಾ ದಾದ್ಲ್ಯಾ – ಸ್ತ್ರಿಯಾಂಚ್ಯಾ ಕಾಳ್ಜಾ ಕಡೆನ್ ಉಲಯಾ.

ಸಂಯ್ಬಿಕ್ ಪ್ರತಿಕ್ರಿಯಾಕ್ ತುಮ್ಚೆಂ ಸಂವಹನ್ ಚಲಂವ್ಕ್ ಸೊಡಿನಾಕಾತ್. ಕಷ್ಟ್ ಆಸಾತ್ ತರೀ, ಖರ್ಚ್ ಆಸಾ ತರೀ, ನಿರ್ಫಳ್ ಜಾತಾ ಮ್ಹಣ್ ಭೊಗ್ಲ್ಯಾರೀ ಸದಾಂಚ್ ಭರ್ವಸೊ ಪಾಸಾರಾ.

ಜಶೆಂ ಏಕ್ ಫುಲ್ ಅಸ್ಕತ್ ತರೀ, ಜಿವಿತಾಂತ್ ಕಷ್ಟಾಂನಿ ಧಾಡ್ ಘಾಲ್ತಾನಾ ಸೊಡ್ನ್ ದಿನಾಸ್ತಾಂ ಫುಲ್ತಾ ಆನಿ ಕೊಣೆಂಯ್ ನಿರೀಕ್ಷಾ ಕರಿನಾತ್ಲ್ಯಾ ಜಾಗ್ಯಾಂನಿ ವಾಡ್ತಾ, ತಶೆಂ ಕಾಳ್ಜಾಥಾವ್ನ್ ಉದೆಂವ್ಚ್ಯಾ ವಿಶ್ವಾಸಾಕ್ ಆವ್ಕಾಸ್ ಕರಾ. ಹ್ಯಾಚ್ ಭರ್ವಶ್ಯಾನ್ ತ್ಯೊ ಆವಯೊ ಝುಜಾಂಚ್ಯಾ ಕಂದಕಾಂ ಥಾವ್ನ್ ಆಪ್ಲಿಂ ಭುರ್ಗಿಂ ಪಾಟಿಂ ಯೇಂವ್ಕ್ ಸದಾಂಚ್ ಮಾಗ್ತಾತ್. ಹ್ಯಾಚ್ ಭರ್ವಶ್ಯಾನ್ ತೆ ಬಾಪುಯ್ ಬರ‍್ಯಾ ಫುಡಾರಾಚ್ಯಾ ಸೊದ್ನೆರ್ ದೆಶಾಂತರಾಚೆಂ ರಿಸ್ಕ್ ಘೆತಾತ್. ಹ್ಯಾಚ್ ಭರ್ವಶ್ಯಾಂತ್ ತಿಂ ಭುರ್ಗಿಂ ಝುಜಾಚ್ಯಾ ಅವಾಶೆಷಾಂ ಆನಿ ದುಬ್ಳ್ಯಾ ಝೊಪಡ್ಪಟ್ಟ್ಯಾಂ ಮಧೆಂಯ್ ಖೆಳ್ತಾತ್, ಹಾಸ್ತಾತ್ ಆನಿ ಜಿವಿತಾಚೆರ್ ಪಾತ್ಯೆತಾತ್.

ಆಕ್ರಮಣ್ಕಾರಿ ನ್ಹಯ್ ಆಸ್ಲಲ್ಯಾ ಸಂವಹನಾಚ್ಯೊ ಸಾಕ್ಷಿ ಆನಿ ಪರ್ಗಟ್ಣಾರ್ ಜಾಯಾ. ಜತ್ನೆಚಿ ಸಂಸ್ಕೃತಿ ಪರ್ಗಟುಂಕ್, ಸಾಂಕೊವ್ ಬಾಂದುಂಕ್, ಆನಿ ಹ್ಯಾ ಕಾಳಾಚೆ ದಿಸ್ಚೆ ಆನಿ ದಿಸನಾತಲ್ಲೆದೊರೆ ಮೊಡುಂಕ್ ಕುಮೊಕ್ ಕರಾ.

ಭರ್ವಶ್ಯಾನ್ ಭರ‍್ಲಲೆ ವಿಷಯ್ ವಾ ಕಾಣಿಯೊ ಸಾಂಗಾ. ಆಮ್ಚ್ಯಾ ಎಕ್ಚ್ ಶೆವಟಾಚೆರ್ ಗುಮಾನ್ ದವರಾ ಆನಿ ಆಮ್ಚ್ಯಾ ಫುಡಾರಾಚಿ ಚರಿತ್ರಾ ಸಾಂಗಾತಾ ಬರಂವ್ಕ್ ಪ್ರೇತನ್ ಕರಾ.

ಹೆಂ ಸಗ್ಳೆಂ ತುಮಿ ಕರ‍್ಯೆತ್. ಆನಿ ಆಮಿ ಕರ‍್ಯೆತ್. ಹ್ಯಾ ಜುಬ್ಲೆವಾಚ್ಯಾ ವರ್ಸಾ ಮೆಳ್ಚ್ಯಾ ದೆವಾಚ್ಯಾ ಭರ್ಪೂರ್ ಕುರ್ಪೆನ್ ಆಮಿ ಕರ‍್ಯೆತ್.

ದೆವಾದಿನ್ ಪಾಪಾ ಫ್ರಾನ್ಸಿಸ್, 24 ಜನವರಿ 2025
ಕೊಂಕ್ಣೆಂತ್ ಸಂಕ್ಷೇಪ್: ಬಾಪ್ ಜೆ. ವಿ. ಸಿಕೇರ್, ಮಂಗ್ಳುರ್ ದಿಯೆಸೆಜ್ (ರೋಮ್)

.................................

You may also access the complete resource kit prepared for this day at:
🔗 https://www.scayogmangalore.in/resources/59th-world-day-of-social-communications

59th World Day of Social Communications aims to promote faith-based communication and our commitment to building a culture of hope and dialogue. Let us work unitedly to achieve this goal.