Articles / Special

ಮಾನಾಪಾತ್ರ್ (ವೆನೆರೇಬಲ್) ಪಾಶಾಂವಾಚಿ ಮದರ್ ವೆರೊನಿಕಾ (1823-1906) 

Mother Mary Veronica of the Passion OCD (Photo : Wikimedia Commons)

ತೆಣ್‍ಪಡ್ಲಾ ಇಂಗ್ಲೆಂಡಾಚ್ಯಾ ಸೊಮರ್‍ಸೆಟ್‍ಶಯರಾಂತ್ಲ್ಯಾ ಆಂಗ್ಲಿಕನ್ ಪಾದ್ರಿ ಹೆನ್ರಿ ಡೇನಿಯಲ್ ಆನಿ ಮರೀನಾ ಹೊಲ್ತಯ್ನಾಕ್ 1-10-1823 ವೆರ್ ಜನ್ಮಾಲ್ಲೆಂ ಸೊಫಿ ದೆವಾಚ್ಯಾ ವಿಶೇಸ್ ಕಾಕುಳ್ತಿನ್ ಆನಿ ತಾಚ್ಯಾ ಯೋಜನಾ ಪರ್ಮಾಣೆ ಕಥೊಲಿಕ್ ಜಾವ್ನ್ ಅಪೊಸ್ತಲಿಕ್ ಕಾರ್ಮೆಲಿತ್ ಧರ್ಮ್‍ಸಭಾ ಸ್ಥಾಪುಂಕ್ ಕಾರಣ್ ಜಾಲೆಂ. ತ್ಯಾ ಆಂಗ್ಲಿಕಾನ್ ಕುಟ್ಮಾಂತ್ ಮ್ಹಾಲ್ಘಡೊ ಚೆರ್ಕೊ ಆನಿ ಉರ್‍ಲ್ಲಿಂ ತೆಗಾಂ ಚೆಡ್ವಾಂ ಭುರ್ಗಿಂ. ತಾಂಗೆರ್ ಕಾಮಾಕ್ ಆಯಿಲ್ಲ್ಯಾ ತೆರೆಜ್ ಮ್ಹಣ್ಚ್ಯಾ ಕಾಮಾಚ್ಯಾ ಚೆಡ್ವಾ ಧ್ವಾರಿಂ ಕಥೊಲಿಕ್ ಧರ್ಮಾ ತೆವ್ಶಿಂ ಸೊಫಿ ಆನಿ ಭಯ್ಣ್ ಮರಿಯಾಣ್ ಆಕರ್ಶಿತ್ ಜಾಲಿಂ ಮಾತ್ರ್ ನ್ಹಂಯ್ ನಿಮ್ಣೆ ಕಥೊಲಿಕ್‍ಯಿ ಜಾಲಿಂ.

1851 ಮಾರ್ಚಾಚ್ಯಾ 19 ತಾರ್ಕೆರ್ ಸೊಫಿ ಆನಿ ಮರಿಯಾಣ್ ಕುಟ್ಮಾಚ್ಯಾ ವಿರೋದ್ಪಣಾ ಮಧೆಂಯ್ ಸೇಂಯ್ಟ್ ಜೋಸೆಫ್ ಆಫ್ ದ ಅಪರೀಷನ್ಸ್ ಧರ್ಮ್‍ಮೆಳಾಕ್ ಭರ್ತಿ ಜಾಲಿಂ. ಹ್ಯಾ ಮೆಳಾಂತ್ ವೆರೊನಿಕಾನ್ ಶಿಕ್ಪಾ ಆನಿ ಭಲಾಯ್ಕೆ ಶೆತಾಂತ್ ವರ್ತೊ ವಾವ್ರ್ ಕೆಲೊ. 1860-61 ಇಸ್ವೆಂತ್ ಭಾರತಾಚ್ಯಾ ಕುಶಿಕ್ ಭಾಯ್ರ್‍ಸರ್‍ಲ್ಲಿ ತಿ ಕಣ್ಣೂರ್ ಪಾವ್ಲಿ. 1862 ಇಸ್ವೆಂತ್ ಮದರ್ ವೆರೋನಿಕಾ ಮಂಗ್ಳುರ್ ಪಾವ್ಲಿ ಆನಿ ಆತಾಂ ಸಾಂತ್ ಆನ್ನಾ ಸಂಸ್ಥೆ ಆಸಾತ್ ಥಂಯ್ (ಬೊಳಾರಾಂತ್) ತವಳ್ ಸೇಂಯ್ಟ್ ಜೋಸೆಫ್ ಆಫ್ ದ ಅಪರೀಷನ್ಸ್ ಧರ್ಮ್‍ಮೆಳಾಚೆಂ ಕೊಂವೆಂತ್ ಆಸ್‍ಲ್ಲೆಂ ಥಂಯ್ ವಸ್ತೆಕ್ ಲಾಗ್ಲಿ. ಹ್ಯಾ ಸಂದರ್ಭಿಂ ತಿಕಾ ಕೊಪೆಲಾಂತ್ ಮಾಗ್ಣ್ಯಾ ವೆಳಿಂ ಜೆಜು, ತಾಚಿ ಮಾತಾ ಮರಿ ಆನಿ ಸಾಂತ್ ವೆರೊನಿಕಾ ದಿಸುನ್ ‘ತುವೆಂ ಕಾರ್ಮೆಲಿತಾಂ ಸವೆಂ ಆಸಾಜೆ’ ಮ್ಹಣುನ್ ಉಲೊ ದಿಲೊ ಮ್ಹಣ್ತಾತ್. ವೆರೊನಿಕಾ ಮಂಗ್ಳುರ್ ಥಾವ್ನ್ ಕೊಯಿಕೊಡ್ (ಕ್ಯಾಲಿಕಟ್) ಗೆಲಿ. ಆನಿ ಉಪ್ರಾಂತ್ ತಿ ರಂಗೂನ್ ಗೆಲಿ.

ಹ್ಯಾ ಮಧೆಂ ತಿಕಾ ಕಾರ್ಮೆಲ್ ಧರ್ಮ್‍ಮೇಳಾಂತ್ ರಿಗ್ಚಿ ಹುಮೆದ್ ಚಡುನ್ ಆಯ್ಲಿ. ಹ್ಯಾ ಮಧೆಂ ಬಿಸ್ಪ್ ಮಾರಿ ಎಫ್ರೆಮಾನ್ ಲಾಯಿಕಾಂ ಮಧೆಂ ವಾವುರ್ಚ್ಯಾ ಕಾರ್ಮೆಲಿತ್ ಭಯ್ಣಿಂಚಿ ಗರ್ಜ್ ಆಸಾ ಮ್ಹಣುನ್ ತಿಕಾ ಕಳಯ್ಲೆಂ. ಜೊಕ್ತ್ಯಾ ನಿಯಾಳಾ ಉಪ್ರಾಂತ್ ಎದೊಳ್ ಸೇಂಯ್ಟ್ ಜೋಸೆಫ್ ಆಫ್ ದ ಅಪರೀಷನ್ಸ್ ಧರ್ಮ್‍ಮೆಳಾಚ್ಯಾ ಮಾರ್ಸೆಲಿಸ್ ನೊವಿಶಿಯೆಟಿಂತ್ ನೊವಿಸ್ ಮೆಸ್ತಿರ್ಣ್ ಜಾವ್ನ್ ಆಸ್‍ಲ್ಲಿ ವೆರೋನಿಕಾ ಆಪ್ಲ್ಯಾ ಮೊಗಾಚ್ಯಾ ನೊವಿಸ್ ಮೇರಿ ಬವಾರ್ದಿ ಸವೆಂ (ಆತಾಂ ಖುರ್ಸಾಯ್ಲಲ್ಯಾ ಜೆಜುಚಿ ಸಾಂತ್ ಮೇರಿ ಬವಾರ್ಡಿ, ಲ್ಹಾನ್ಶೆಂ ಅರಬ್) 1867 ಂತ್ ಪಾವ್‍ಚ್ಯಾ (ಪೋ) ಕಾರ್ಮೆಲ್ ಮೊಠಾಂತ್ ರಿಗ್ತಾ. ಥಂಯ್ಸರ್ಚ್ಯಾ ವ್ಹಡಿಲಾಂಚ್ಯಾ ಆನಿ ಹೆರ್ ಧಾರ್ಮಿಕ್ ಮುಕೆಲ್ಯಾಂಚ್ಯಾ ಮಾರ್ಗದರ್ಶನಾ ಪರ್ಮಾಣೆ ಲೊಕಾ ಮಧೆಂ ಸೆವೆಂತ್ ವ್ಯಸ್ತ್ ಆಸ್ಚ್ಯಾ ಕಾರ್ಮೆಲಿತಾಂಚೊ ಅಪೊಸ್ತಲಿಕ್ ಕಾರ್ಮೆಲ್ ಧರ್ಮ್‍ಮೇಳ್ ಸುರ್ವಾತ್ತಾ, ಜುಲಾಯ್ 16 1868 ವೆರ್ ಬಾಯೋನಾಂತ್ ತಾಂಚೆಂ ಪಯಿಲ್ಲೆಂ ಕೊವೆಂತ್ ಅಸ್ತಿತ್ವಾಕ್ ಯೆತಾ.

ದೆವಾಚಿಂ ಕೃತ್ಯಾಂ ವಿಚಿತ್ರ್ ಬಿಸ್ಪ್ ಮಾರಿ ಎಫ್ರೆಮ್ ಮಂಗ್ಳುರ್ಚೊ ವಿಗಾರ್ ಅಪೊಸ್ತಲಿಕ್ ಆನಿ ಉಪ್ರಾಂತ್ ಬಿಸ್ಪ್ ಜಾಲ್ಲೆ ವೆಳಿಂ ತಾಚ್ಯಾ ಆಧಾರಾನ್ ಸಾಂತ್ ಅನ್ನಾಚೆ ಸಂಸ್ಥೆ ಸೇಂಯ್ಟ್ ಜೋಸೆಫ್ ಆಫ್ ದ ಅಪರೀಷನ್ಸ್ ಧರ್ಮ್‍ಮೆಳಾ ಥಾವ್ನ್ ಆತಾಂ ಮದರ್ ವೆರೋನಿಕಾನ್ ಸುರ್ವಾತ್ಲಲ್ಯಾ ಅಪೊಸ್ತಲಿಕ್ ಧರ್ಮ್‍ಮೆಳಾ ಅಧೀನ್ ಜಾತಾತ್. ಆನಿ ತಿಚ್ಯಾ ನವ್ಯಾ ಮೆಳಾಚ್ಯೊ ತಶೆಂಸ್ ಶ್ರೇಷ್ಟ್ ಕಾರ್ಮೆಲ್ (ಜಾಂಕಾಂ ಆಮಿ ಭಿತರ್ಲ್ಯೊ ಮಾದ್ರಿ ಮ್ಹಣ್ತಾಂವ್) ಭಯ್ಣಿ ಯುರೋಪಾ ಥಾವ್ನ್ ಮಂಗ್ಳುರ್ ಯೇವ್ನ್ ಸುವಾರ್ತಾ ಪ್ರಸಾರ್, ಶಿಕ್ಷಣ್ ಆನಿ ಹೆರ್ ಸೆವೆಚೆಂ ಮಿಸಾಂವ್ ಹಾತಿಂ ಧರ್ತಾತ್. ಖುರ್ಸಾಯ್ಲಲ್ಯಾ ಜೆಜುಚಿ ಸಾಂತ್ ಮೇರಿ ಬವಾರ್ದಿಯ್ ತ್ಯಾ ವೆಳಿಂ ಮಂಗ್ಳುರಾಂತ್ (ಬೊಳಾರಾಂತ್) ವಾವ್ರಾಕ್ ಆಯ್ಲಿ ಪೂಣ್ ತಿಚ್ಯಾ ವಿಚಿತ್ರ್ ದಯ್ವಿಕ್ ಅನ್ಭವಾಂಕ್ ಸಮ್ಜುಂಕ್ ಹೆರಾಂಕ್ ಕಷ್ಟ್ ಜಾಲ್ಲ್ಯಾನ್ ತಿಕಾ ಪಾಟಿಂ ಪೋ’ಕ್ ಧಾಡ್ತಾತ್. ಮದರ್ ವೆರೊನಿಕಾ ಎಕಾ ಫಾಂಕಿವಂತ್ ಮುಕೆಲ್ಯಾಪರಿಂ ಆನಿ ಏಕ್ ಜವಾಬ್ದಾರೆಚ್ಯಾ ಆವಯ್‍ಪರಿಂ ತಾಂಚಿ ಖಬರ್ ಘೆವ್ನ್ ಆಸ್ತಾ ಆನಿ ಗರ್ಜೆಚೆಂ ಮಾರ್ಗದರ್ಶನ್ ದೀವ್ನ್ ಆಸ್ತಾ.

ಹ್ಯಾ ಮಧೆಂ ಆಪ್ಲ್ಯಾ ಅತ್ಮ್ಯಾಕ್ ಜೆಜುನ್ ದಿಂವ್ಚ್ಯಾ ಉಲ್ಯಾಕ್ ಸರಿ ಜಾವ್ನ್ ಮದರ್ ವೆರೋನಿಕಾ 1873 ಇಸ್ವೆಂತ್ ಶ್ರೇಷ್ಟ್ ಕಾರ್ಮೆಲ್ ಪಂಗ್ಡಾಕ್ ಪಾಟಿಂ ವೆತಾ ಆನಿ ಥಂಯ್ (ಪೋ) ಥಾವ್ನ್ ಪವಿತ್ರ್ ಗಾಂವಾಂನಿ (ಜೆರುಜಲ್ಯಾಂತ್ ಆನಿ ಬೆತ್ಲೆಹೆಮಾಂತ್) ಸುವಾರ್ತೆಚೆಂ ಬಳ್ ಪಾವೊಂವ್ಕ್ ವಾವ್ರಾಕ್ ವೆತಾ. ಖುರ್ಸಾಯ್ಲಲ್ಯಾ ಜೆಜುಚಿ ಸಾಂತ್ ಮೇರಿ ಬವಾರ್ದಿ ಸಯ್ತ್ ತಿಚೆ ಸವೆಂ ವೆತಾ. ಸುಮಾರ್ ತೆರಾ ವರ್ಸಾಂ ಮದರ್ ವೆರೋನಿಕಾ ಫಾಂಕಿವಂತ್ ಸೆವಾ ಆಮ್ಚ್ಯಾ ಸೊಮ್ಯಾಚ್ಯಾ ಜನ್ಮಾಗಾಂವಾಂತ್ ದಿತಾ. ನಿಮಾಣೆ 1887 ಇಸ್ವೆಂತ್ ತೀ ಪಾಟಿಂ ಪೋ’ಕ್ ವಚುನ್ ಕಾರ್ಮೆಲ್ ಶೆತಾಂತ್ ವರ್ತಿ ಸೆವಾ ದಿತಾ.

1906 ಇಸ್ವೆಚ್ಯಾ ನವೆಂಬ್ರ್ 16 ವೆರ್ ಮದರ್ ವೆರೊನಿಕಾ ಸಾಸ್ಣಾಚ್ಯಾ ವಿಶೆವಾಕ್ ಗೆಲಿ. ತಿಚ್ಯಾ ಭಾಗೆವಂತ್ಪಣಾಚ್ಯಾ ಆನಿ ಸೆವೆಚ್ಯಾ ಸ್ಪಿರಿತಾನ್ ಭರ್‍ಲ್ಲಿಂ ಅಪೊಸ್ತಲಿಕ್ ಕಾರ್ಮೆಲ್ ಭಯ್ಣಿ ಆಜ್ ಸಂಸಾರಾಚ್ಯಾ ಚಾರಾಯ್ ಕೊನ್ಶ್ಯಾಂನಿ ಕ್ರಿಸ್ತಾಕ್ ಸಾಕ್ಸ್ ದೀವ್ನ್ ಆಸಾತ್. ತಿಚ್ಯಾ ಸಾಂತ್ ಮಾಖ್ಣೆಕ್ ಜಾಯ್ ತಿ ಪ್ರಕ್ರಿಯಾ ಅಪೊಸ್ತಲಿಕ್ ಕಾರ್ಮೆಲ್ ಧರ್ಮ್‍ಭಯ್ಣಿಂನಿ 1997 ಇಸ್ವೆಂತ್ ಸುರ್ವಾತ್ಲ್ಯಾ ಆನಿ ಭಾಗೆವಂತ್ ಧರ್ಮ್‍ಸಭೆಚ್ಯಾ ಪವಿತ್ರ್ ಸದ್ರೆನ್ ಜುಲಾಯ್ 2014 ಂತ್ ತಿಕಾ ಮಾನಾಪಾತ್ರ್ ಮ್ಹಣುನ್ ನಾಂವಾಡ್ಲಾಂ.

ಮಾನಾಪಾತ್ರ್ ಮದರ್ ವೆರೋನಿಕಾಕ್ ಆಲ್ತಾರಿಚೊ ಮಾನ್ ಪಾವೊ ಕರುಂಕ್ ಆನಿ ತಿಚೆ ಮುಕಾಂತ್ರ್ ದೆವಾಚ್ಯಾ ಕುರ್ಪೆಕ್ ಮಾಗ್ಣೆ:

ಏ ಮೊಗಾಳ್ ಆನಿ ಕಾಕುಳ್ದಾರ್ ದೆವಾ, ತುಜ್ಯಾ ಚಾಕರ್ನಿ ಮದರ್ ವೆರೊನಿಕಾಚೆರ್ ತುಜಿಂ ಧಾರಾಳ್ ಕುರ್ಪೆಚಿಂ ದೆಣಿ ವೊತ್ಲಿಂಯ್ ಎಕೀನ್‍ಪಣಾನ್ ತುಜಿ ಖುಶಿ ಕರ್ಚಿ ಆನಿ ಭಾಗೆವಂತ್ಪಣಾನ್ ಜಿಯೆಂವ್ಚಿ ರೀತ್ ಪವಿತ್ರ್ ಸಭೆಕ್ ತಿಚೆಂ ಥಾವ್ನ್ ಲಾಭ್‍ಲ್ಲೆಂ ದಾಯ್ಜ್ ಜಾವ್ನಾಸಾ. ತ್ಯಾ ತುಜ್ಯಾ ಮೊಲಾಧಿಕ್ ದೆಣ್ಯಾ ಖಾತಿರ್ ಆಮಿ ತುಕಾ ಅರ್ಗಾಂ ದಿತಾಂವ್. ತುಜೊ ಲಾಗ್ಶಿಲೊ ಸಾಂಗಾತ್ ಕರುಂಕ್ ಆಶೆತಲ್ಯಾ ಆನಿ ಪೆಲ್ಯಾಚಿ ನಿಸ್ವಾರ್ತಿ ಸೆವಾ ಕರುಂಕ್ ಅಪೇಕ್ಷಿತಲ್ಯಾ ಸರ್ವಾಂಕ್ ತಿಚಿ ಜೀಣ್ ಮಾರ್ಗದರ್ಶನ್ ಜಾಂವ್ಚ್ಯಾಕ್ ತಿಕಾ ಆಲ್ತಾರಿಚೊ ಮಾನ್ ಫಾವೊ ಕರ್ ಮ್ಹಣ್ ಆಮಿ ಖಾಲ್ತೆಪಣಿ ಮಾಗ್ತಾಂವ್. ಹೊ ಉಪ್ಕಾರ್ ಜೆಜುಕ್ರಿಸ್ತ್ ಆಮ್ಚ್ಯಾ ಸೊಮ್ಯಾಚ್ಯಾ ಮಾರಿಫಾತ್ ಆನಿ ತಾಚಿ ಆವಯ್ ಕಾರ್ಮೆಲಿತಾಂಚಿ ರಾಣಿ ಜಾವ್ನಾಸ್ಚ್ಯಾ ಆಮ್ಚ್ಯಾ ಮಾಯೆ ಮರ್ಯೆಚ್ಯಾ ಮಜತಿನ್ ಆಮ್ಕಾಂ ಲಾಭೊಂದಿ. ಆಮೆನ್.

ಮೊಗಾಳ್ ಮಾನಾಪಾತ್ರ್ ಮದರ್ ವೆರೋನಿಕಾ ಮ್ಹಜೆ ಪಾಸುತ್ ದೆವಾಬಾಪಾಲಾಗಿಂ ವಿನಂತಿ ಕರ್ ಆನಿ ಇತ್ಲ್ಯಾ ಉರ್ಭೆನ್ ಹಾಂವೆಂ ಮಾಗ್ಚೊ ಹೊ ಉಪ್ಕಾರ್ (ತುಜಿ ಗರ್ಜ್ ಉಚಾರ್) ಮ್ಹಾಕಾ ಜೋಡ್ನ್ ದಿ ಆನಿ ಹ್ಯಾ ವರ್ವಿಂ ತುಜೆ ಧ್ವಾರಿಂ ದೆವಾ ಬಾಪಾಕ್ ಮಹಿಮಾ ಜಾಂವ್ದಿ ಆಮೆನ್. (ಏಕ್ ಆಮ್ಚ್ಯಾ ಬಾಪಾ... ತೀನ್ ನಮಾನ್ ಮರಿಯೆ.. ಏಕ್ ಮಹಿಮಾ ಬಾಪಾಕ್).

ಕೃಪಾ : ’ಸಾಂತಿಪಣಾಚ್ಯಾ ವಾಟೆರ್’
(ಸಾಂತ್‍ಭಕ್ತ್, ಮರಿ, ಶ್ರೇಷ್ಟ್ ಭಡ್ವೆ, ಪಾಪ್‍ಸಾಯ್ಬಾಂಚೊ ಆನಿ ಸದಾಂಚ್ಯಾ ಗರ್ಜೆಚ್ಯಾ ಮಾಗ್ಣ್ಯಾಂಚೊ ವಿವರ್ ಪುಸ್ತಕ್)

ಸಂಗ್ರಾಹಕ್ : ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ
ಪರ್ಗಟ್ಣಾರ್ : ಜೆ ಜೆ ಪಬ್ಲಿಕೇಶನ್ಸ್, ಮಂಗ್ಳುರ್

First Impression : December 2016