Articles / Special

ದೆವಾಚೊ ಸೆವಕ್ (ಸರ್ವೆಂಟ್ ಆಫ್ ಗಾಡ್) ಮೊನ್ಸಿಞೂರ್ ರಾಯ್ಮುಂದ್ ಫ್ರಾನ್ಸಿಸ್ ಕಾಮಿಲ್ ಮಸ್ಕರೇನ್ಹಸ್

Servant of God Raymond Francis Camillus Mascarenhas (Photo : Bethany Congregation website)

ಮಿಲಾರ್ ಮಂಗ್ಳುರ್ಚ್ಯಾ ಪಳ್ಣೀರ್ ಮಸ್ಕರೇನ್ಹಸಾಗೆಲ್ಯಾ ಕುಟ್ಮಾಚ್ಯಾ ಲಾಜರಸ್ ಮಸ್ಕರೇನ್ಹಸ್ ಆನಿ ಜುವಾನ್ನಾ ಕಾಸ್ತೆಲಿನೊಚ್ಯಾ ತೆರಾ ಭುರ್ಗ್ಯಾಂಚ್ಯಾ ವ್ಹಡ್ ಕುಟ್ಮಾಂತ್ ಸಾತ್ವೊ ಜಾವ್ನ್ 23-01-1875 ಇಸ್ವೆಂತ್ ರೇಮಂಡ್ ಜನ್ಮಾಲೊ. ದೀಸ್ ಸನ್ವಾರ್, ಮರಿಯೆಚೊ ದೀಸ್. ತ್ಯಾ ವೆಳಿಂ ತಾಚೊ ಆನ್ ಲಾಜರಸ್ ಶಿವಮೊಗ್ಗಾಂತ್ (ಶಿಮ್ಗೆಂತ್) ಸರ್ಕಾರಿ ಅಧಿಕಾರಿ ಜಾವ್ನ್ ವಾವುರ್ನ್ ಆಸ್‍ಲ್ಲೊ ಜಾಲ್ಲ್ಯಾನ್ ತಾಕಾ ಥಂಯ್ಚ್ಯಾ ಪವಿತ್ರ್ ಕಾಳ್ಜಾಚ್ಯಾ ಇಗರ್ಜೆಂತ್ ಬಾಪ್ತಿಜ್ಮ್ ದಿಲೊ. 1885 ಇಸ್ವೆಂತ್ ಮಿಲಾರ್ ಇಗರ್ಜೆಂತ್ ತಾಕಾ ಪಯ್ಲೊ ಕುಮ್ಗಾರ್ ಲಾಬ್ಲೊ.

ಭುರ್ಗ್ಯಾಪಣಾರ್‍ಚ್ ಶಿಕ್ಪಾಂತ್ ಚುರುಕ್ ಆಸ್‍ಲ್ಲ್ಯಾ ರಾಯ್ಮುಂದಾನ್ ಮಿಲಾರ್ ಇಸ್ಕೊಲಾಂತ್ ಆನಿ ಉಪ್ರಾಂತ್ ಸಾಂತ್ ಲುವಿಸ್ ಶಿಕ್ಪಾ ಸಂಸ್ಥ್ಯಾಂತ್ ಆಪ್ಲೆಂ ಲಿಸಾಂವ್ ಮುಂದರಿಲೆಂ. 1886 ಸಪ್ತೆಂಬರ್ 26 ವೆರ್ ತಾಕಾ ಬಿಸ್ಪ್ ನಿಕೊಲಸ್ ಮರಿಯಾ ಪಗಾನಿನ್ ಕ್ರಿಜ್ಮ್ ಲಾಯ್ಲೊ. 1891 ಇಸ್ವೆಂತ್ ತ್ಯಾ ಕಾಳಾಚಿ ಮೆಟ್ರಿಕುಲೇಶನ್ ಪರೀಕ್ಷಾ ಪಯ್ಲೆ ಬಸ್ಣೆಂತ್‍ಚ್ ತಾಣೆ ಪಾಸ್ ಕೆಲಿ. ತ್ಯಾ ವೆಳಿಂ ಅಸಲ್ಯೊ ಪರೀಕ್ಷಾ ಪಾಸ್ ಜಾಲ್ಲೆ ಉಂಚ್ಲ್ಯಾ ಸರ್ಕಾರಿ ಹುದ್ದ್ಯಾಂಕ್ ಆಂವ್ಡೆತಾಲೆ ತರ್ ರಾಯ್ಮುಂದ್ ದೆವಾಚ್ಯಾ ಸೆವೆಂತ್ ಆಪ್ಣಾಕ್‍ಚ್ ಖಾಲಿ ಕರುಂಕ್ ಆಶೆತಾ ಆನಿ ಸಾಂತ್ ಜುಜೆಚ್ಯಾ ಸೆಮಿನರಿಕ್ ಭರ್ತಿ ಜಾತಾ. ಏಕ್ ಸೆಮಿನರಿಸ್ತ್ ಜಾವ್ನ್ ತೊ ಭೋವ್ ಖಾಲ್ತೊ ಬೊಳೊ, ಬುಧ್ವಂತ್ ಆನಿ ಹೆರಾಂಕ್ ಸಂತುμï್ಟ ದವರ್ಚ್ಯಾಂತ್ ಎಕ್ದಮ್ ಮುಕಾರ್ ಆಸ್‍ಲ್ಲೊ ಮ್ಹಣುನ್ ಜಾಣ್ತೆ ಸಾಂಗ್ತಾತ್.

ತಾಚ್ಯಾ ಸೆಮಿನರಿ ದಿಸಾಂನಿ ‘ಆಪ್ಣಾಕ್ ಮಧುರ್ ತಾಳೊ ಆಸ್‍ಲ್ಲೊ ತರ್ ಹಾಂವ್ ಗಾಯಾನಾಂನಿ ಸರ್ವೆಸ್ಪರಾಕ್ ಹೊಗೊಳ್ಶಿತೊಂ, ಮ್ಹಾಕಾ ಮಧುರ್ ತಾಳೊ ನಾಂಮೂ ಮ್ಹಣುನ್’ ತಾಕಾ ಶಿಣ್ ಜಾಲಿ ಖಂಯ್. ನಿಮಾಣೆ ಕೊಣೆ ಎಕ್ಲ್ಯಾ ಇಷ್ಟಾಚ್ಯಾ ಸುಚನಾ ಪರ್ಮಾಣೆ ಸಾಂತ್ ಫ್ರಾನ್ಸಿಸ್ ಸಾವೆರಾಕ್ ಆಂಗೊವ್ಣ್ ಘಾಲ್ನ್ ‘ಮ್ಹಾಕಾ ಮಧುರ್ ತಾಳೊ ಯೇತ್ ತರ್ ಹಾಂವ್ ತುಜೆಂ ನಾಂವ್ ಮ್ಹಜ್ಯಾ ನಾಂವಾ ಸವೆಂ ಕುಡಯ್ತಾಂ, ಮ್ಹಜ್ಯಾ ಆಧಾರಾಕ್ ಯೇ’ ಮ್ಹಣುನ್ ಮಾಗ್ಲೆಂ ಖಂಯ್ ಆನಿ ತಾಕಾ ಕ್ರಮೇಣ್ ಮಧುರ್ ತಾಳೊ ಆಯ್ಲೊ ಅಶೆಂ ತಾಚ್ಯಾ ನಾಂವಾಂತ್ ಸಾಂತ್ ಫ್ರಾನ್ಸಿಸ್ ಸಾವೆರಾಚೆಂ ನಾಂವ್‍ಯಿ ಕುಡಾಲೆಂ, ಅಶೆಂ ಜಾಣಾರಿ ಸಾಂಗ್ತಾತ್.

ರೇಮಂಡ್ ಭೋವ್ ಆಶೆನ್ ರಾಕ್ತಲೊ ತೆ ದೀಸ್ ಆಯ್ಲೆಚ್ ತಾಕಾ 4-3-1900 ವೆರ್ ಬಿಸ್ಪ್ ಅಬುಂದಿಯಾಸ್ ಕವದೀನಿನ್ ರುಜಾಯ್ ಕಾಥೆದ್ರಲಾಂತ್ ಯಾಜಕೀ ಓಡ್ದ್ ದಿಲಿ ಆನಿ 11-03-1900 ವೆರ್ ಮಿಲಾರ್ ಇಗರ್ಜೆಂತ್ ತಾಣೆ ಪಯ್ಲೆಂ ಮೀಸ್ ಭೆಟಯ್ಲೆಂ. ಮಂಗ್ಳುರ್ ದಿಯೆಸೆಜಿಚೊ ಯಾಜಕ್ ಜಾವ್ನ್ ತಾಣೆ ಮಿಲಾರ್, ಕಲ್ಯಾಣ್‍ಪುರ್ (ಮಾಂವ್ಟ್ ರೋಜರಿ), ಕಿರ್ಯಾಂ ಸಹಾಯಕ್ ವಿಗಾರ್ ಜಾವ್ನ್ ಸೆವಾ ದಿಲಿ. ಉಪ್ರಾಂತ್ ಉದ್ಯಾವರ್, ಆಗ್ರಾರ್ ವಿಗಾರ್ ಜಾವ್ನ್ ತಾಣೆ ವರ್ತಿಂ ಕಾಮಾ ಕೆಲಿಂ. ಎಕಾ ಖರ್ಯಾ ಪ್ರವಾದ್ಯಾಪರಿಂ ಆನಿ ಎಕಾ ನೀಜ್ ಶಾಥಿವಂತ್ ಮುಕೆಲ್ಯಾಪರಿಂ ತೊ ವಾವುರ್ಲೊ. ತಾಚಿ ಶಾಥಿ ಜಾಣಾ ಜಾವ್ನ್ ವ್ಹಡಿಲಾಂನಿ ತಾಕಾ ನವ್ಯಾ ಬೆಂದುರ್ ಫಿರ್ಗಜೆಚೊ ಪಯ್ಲೊ ವಿಗಾರ್ ನೆಮ್ಲೊ. ಥಂಯ್ಸರ್ ಸತ್ರಾಂ ವರ್ಸಾಂ ತೊ ವಾವುರ್ಲೊ.

ಬೆಂದುರಾಂತ್ ಬಾಪ್ ರಾಯ್ಮುಂದಾನ್ ಅಜಾಪಾಂಚ್ ಕೆಲಿಂ. ಇಸ್ಕೊಲಾಂ, ಆಲ್ತಾರ್ ಭುರ್ಗ್ಯಾಂಚ್ಯೊ ಮಂಡಳಿ, ಸಾಂತ್ ವಿಶೆಂತ್ ಪಾವ್ಲುಚಿ ಸಭಾ ತಾಣೆ ಸುರ್ವಾತ್ಲಿ. ಹ್ಯಾ ಮಧೆಂ ದಿಯೆಸೆಜಿಚ್ಯಾ ವಾವ್ರಾಂತ್‍ಯಿ ತೊ ಕಾರ್ಯಾಳ್ ಆಸ್‍ಲ್ಲೊ. ಪ್ರೊ ಸಿನೊಡಾಲ್ ಜಡ್ಜ್, ಎಕ್ಸಾಮಿನರ್ ಜಾವ್ನ್ ಜವಾಬ್ದಾರೆನ್ ತೊ ವಾವುರ್ಲೊ ಆನಿ ನಿಮಾಣೆ ತಾಕಾ ದಿಯೆಸೆಜಿಚೊ ವಿಗಾರ್ ಜೆರಾಲ್ ನೆಮ್ಲೊ. ಕಥೊಲಿಕ್ ಎಶೊಸೀಯೇಶನ್ ಆಫ್ ಸವ್ತ್ ಕೆನರಾ, ಮೆಂಗಲೋರ್ ರೋಮನ್ ಕೆಥೊಲಿಕ್ ಪಯೋನಿಯರ್ ಫಂಡ್ ಅಸಲ್ಯಾ ಸಂಘಾಂಚ್ಯಾ ಸಂಸ್ಥಾಪನಾ ಖಾತಿರ್ ಆನಿ ತ್ಯಾ ಧ್ವಾರಿಂ ಲೊಕಾಚ್ಯಾ ಬರ್ಯಾಪಣಾ ಖಾತಿರ್ ತೊ ಪೆಚಾಡ್ಲೊ. ಕಥೊಲಿಕ್ ಶಿಕ್ಪಾ ಮಂಡಳೆಚ್ಯಾ ಸ್ಥಾಪನಾಂತ್ ಆನಿ ತಾಚ್ಯಾ ವಾಡಾವಳೆಂತ್ ತಾಚೊ ಪಾತ್ರ್ ಮಹತ್ವಾಚೊ, ಹ್ಯಾ ಧ್ವಾರಿಂ ದುಬ್ಳ್ಯಾ ಲೊಕಾಚ್ಯಾ ಶಿಕ್ಪಾ ಖಾತಿರ್ ತೊ ವಾವುರ್ಲೊ. ಲೊಕಾ ಖಾತಿರ್ ತಾಚೊ ವಾವ್ರ್ ಪಳವ್ನ್ ಮಂಗ್ಳುರ್ಚ್ಯಾ ಲೊಕಾನ್ ತಾಕಾ ಮುನ್ಸಿಪಲ್ ಸಾಂದೊ ಕೆಲೊ. ಡಿಸ್ಟ್ರಿಕ್ಟ್ ಎಜುಕೇಶನ್ ಬೋರ್ಡಾಚೊ ಸಾಂದೊ ಜಾವ್ನ್‍ಯಿ ತಾಣೆ ಸೆವಾ ದಿಲಿ.

ಲೊಕಾಚ್ಯಾ ಶಿಕ್ಪಾಕ್ ಆನಿ ಶಯ್‍ಕ್ಷಣಿಕ್ ವಾಡಾವಳಿಕ್ ಲೊಕಾಚಿ ಭಾಸ್‍ಚ್ ಸಾಧನ್ ಜಾಯ್ಜೆ ಮ್ಹಣುನ್ ಪೆಚಾಡ್‍ಲ್ಲ್ಯಾ ರಾಯ್ಮುಂದ್ ಬಾಪಾನ್ ಕೊಂಕ್ಣಿ ಆನಿ ತುಳು ಭಾಸಾಂಚ್ಯಾ ವಾಡಾವಳೆಕ್ ವರ್ತಿ ಸೆವಾ ದಿಲಿ ಮಾತ್ರ್ ನ್ಹಂಯ್ ಕೊಂಕ್ಣೆಂತ್ ವರ್ತೆಂ ಸಾಹಿತ್ ವಾಡಯ್ಲೆಂ ಲೊಕಾಮಧೆಂ ಭಕ್ತಿಪಣ್ ವಾಡೊಂವ್ಚ್ಯಾಕ್ ಸಭಾರ್ ದೆವಾಸಾಂವಾಚ್ಯೊ ಕೃತಿಯೊ ತಾಣೆ ರಚ್ಲ್ಯೊ, ಕಂತಾರಾಂ ಬರಯ್ಲಿಂ ಆನಿ ಭಾಶಾಂತರ್ ಕೆಲಿಂ ತಶೆಂಸ್ ಪವಿತ್ರ್ ಪುಸ್ತಕ್‍ಯಿ ಭಾಶಾಂತರ್ ಕೆಲೊ.

1921 ಮಾರ್ಚ್ 16 ವೆರ್ ರಾಯ್ಮುಂದ್ ಬಾಪಾಕ್ ದೆವಾನ್ ನವಿ ವಾಟ್ ದಾಕವ್ನ್ ದಿಲಿ. ಕದ್ಳೆಚಿ ಫ್ಲೋರಾ ಆನಿ ತಿಚಿ ಭಯ್ಣ್ ಆಲಿಸ್, ಕಲ್ಯಾಣ್ಪುರ್ಚಿ ಮಾರ್ಸೆಲಿನ್ ಮಿನೇಜ್ ತಶೆಂಸ್ ಕದ್ಳೆಚಿ ರೆಜಿನಾ ಗರ್ಟ್ರುಡ್ ಆಂಕ್ವಾರ್ಪಣಾ ಧ್ವಾರಿಂ ದೆವಾಚ್ಯಾ ಸೆವೆಕ್ ಪೆಚಾಡ್ತಾಲಿಂ. ತಿಂ ರಾಯ್ಮುಂದ್ ಬಾಪಾ ಥಾವ್ನ್ ಮಾರ್ಗದರ್ಶನ್ ಮಾಗುಂಕ್ ಆಯ್ಲಿಂ ತ್ಯಾ ದಿಸಾ ಥಾವ್ನ್ ತಿಂ ಬೆಂದುರ್ ಇಗರ್ಜೆ ಪಾಟ್ಲ್ಯಾ ಎಕಾ ಘರಾಂತ್ ಸಂಗಿಂ ಜಿಯೆಂವ್ಕ್ ಲಾಗ್ಲಿಂ ಆನಿ ಜುಲಾಯ್ 16, 1921 ವೆರ್ ಹ್ಯಾ ಚವ್ಗಾಂನಿ ಧಾರ್ಮಿಕ್ ಜಿವಿತಾಕ್ ಪಯ್ಲ್ಯೊ ಆಂಗವ್ಣ್ಯೊ ಕೆಲ್ಯೊ. ತ್ಯಾ ದಿಸಾ ಥಾವ್ನ್ ಬೆಥನಿಚ್ಯಾ ಲ್ಹಾನ್‍ಫುಲಾಚ್ಯಾ ಭಯ್ಣಿಂಚೊ ಧರ್ಮ್‍ಮೇಳ್ ಸುರ್ವಾತ್ಲೊ. ಬೆಥನಿ ಧರ್ಮಮೆಳಾಚ್ಯಾ ಸುರ್ವಾಯೆರ್ ಘಡ್ನಾರಾನ್ ಆನಿ ಭಯ್ಣಿಂನಿ ಸಭಾರ್ ಕಷ್ಟ್ ಸೊಸ್ಚೆ ಪಡ್ಲೆ. ತರೀ ದೆವಾಚೊ ಹಾತ್ ತಾಂಚೆ ಥಂಯ್ ಆಸ್‍ಲ್ಲೊ ತಾಚ್ಯಾ ಮುಕೆಲ್ಪಣಾಂತ್ ಸಭಾರ್ ಭಾಗಾಂನಿ ಕೊವೆಂತಾಂ ಇಸ್ಕೊಲಾಂ ಸುರ್ವಾತ್ಲಿಂ ಆಜ್ ದೆಶಾಚ್ಯಾ ಸಭಾರ್ ಭಾಗಾಂನಿ ತಾಂಚಿ ಸೆವಾ ಲಾಬುನ್ ಆಸಾ.

ತಾಚ್ಯಾ ಕಳ್ಮಿತ್ ನಾತ್‍ಲ್ಲ್ಯಾ ವಾವ್ರಾಕ್ ಮಾಂದುನ್ ಭಾಗೆವಂತ್ ಇಗರ್ಜ್‍ಮಾತೆನ್ ತಾಕಾ ಡೊಮೆಸ್ಟಿಕ್ ಪ್ರಿಲೆಟ್ ಮ್ಹಣುನ್ ಅಭಿದಾನ್ ಲಾಯ್ಲೆಂ. 1950 ತಾಚ್ಯಾ ಜಿಣ್ಯೆಚೊ ಅಮೃತೋತ್ಸವ್ (75) ಆನಿ ಯಾಜಕ್ಪಣಾಚೊ ಭಾಂಗ್ರೋತ್ಸವ್ (50) ಚಲ್ಲೊ ಆನಿ 1960 ಇಸ್ವೆಂತ್ ಯಾಜಕ್ಪಣಾಚೊ ವಜ್ರೋತ್ಸವ್ ತಾಣೆ ಸಂಭ್ರಮ್ಲೊ. 23-12-1960 ವೆರ್ ತೊ ಸಾಸ್ಣಾಕ್ ಅಂತರ್ಲೊ. ರಾಯ್ಮುಂದ್ ಬಾಪಾಚ್ಯಾ ಜಿವಿತಾ ಕಾಳಾರ್ ವರ್ತಿಂ ಸಾಧನಾ ತಾಣೆ ಕೆಲಿಂ ಮಾತ್ರ್ ನ್ಹಂಯ್ ಕ್ರಿಸ್ತಾಚೊ ಏಕ್ ಧಯ್ರಾಧಿಕ್ ಸಾಕ್ಷಿ ತೊ ಜಾವ್ನಾಸ್ಲಲೊ. 03-06-2008 ವೆರ್ ತಾಕಾ ಭಾಗೆವಂತ್ ಇಗರ್ಜ್‍ಮಾತೆನ್ ‘ದೆವಾಚೊ ಸೆವಕ್’ ಪಾಚಾರ್ಲೊ ಆನಿ ತಾಕಾ ಸಾಂತಿಪಣಾಚ್ಯಾ ಮಾನಾಕ್ ಸ್ವೀಕಾರ್ ಕರ್ಚಿ ಪ್ರಕ್ರಿಯಾ ಸುರ್ವಾತ್ಲಿ.

ದೆವಾಚೊ ಸೆವಕ್ ರಾಯ್ಮುಂದ್ ಬಾಪಾಕ್ ಆಲ್ತಾರಿಚೊ ಮಾನ್ ಮೆಳ್ಚ್ಯಾಕ್ ಮಾಗ್ಣೆ : 

ಮೊಗಾಳಾ ಬಾಪಾ, ತುಜ್ಯಾ ಸೆವಕಾ ರಾಯ್ಮುಂದ್ ಬಾಪಾಕ್ ತುಜೊ ಯಾಜಕ್ ಜಾವ್ನ್ ತುವೆಂ ವಿಂಚುನ್ ಕಾಡ್ಲೊಯ್ ಆನಿ ಜೆಜುಚ್ಯಾ ಲ್ಹಾನ್ ಫುಲಾಚ್ಯಾ ಬೆಥನಿ ಮೆಳಾಚೊ ಘಡ್ನಾರ್ ಜಾವ್ನ್ ತುವೆಂ ತಾಕಾ ನೆಮ್ಲೊಯ್. ಪವಿತ್ರ್ ಸಾಕ್ರಾಮೆಂತಾ ಥಂಯ್ ತಾಚೆಂ ವಿಶೇಸ್ ಭಕ್ತಿಪಣ್, ಪವಿತ್ರ್‍ಸಭೆಚೊ ಅಧಿಕ್ ಹುಸ್ಕೊ, ದುಬ್ಳ್ಯಾ ಆನಿ ಕಷ್ಟತಲ್ಯಾಂಕ್ ತಾಣೆ ದಾಕಯಿಲ್ಲೊ ಅಧಿಕ್ ಮೋಗ್ ಆನಿ ಸುವಾರ್ತಾ ಪರ್ಗಟ್ಣೆಚೊ ತಾಚೊ ಮಿಸಾಂವ್ ವಾವ್ರ್ ತುಜೆ ದಯೆನ್ ಫಳಾಭರಿತ್ ಜಾಲೊ. ಹ್ಯಾ ತುಜ್ಯಾ ದೆಣ್ಯಾಂ ಪಾಸತ್ ಆಮಿ ತುಕಾ ಅರ್ಗಾಂ ದಿತಾಂವ್. ತಾಚೆಂ ಆದರ್ಶ್ ಘೆವ್ನ್ ಆಮಿಂಯ್ ಮರ್ಯೆ ಮಾಯೆ ಸಂಗಿಂ ತುಜ್ಯಾ ರಾಜಾಚಿ ಬರಿ ಖಬರ್ ಪ್ರಸಾರ್ ಕರ್ಚೊ ಆಮ್ಚೊ ವಾವ್ರ್ ಸುಫಳ್ ಕರ್. ಆಮಿ ದೀನ್‍ಪಣಿ ಮಾಗ್ಚೆ ಹೆ ಉಪ್ಕಾರ್ ತುಜ್ಯಾ ಮೊಗಾಳ್ ಸೆವಕಾ ರಾಯ್ಮುಂದಾಚೆ ಮಜತಿನ್ ಆಮ್ಕಾಂ ಲಾಭಾಶೆಂ ಕರ್ (ತುಜ್ಯೊ ಗರ್ಜೊ ಸಾಂಗ್) ಬಾಪಾ ತುಜೆ ಮಹಿಮೆಕ್ ಆನಿ ಸುವಾರ್ತಾ ಪರ್ಗಟ್ಣೆ ಪಾಸತ್ ಹ್ಯಾ ತುಜ್ಯಾ ಖಾಲ್ತ್ಯಾ ಆನಿ ವಿಶ್ವಾಸಿ ಸೆವಕಾಕ್ ವೆಗಿಂಚ್ ಆಲ್ತಾರಿಚೊ ಮಾನ್ ಫಾವೊ ಕರ್ ಮ್ಹಣ್ ಆಮಿ ಮಾಗ್ತಾಂವ್ ಜೆಜುಕ್ರಿಸ್ತಾ ಆಮ್ಚ್ಯಾ ಸೊಮಿಯಾ ಮಾರಿಫಾತ್ ಆಮೆನ್. (ಆಮ್ಚ್ಯಾ ಬಾಪಾ, ನಮಾನ್ ಮರಿಯೆ, ಮಹಿಮಾ ಬಾಪಾಕ್)

ಕೃಪಾ : ’ಸಾಂತಿಪಣಾಚ್ಯಾ ವಾಟೆರ್’
(ಸಾಂತ್‍ಭಕ್ತ್, ಮರಿ, ಶ್ರೇಷ್ಟ್ ಭಡ್ವೆ, ಪಾಪ್‍ಸಾಯ್ಬಾಂಚೊ ಆನಿ ಸದಾಂಚ್ಯಾ ಗರ್ಜೆಚ್ಯಾ ಮಾಗ್ಣ್ಯಾಂಚೊ ವಿವರ್ ಪುಸ್ತಕ್)

ಸಂಗ್ರಾಹಕ್ : ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ
ಪರ್ಗಟ್ಣಾರ್ : ಜೆ ಜೆ ಪಬ್ಲಿಕೇಶನ್ಸ್, ಮಂಗ್ಳುರ್

First Impression : December 2016