Articles / Special

ಸಾತ್ ಆರ್ಕ್‍ಆಂಜೆಲ್ (ಶ್ರೇಷ್ಟ್ ಭಡ್ವೆ)

Seven Archangels, from left to right: Michael, Gabriel, Uriel, Chamuel (Camael), Raphael, Jophiel and Zadkiel. Stained glass made in 1862 at St Michael and All Angels Church, Brighton, East Sussex, England. (Photo : Wikimedia Commons)

ಸಂಪ್ರದಾಯಾಂ ಪರ್ಮಾಣೆ ಮಿಂಗೆಲ್, ಗಾಬ್ರಿಯೆಲ್, ರಫಾಯೆಲ್, ಉರಿಯೆಲ್, ಸಿಯಲ್‍ತಿಯೆಲ್, ಜೆಗುದಿಯೆಲ್, ಬರಾಖಿಯೆಲ್ ಆನಿ ಜೆರಮಿಹಿಲ್ ಅಶೆಂ ಸಾತ್ ಶ್ರೇಷ್ಟ್ ಭಡ್ವ್ಯಾಂಕ್ ದೆವಾನ್ ಆಸಾ ಕೆಲೆಂ ಮ್ಹಣುನ್ ಆಮಿ ಪಾತ್ಯೆತಾಂವ್. ಪೂಣ್ ಭಾಗೆವಂತ್ ಕಥೊಲಿಕ್ ಇಗರ್ಜ್‍ಮಾತಾ ಮಿಂಗೆಲ್, ಗಾಬ್ರಿಯೆಲ್ ಆನಿ ರಫಾಯೆಲ್ ಹ್ಯಾ ತೆಗಾಂ ಶ್ರೇಷ್ಟ್ ಭಡ್ವ್ಯಾಂಕ್ ಸಾತಾಂ ಪಯ್ಕಿ ವರ್ತೆ ಆನಿ ಆಮ್ಚ್ಯಾ ಆಧಾರಾಕ್ ಗರ್ಜೆಚೆ ಮಾನ್ತಾ. ಸೆರಾಫಿ ಆನಿ ಚೆರುಬಿ ವರ್ಗಾಚ್ಯಾ ಹಜಾರ್ ಹಜಾರ್ ಆಂಜಾಂ ಮಧೆಂ ಶ್ರೇಷ್ಟ್ ಭಡ್ವೆ ದೆವಾಚಿ ಮಹಿಮಾ ವಾಡಂವ್ಕ್ ಚಡಂವ್ಕ್ ಪೆಚಾಡ್ತಾತ್ ಆನಿ ತಾಚಿ ಸ್ತುತಿ ಗಾವ್ನ್ ತಾಚಿ ಸೆವಾ ಕರ್ತಾತ್. ತಾಂಚಿ ದೇಕ್ ಘೆವ್ನ್ ತಾಂಚೆ ಸವೆಂ ಆಮ್ಚಿ ತಾಂಕ್ ಮೆಳೊವ್ನ್ ದೆವಾಚಿ ಮಹಿಮಾ ವಾಡಂವ್ಕ್ ಚಡಂವ್ಕ್ ಆಮ್ಕಾಂ ಇಗರ್ಜ್‍ಮಾತಾ ಉಲೊ ದಿತಾ.

ಮಿಂಗೆಲ್ (ಮಾಯ್ಕಲ್) ಮ್ಹಳ್ಯಾರ್ ‘ದೆವಾ ಸಾರ್ಕೊ’ ಮ್ಹಣ್ಚೊ ಅರ್ತ್. ಸಾಂತ್ ಮಿಂಗೆಲಿಕ್ ಕ್ರಿಸ್ತಾಚ್ಯಾ ಫವ್ಜಿಂಚೊ ಫುಡಾರಿ ಮಾನ್ತಾತ್ ತಾಚ್ಯಾ ಹಾತಾಂತ್ ಏಕ್ ಭಾಲೊ ಆಸಾ ಆನಿ ಲುಸಿಫೆರಾಚ್ಯಾ ಫವ್ಜಿಂಕ್ ಯಮ್ಕೊಂಡಾಕ್ ಲೊಟುನ್ ಉಡಂವ್ಕ್ ದೆವಾನ್ ತಾಕಾ ಉಲೊ ದಿಲಾ. ಆಮ್ಚ್ಯಾ ತಾಳ್ಣ್ಯಾಂ ಆನಿ ದಂಡಳ್ಣೆಂಚ್ಯಾ ಕಾಳಾರ್ ‘ಶ್ರೇಷ್ಟ್ ಭಡ್ವ್ಯಾ ಸಾಂತ್ ಮಿಂಗೆಲಿ ಆಮ್ಚ್ಯಾ ತಾಳ್ಣೆಂಚೆರ್ ಆಮ್ಕಾಂ ಜಯ್ತ್ ದಿ’ ಮ್ಹಣ್ಚೆಂ ಮಂತ್ರ್ ಆದಿಂಮಾಗಾಂ ಥಾವ್ನ್ ವಾಪಾರ್ಣೆಂತ್ ಆಸಾ. ತಾಕಾ ಹೆರೆತಿಕಾಂಕ್ ಪಾಡಾವ್ ಕರ್ನ್ ಭಾವಾಡ್ತ್ ಸಾಂಬಾಳ್ಚಿ ಸಕತ್ ಮ್ಹಣುನ್‍ಯಿ ಮಾನ್ತಾತ್.

ಗಾಬ್ರಿಯೆಲ್ ಮ್ಹಣ್ಚ್ಯಾ ನಾಂವಾಚೊ ಅರ್ತ್ ‘ದೆವಾಚಿ ಸಕತ್’ ತೊ ದೆವಾಚ್ಯಾ ಮಿಸ್ತೆರಾಂಚೊ ಸಂದೇಶ್‍ವಾಹಕ್. ದೆವಾಚಿ ಸಕತ್ ಜ್ಯಾ ಕೊಣಾಕ್ ದೆವಾನ್ ವಿಂಚ್ಲಾಂ ತಾಂಚೆ ಥಂಯ್ ಪಾವೊಂವ್ಚೆಂ ಕಾಮ್ ತೊ ಕರ್ತಾ. ತಾಚ್ಯೆ ಹಾತಿಂ ಏಕ್ ಲಾಂಪ್ಯಾಂವ್ ಆಸುನ್ ತಾಚಿ ವಾತ್ ಜಳ್ತಿ ಆಸ್ತಾ. ದಾವ್ಯಾ ಹಾತಿಂ ಪಾಜ್ಮಣಿಚೊ ಆರ್ಸೊ ತೊ ಧರ್ನ್ ಆಸ್ತಾ. ಹೊ ಲಾಂಪ್ಯಾಂವ್ ದೆವಾಚ್ಯಾ ಅಂತ್ ನಾತ್‍ಲ್ಲ್ಯಾ ಉಜ್ವಾಡಾಚೊ ಸಂಕೇತ್ ತರ್ ಆರ್ಸೊ ದೆವಾಚ್ಯಾ ಅಪರಿಮಿತ್ ಜಾಣ್ವಾಯೆಚೊ ಸಂಕೇತ್. ಆಪ್ಲೆಂ ಲಿಸಾಂವ್, ಶಿಕಪ್ ಆನಿ ಸಂಸೊದ್ ಸುರ್ವಾತ್ತಾತ್ ತೆ ‘‘ಶ್ರೇಷ್ಟ್ ಭಡ್ವ್ಯಾ ಸಾಂತ್ ಗಾಬ್ರಿಯೆಲಿ ದೆವಾಚ್ಯಾ ಜಾಣ್ವಾಯೆಚಿ ಸಕತ್ ಆನಿ ತಾಚ್ಯಾ ಉಜ್ವಾಡಾಚೆಂ ಬಳ್ ಮ್ಹಾಕಾ ಫಾವೊ ಕರ್’ ಮ್ಹಣುನ್ ಮಾಗುನ್ ಆಪ್ಲೊ ವಾವ್ರ್ ಸುರ್ವಾತ್ಚೊ ಸಂಪ್ರದಾಯ್ ಆದಿಂಮಾಗಾ ಥಾವ್ನ್ ಆಸಾ.

ರಫಾಯೆಲ್ ಮ್ಹಣ್ಚ್ಯಾ ನಾಂವಾಚೊ ಅರ್ತ್ ‘ದೇವ್ ಭಲಾಯ್ಕಿ ದಿತಾ ವಾ ದೇವ್‍ಚ್ ಆಮ್ಚಿ ಭಲಾಯ್ಕಿ’ ಮ್ಹಣುನ್ ಜಾತಾ. ತೊಬಿತಾಚ್ಯಾ ಪುಸ್ತಕಾಂತ್ ಆಮ್ಕಾಂ ರಫಾಯೆಲಿಚೆಂ ವರ್ಣನ್ ಲಾಭ್ತಾ. ಆಪ್ಲ್ಯಾ ದಾವ್ಯಾ ಹಾತಾಂತ್ ವಯ್ಜಚೆಂ ಅಲಬಸ್ತರ್ ಗುರ್ಗುಲೆತ್ ಘೆವ್ನ್ ಆಸ್ಚ್ಯಾ ರಫಾಯೆಲಿಚೆಂ ಪಿಂತುರ್ ಪಳಂವ್ಕ್ ಮೆಳ್ತಾ. ಕಠಿಣ್ ಪಿಡೆಶಿಡೆಂತ್ ಸಾಂಪ್ಡಾಲ್ಲೆ ವೆಳಿಂ ‘‘ಶ್ರೇಷ್ಟ್ ಭಡ್ವ್ಯಾ ಸಾಂತ್ ರಫಾಯೆಲಿ ದೆವಾಚ್ಯಾ ಅಪರಿಮಿತ್ ಸಕ್ತೆನ್ ಮ್ಹಜ್ಯಾ ಪಿಡೆಂತ್ಲೆಂ ಮ್ಹಾಕಾ ಭಲಾಯ್ಕೆಕ್ ಹಾಡ್’ ಮ್ಹಣ್ಚೆಂ ಮಾಗ್ಣೆ ಚಾಲ್ತೆರ್ ಆಸಾ.

ಉರಿಯೆಲ್ ಮ್ಹಳ್ಯಾರ್ ‘ದೇವ್ ಉಜ್ವಾಡ್ ವಾ ದೆವಾಚೊ ಉಜ್ವಾಡ್’ ಮ್ಹಣುನ್ ಅರ್ತ್. ತಾಚ್ಯಾ ಉಜ್ವ್ಯಾ ಹಾತಾಂತ್ ಉಸಯ್ಲಲಿ ತಲ್ವಾರ್ ಆನಿ ದಾವ್ಯಾ ಹಾತಾಂತ್ ಜಳ್ಚ್ಯಾ ಉಜ್ಯಾಚಿ ಚೂಡ್ ಆಸಾ. ಸಿಯಲ್‍ತಿಯೆಲ್ ಮ್ಹಳ್ಯಾರ್ ದೆವಾ ಥಂಯ್ ಮಧ್ಯಸ್ಥಿದಾರ್ ಮ್ಹಣುನ್ ಜಾತಾ. ತೊ ಸದಾಂನೀತ್ ಆಮ್ಚೆ ಖಾತಿರ್ ದೆವಾಲಾಗಿಂ ವಿನೊವ್ಣಿ ಕರ್ನ್ ಆಸ್ತಾ ಆನಿ ತಾಚೆ ಹಾತ್ ಹರ್ದ್ಯಾರ್ ದೊಡ್ಲೆಲೆ ಆಸಾತ್. ಜೆಗುದಿಯೆಲ್ ಮ್ಹಣ್ಜೆ ‘ದೆವಾಕ್ ಮಹಿಮಾ ಪರ್ಗಟ್ಣಾರ್’ ತಾಚ್ಯಾ ಉಜ್ವ್ಯಾ ಹಾತಾಂತ್ ಸೊನ್ಯಾಚೊ ರೀದ್ ಆಸುನ್ ದಾವ್ಯಾತ್ ತೀನ್ ಚಾಟಿಂಚೆಂ ಬೆತ್ ಆಸಾ. ಬರಾಖಿಯೆಲ್ ಮ್ಹಳ್ಯಾ ಸಬ್ದಾಚೊ ಅರ್ತ್ ‘ದೆವಾ ಥಾವ್ನ್ ಆಶೀರ್ವದಿತ್ ವಾ ದೆವಾಚೆಂ ಆಶೀರ್ವಾದ್’ ತಾಚ್ಯಾ ಹಾತಾಂನಿ ಆಮಿ ಧವ್ಯಾ ಗುಲೊಬಾಂಚೊ ಘೊಸ್ ಪಳೆತಾಂವ್. ಜೆರಮಿಹಿಲ್ ಮ್ಹಣ್ಜೆ ದೆವಾಚಿ ಊಂಚ್‍ಉಬಾರ್ಣಿ (ದೆವಾಕ್ ಘನ್‍ಮಾನ್ ಕರಪ್) ಮ್ಹಣುನ್ ಅರ್ತ್ ಜಾತಾ.

ಕೃಪಾ : ’ಸಾಂತಿಪಣಾಚ್ಯಾ ವಾಟೆರ್’
(ಸಾಂತ್‍ಭಕ್ತ್, ಮರಿ, ಶ್ರೇಷ್ಟ್ ಭಡ್ವೆ, ಪಾಪ್‍ಸಾಯ್ಬಾಂಚೊ ಆನಿ ಸದಾಂಚ್ಯಾ ಗರ್ಜೆಚ್ಯಾ ಮಾಗ್ಣ್ಯಾಂಚೊ ವಿವರ್ ಪುಸ್ತಕ್)

ಸಂಗ್ರಾಹಕ್ : ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ
ಪರ್ಗಟ್ಣಾರ್ : ಜೆ ಜೆ ಪಬ್ಲಿಕೇಶನ್ಸ್, ಮಂಗ್ಳುರ್

First Impression : December 2016