Articles / Special

ಸಾಂತ್ ಜುಜೆ ವಾಝ್

ಯಾದ್ : ಜನೆರ್ 16

St Joseph Vaz (Photo : Wikimedia Commons)

1651 ಇಸ್ವೆಂತ್ ಗೋಂಯ್ಚ್ಯಾ ಬೆನ್ವಲಿಂತ್ (ಬೆನ್ವಲಿಮ್) ಜನ್ಮಾಲ್ಲೊ ಪಾದ್ರುವಾದೊ ಪಂಗ್ಡಾಚೊ ಒರೆಟೋರಿಯನ್ ಪಾದ್ರಿ ಜುಜೆ ವಾಝ್ ಏಕ್ ಫಾಂಕಿವಂತ್ ಮಿಶಿಯೊನೆರಿ ಜಾವ್ನ್ ಕೆನರಾಂತ್ ಆನಿ ಶ್ರೀಲಂಕಾಂತ್ ವಾವುರ್ತಾ. ಆಜ್ ಶ್ರೀಲಂಕಾಚೊ ಮಿಶಿಯೊನೆರ್ ಮ್ಹಣುನ್‍ಂಚ್ ನಾಂವಾಡ್ಲಲೊ ಹೊ ಸಾಂತ್ ಆಮ್ಚೆ ಮಧೆಂಯ್ ವಾವುರ್ಲಾ ಮ್ಹಣ್ಚಿ ಹೆಮ್ಮ್ಯಾಚಿ ಗಜಾಲ್.

ಜುಜೆ ವಾಝ್ 1651 ಇಸ್ವೆಂತ್ ಗೋಂಯ್ಚ್ಯಾ ಬೆನೊಲಿಮಾಂತ್ ಜನ್ಮಾಲೊ. ದೆವೊತ್ ಕಥೊಲಿಕ್ ಕ್ರಿಸ್ತವಾಂವೊ ವಾಝ್ ಆನಿ ಮರಿಯಾ ದೆ ಮಿರಾಂದಾ ತಾಚಿಂ ಆವಯ್ ಬಾಪಯ್. ಸಂಕೊಳೆಂತ್ ಜುಜೆ ವಾಝಾನ್ ಆಪ್ಲೆಂ ಸುರ್ವಿಲೆಂ ಶಿಕಪ್ ಸಂಪಯ್ಲೆಂ ಆಪ್ಲ್ಯಾ ಶಿಕ್ಪಾಂತ್ ತೊ ಭೋವ್ ಶಾಣೊ ಆಸ್‍ಲ್ಲೊ ದೆಕುನ್ ತಾಕಾ ಉಂಚ್ಲ್ಯಾ ಶಿಕ್ಪಾ ಖಾತಿರ್ ಜೆಜ್ವಿತಾಂಚ್ಯಾ ಸಾಂತ್ ಪಾವ್ಲು ಕೊಲೆಜಿಕ್ ಧಾಡ್ಲೆಂ. ಥಂಯ್ಸರ್ ತಾಚಿ ಶಿಕ್ಪಾ ತಾನ್ ಪಳವ್ನ್ ತಾಕಾ ಯಾಜಕಿ ಶಿಕ್ಪಾಕ್ ತಯಾರ್ ಕೆಲೆಂ. 1675 ವ್ಯಾ ವರ್ಸಾ ತಾಕಾ ದಿಯಾಕೊನ್ ಮಾಕ್ಲೊ ಆನಿ ತಾಚಿ ಉರ್ಭಾ ಪಳವ್ನ್ ಗೊಂಯ್ಚ್ಯಾ ಆರ್ಚ್‍ಬಿಸ್ಪಾನ್ ತಾಕಾ 1676 ವ್ಯಾ ವರ್ಸಾ ಯಾಜಕೀ ದೀಕ್ಷಾ ಲಾಯ್ಲಿ. ತಾಣೆ ಸುರ್ವೆರ್ ಗೊಂಯಾಂತ್ ಸೆಮಿನರಿಸ್ತಾಂಕ್ ಲಾತೆಂ ಶಿಕಂವ್ಚೊ ವಾವ್ರ್ ಕೆಲೊ. 1677 ಇಸ್ವೆಂತ್ ‘ಆಪುಣ್ ಮರ್ಯೆಚೊ ಖಾಸ್ ಸೆವಕ್’ ಮ್ಹಣ್ಚೆಂ ಪರ್ಮಾಣ್ ತಾಣೆ ಘೆತ್ಲೆಂ.

1678 ವೆಳಾರ್ ಗೊಂಯ್ಚೊ ಆರ್ಚ್‍ಬಿಸ್ಪ್ ದೆವಾಧಿನ್ ಜಾಲ್ಲ್ಯಾನ್ ಕಾಥದ್ರಲಾಚಿ ಆಡಳ್ತ್ಯಾ ಮಂಡಳಿ ಪಾದ್ರುವಾದೊ ರಾಟಾವಳಿ ಸಾಂಬಾಳ್ತಾಲಿ (ಪಾದ್ರುವಾದೊ ಮ್ಹಣ್ಲ್ಯಾರ್ ಪುಡ್ತುಗಲಾಚ್ಯಾ ರಾಯಾಚ್ಯಾ ನಿಯಂತ್ರಣಾಖಾಲ್ ಆಸುನ್ ಧರ್ಮ್ ಪ್ರಸಾರಾಕ್ ಪಾಪಾಕ್ ಆಧಾರ್ ದಿಂವ್ಚಿ ವೆವಸ್ತಾ - ತಿಕಾ ಮುಡ್ಲಾಚ್ಯಾ ಧರ್ಮ್‍ಸಭೆಚೆರ್ ನಿಯಂತ್ರಣ್ ಆಸ್‍ಲ್ಲೆಂ). ಜುಜೆ ವಾಝಾನ್ ತಾಂಚೆ ಲಾಗಿಂ ಆಪುಣ್ ಸಿಲೊನಾಕ್ ಧರ್ಮ್‍ಪ್ರಸಾರ್ ಕಾರ್ಯಾಕ್ ವೆತಾಂ ಮ್ಹಣುನ್ ವಿನೊವ್ಣಿ ಕೆಲಿ. ಪೂಣ್ ಮಂಡಳೆನ್ ತಾಕಾ ಕೆನರಾಂತ್ ಆಸ್ಚಿ ಘುಸ್ಪಡ್ ಪರಿಹಾರ್ ಕರುಂಕ್ ತಶೆಂಸ್ ಹಾಂಗಾಸರ್ ಧರ್ಮ್‍ಪ್ರಸಾರ್ ಕರುಂಕ್ ಸುಚಯ್ಲೆಂ ಆನಿ ತಾಕಾ ಕೆನರಾಚೊ ವಿಕಾರ್ ಫೊರೇನ್ ನೆಮ್ಲೊ (ವಿಗಾರ್‍ವಾರ್) ತಶೆಂಸ್ ತಾಕಾ ‘ಕೆನರಾಚೊ ಆರ್ಸೊ’ ಮ್ಹಣ್ಚೆಂ ಅಭಿದಾನ್ ದೀವ್ನ್ ಕೆನರಾಕ್ ಧಾಡ್ಲೊ.

ತ್ಯಾ ಕಾಳಾರ್ ಕೆನರಾಂತ್ ಪ್ರೊಪಗಾಂದಾ ಫಿದೆ (ಲೊಕಾಂಮಧೆಂ ಧರ್ಮ್‍ಪ್ರಸಾರಾಕ್ ಆಸ್ಚಿ ವಾತಿಕಾನಾಚಿ/ ಶೀದಾ ಪಾಪಾಖಾಲ್ ಆಸ್ಚಿ ಮಂಡಳಿ) ಆನಿ ಪಾದ್ರುವಾದೊ ಫುಡಾರ್ಯಾಂ ಮಧೆಂ ಅಧಿಕಾರ್ ವಾಂಟ್ಯಾಫಾಂಟ್ಯಾಚ್ಯಾ ವಿಶಿಂ ಭೋವ್ ನಾಲಿಸಾಯೆಚೆಂ ತಿಕ್ಕಾಟ್ ಚಲ್ತಾಲೆಂ. ಪ್ರೊಪಗಾಂದಾ ಫಿದೆಚ್ಯಾ ಬಾಬ್ತಿನ್ ತೊಮಾಸ್ ದೆ ಕಾಸ್ತ್ರೊ ಬಿಸ್ಪ್ ಆಸ್‍ಲ್ಲೊ. ತಾಂಚೆ ಪಾಟ್ಲಾವ್ದಾರ್ ಸಭಾರ್ ಅನಾಪತ್ತಾಂ ಕಾರ್ಯಿಂ ಚಲಯ್ತಾಲೆ ತರಿ ಹ್ಯಾ ದೊಗಾಂಯ್ ವ್ಹಡಿಲಾಂನಿ ಕ್ರಿಸ್ತಾಚ್ಯಾ ಮೊವಾಳ್ ಮೊಗಾನ್ ಎಕಾಮೆಕಾ ಮ್ಹಾತ್ಭಾರ್ಪಣ್ ದಾಕಂವ್ಚೆಂ ಆಮಿ ಪಳೆತಾಂವ್. ರುಜಾಯಾಂತ್ ಆನಿ ಮಿಲಾರಾಂತ್ ಜುಜೆ ವಾಝಾಕ್ ಚಡ್ ತೇಂಪ್ ರಾವುಂಕ್ ಅವ್ಕಾಸ್ ಜಾವ್ನಾತ್ಲಲ್ಯಾನ್ ತಾಣೆ ಶಹರಾ ಭಾಯ್ರ್ ಸಭಾರ್ ಲ್ಹಾಲ್ಹಾನ್ ಭಾವಾಡ್ತ್ಯಾಂಚೆ ಪಂಗಡ್ ಬಾಂದ್ಲೆ, ಹಾಕಾ ಇರ್ಮಿದಾದ್ ಮ್ಹಣ್ತಾತ್. ಹ್ಯಾ ಇರ್ಮಿದಾದಿಂಚ್ಯಾ ಧಾರ್ಮಿಕ್ ಕಾರ್ಯಾಂ ಖಾತಿರ್ ತಾಣೆ ಇರ್ಮಿದ್ಯೊ (ಇರ್ಮಿಜ್/ಕೊಪೆಲ್) ಬಾಂದ್ಲ್ಯೊ. ಅಶೆಂ ಅನ್ವಾರಾಂಚ್ಯಾ ಕಾಳಾರ್‍ಯಿ ದೆವಾನ್ ಜುಜೆ ವಾಝಾಧ್ವಾರಿಂ ತಾಚಿ ಧರ್ಮ್‍ಸಭಾ ವಾಡುಂಕ್ ವಾಟ್ ಕೆಲಿ. ಜುಜೆ ವಾಝ್ ಕಾಸ್ತ್ರೊಕ್ ಗವ್ರವಾನ್ ದೆಕ್ತಾಲೊ ಆನಿ ಆಪುಣ್ ಪಾದ್ರುವಾದೆ ನೆಮಾಂ ಪಾಳ್ತಾಲೊ ತರಿ ಪಾಪಾಚ್ಯಾ ಪ್ರತಿನಿಧಿಕ್ ಖಾಲ್ ಜಾಲೊ. ಇಗರ್ಜ್‍ಮಾತಾ ಥಿರ್ ಆನಿ ಏಕ್ ಜಾವ್ನ್ ಉರ್ಚೆಂ ತಾಕಾ ಮಹತ್ವಾಚೆಂ ಜಾವ್ನಾಸ್ಲಲೆಂ.

ಹ್ಯಾ ಮಧೆಂ ತಾಣೆ ಮಂಗ್ಳುರ್, ಮುಡಿಪು, ಪಾಣಿರ್, ಫಜೀರ್, ಮುಲ್ಕಿ, ಗಂಗೊಳ್ಳಿ, ಹೊನ್ನಾವರ್, ಬಾರ್ಕೂರ್, ಕಲ್ಯಾಣ್ಪುರ್, ಬಸ್ರೂರ್, ರುಜಾಯ್ ಅಶೆಂ ಸಭಾರ್ ಗಾಂವಾಂನಿ ಪಾಯ್ವಾಟಿಂ ವಚುನ್ ಭಾವಾಡ್ತ್ ಪ್ರಚಾರ್ ಕೆಲಾ ಆನಿ ಸಂಪ್ರದಾಯಾಂ ಪರ್ಮಾಣೆ ಥೊಡ್ಯಾ ಜಾಗ್ಯಾಂನಿ ದೇವ್‍ತೆಂಪ್ಲಾಂಯ್ ಭಾಂದ್ಲ್ಯಾಂತ್. ಪಾಣೀರ್ ಇಗರ್ಜೆಂತ್ ವಾವುರ್ನ್ ಆಸ್ತಾನಾ ಬಂಟ್ವಾಳ್ಚ್ಯಾ ಥೊಡ್ಯಾ ಬಳ್ವಂತಾಂನಿ ತಾಕಾ ನಿಮಾಣೆ ಸಾಕ್ರಮೆಂತ್ ಮಾಗುನ್ ಪಿಡೆಸ್ತಾ ಸರ್ಶಿಂ ಆಪವ್ನ್ ವ್ಹರ್ತಾಂ ಮ್ಹಣುನ್ ಮುಡಿಪು ಗುಡ್ಯಾರ್ ತಾಕಾ ಮಾರ್ನ್ ಉಡೊಂವ್ಕ್ ಅಟ್ಟಾಣೆ ಕೆಲೆಂ, ಪೂಣ್ ತ್ಯಾ ಗುಡ್ಯಾರ್ ತಾಣೆ ಅಜಾಪಿಂ ದೆವಾಚೊ ಆಧಾರ್ ಜೊಡುನ್ ಆಪ್ಲೊ ಜೀವ್ ರಿಸ್ಕೆಂತ್ಲೊ ಸಾಲ್ವಾರ್ ಕೆಲೊ ಮ್ಹಣುನ್ ಆಮಿ ಜಾಣಾಂವ್. ತೊ ಗುಡೊ ಆತಾಂ ಏಕ್ ನಾಮ್ಣೆಚೆಂ ಪವಿತ್ರ್‍ತಳ್ ಜಾಲಾಂ. (ಜುಜೆ ವಾಝ್ ಮುಡಿಪು ಗುಡ್ಯಾರ್ ದಿಂಬ್ಯೆರ್ ಪಡುನ್ ಮಾಗುಂಕ್ ಲಾಗ್ಲೊ ಆನಿ ಘಡ್ಯೆನ್ ಏಕ್ ವ್ಹಡ್ ಉಜ್ವಾಡಾಚಿ ರಾಸ್ ಥಂಯ್ ಉಬಿ ಜಾಲಿ ಆನಿ ಜುಜೆ ವಾಝಾಚ್ಯಾ ದಿಂಬ್ಯಾಂ ಲಾಗಿಂತ್ಲ್ಯಾನ್ ಉದ್ಕಾಚೊ ವ್ಹಾಳೊಚ್ ಉಸ್ಪಾಲೊ.) ಕೆನರಾಂತ್ ಭಾವಾಡ್ತ್ ನವ್ಯಾನ್ ಜಿವೊ ಕರ್ಚ್ಯಾಕ್ ತಾಣೆ ದಿಲ್ಲ್ಯಾ ಸೆವೆಕ್ ತಾಕಾ ಮೊಗಾನ್ ಕೆನರಾಚೊ ಆಪೊಸ್ತಲ್ ಮ್ಹಣ್‍ಂಚ್ ಆಪಂವ್ಚೆಂ ಆಸಾ.

ಮುಕ್ಲ್ಯಾ ದಿಸಾಂನಿ ಗೊಂಯಾಂತ್ ಘಡ್‍ಲ್ಲ್ಯಾ ಬದ್ಲಾಪಾಂನಿ ಜುಜೆ ವಾಝಾನ್ ಪಾಟಿಂ ಗೊಂಯಾಂ ವೆಚೆಂ ಪಡ್ಲೆಂ. ತಾಣೆ ಪ್ರೊಪಗಾಂದಾ ಫಿದೆ ಸವೆಂ ರಾಜಿ ಕೆಲ್ಲ್ಯಾನ್ ಸಭಾರ್ ಕಷ್ಟ್ ಸೊಸ್ಚೆ ಪಡ್ಲೆ. ನಿಮಾಣೆ ಆಪ್ಲ್ಯಾ ಥೊಡ್ಯಾ ಸಾಂಗಾತ್ಯಾಂ ಸವೆಂ ಮೆಳುನ್ ಭಾರತಾಚೊ ಪಯಿಲ್ಲೊ ಸ್ಥಳೀಕ್ ಯಾಜಕೀ ಧರ್ಮ್‍ಮೇಳ್ ಒರೆಟೊರಿಯನ್ ಪಂಗಡ್ 25-09-1685 ವೆರ್ ತಾಣೆ ಆಸಾ ಕೆಲೊ (ಒರೆಟೊರಿಯನ್ಸ್ ಆಫ್ ಸೇಂಯ್ಟ್ ಫಿಲಿಪ್).

ಹ್ಯಾ ಮಧೆಂ ತಾಚೆ ಥಂಯ್ ಸಿಲೊನಾಂತ್ ಧರ್ಮ್‍ಪ್ರಸಾರಾಚಿ ಉರ್ಭಾ ವಾಡೊನ್‍ಂಚ್ ಯೆತಾಲಿ. ಪರ್ತ್ಯಾಂ ತಾಣೆ ಹ್ಯಾ ಬಾಬ್ತಿಂ ವ್ಹಡಿಲಾಂಚಿ ಪರ್ವಣ್ಗಿ ಮಾಗ್ಲಿ ತರಿ ತಿ ಲಾಭ್ಲಿ ನಾ. 1686 ಥಾವ್ನ್ 1687 ಪರ್ಯಾಂತ್ ಕೆನರಾಂತ್, ಇಕ್ಕೇರಿ-ಬೆದ್ನೊರಾಂತ್ ತಾಣೆ ಸೆವಾ ದಿಲಿ. ನಿಮಾಣೆ 1687 ಪಾಸ್ಕಾಂಚ್ಯಾ ಆಯ್ತಾರಾ ತೊ ಟುಟಿಕುರಿನಾಂತ್ ಪಾವ್ಲೊ. ಥಂಯ್ ಥಾವ್ನ್ ತಾಣೆ ಜಾಫ್ನಾಚಿ ವಾಟ್ ಧರ್ಲಿ. ಸಿಲೊನಾಂತ್ ಡಚ್ಚ್ ಆಡಳ್ತೆಂ ಆಸ್‍ಲ್ಲ್ಯಾನ್ ತಾಕಾ ಕಥೊಲಿಕ್ ಭಾವಾಡ್ತ್ ಪರ್ಗಟ್ಣೆಕ್ ಸಭಾರ್ ಅಡ್ಕಳಿ ಲಾಭ್ಲ್ಯೊ (ಡಚ್ಚ್ ಪ್ರೊಟೆಸ್ಟಂಟಾಂಕ್ ಪಾಟಿಂಬೊ ದಿತಾಲೆ), ತರಿ ತೊ ಭಿಯೆನಾಶೆಂ ಕ್ರಿಸ್ತಾಕ್ ಸಾಕ್ಸ್ ದೀವ್ನ್ ನಿರಂತರ್ ವಾವುರ್ಲೊ. ರಿತ್ಯಾ ಪಾಂಯಾಂನಿ ಸನ್ನೆಶಾಂಚ್ಯಾ ವೆಸಾನ್ ತೊ ಲೊಕಾಂ ಮಧೆಂ ಭಂವ್ಲೊ. ಜಾಫ್ನಾಂತ್ ಆನಿ ಪುತ್ತಲಮಾಂತ್ ವಾವುರ್ಲ್ಯಾ ಉಪ್ರಾಂತ್ 1692 ಇಸ್ವೆಂತ್ ತೊ ಕ್ಯಾಂಡಿಕ್ ಗೆಲೊ. 1697 ಂತ್ ತಾಕಾ ಸಿಲೊನಾಚೊ ವಿಗಾರ್ ಜೆರಾಲ್ ನೆಮ್ಲೊ ಆನಿ ತೆಗಾಂ ಸಹಾಯಕಾಂಕ್ ತಾಚ್ಯಾ ಸಾಂಗಾತಾಕ್ ಧಾಡ್ಲೆಂ. ಹ್ಯಾ ನಿಮ್ತಿಂ ವಿಸ್ತ್ರತ್ ಭಾವಾಡ್ತ್ ಪ್ರಚಾರ್ ಕರುಂಕ್ ತಾಕಾ ಸಾಧ್ಯ್ ಜಾಲೆಂ. ತ್ಯಾ ಉಪ್ರಾಂತ್ ತೊ ಭಟ್ಟಿಕೊಲೊವಾಕ್ ವಚುನ್ ಮಿಸಾಂವ್ ವಾವ್ರಾಕ್ ಲಾಗ್ಲೊ. ಸುಮಾರ್ 1705 ಇಸ್ವೆ ಉಪ್ರಾಂತ್ ಸಿಂಹಾಳಾಚ್ಯಾ ರಾಯಾಳ್ ಘರಾಣ್ಯಾಂಚೊ ಪಾಟಿಂಬೊ ತಾಕಾ ಲಾಬ್ಲೊ ಆನಿ ಸಭಾರ್ ಪ್ರಭಾವಿ ಘರಾಣ್ಯಾಂಕ್ ಕ್ರಿಸ್ತಾ ಥಂಯ್ ಹಾಡುಂಕ್ ತಾಕಾ ಸಾಧ್ಯ್ ಜಾಲೆಂ. ಹ್ಯಾ ಮಧೆಂ ತಾಕಾ ಸಿಲೊನಾಚ್ಯಾ ವಿಗಾರ್ ಅಪೊಸ್ತಲಿಕ್ ಆನಿ ಉಪ್ರಾಂತ್ ಸಿಲೊನಾಚ್ಯಾ ಬಿಸ್ಪಾಚ್ಯಾ ಹುದ್ದ್ಯಾಚೆ ಅವ್ಕಾಸ್ ಆಯ್ಲ್ಯಾರಿ ತಾಣೆ ತೆ ಸೊಡ್ನ್ ಭಾವಾಡ್ತ್ ಪ್ರಸಾರ್ಚ್ಯಾಕ್ ಚಡ್ತಿಕ್ ಮಹತ್ವ್ ದಿಲೊ. ಸಭಾರ್ ಇಗರ್ಜೊ ತಾಣೆ ಬಾಂದ್ಲ್ಯೊ. ತಾಚ್ಯಾ ನಿರಂತರ್ ವಾವ್ರಾನ್ ಥಕುನ್ ತಾಚಿ ಕೂಡ್ ಅಸ್ಕತ್ ಜಾಲಿ ನಿಮಾಣೆ 1711 ಇಸ್ವೆಚ್ಯಾ ಜನೆರ್ 11 ವೆರ್ ಆಪ್ಲ್ಯಾ 59 ವರ್ಸಾಂ ಪ್ರಾಯೆರ್ ತೊ ಕ್ಯಾಂಡಿಂತ್ ಅಂತರ್ಲೊ.

1737 ಇಸ್ವೆಂತ್‍ಚ್ ಭಾಗೆವಂತ್ ಬಾಪಾನ್ ತಾಕಾ ದೆವಾಚೊ ಸೆವಕ್ ಮ್ಹಣ್ ಪಾಸಾರುನ್ ತಾಕಾ ಸಾಂತ್ ಮಾಕ್ಚಿ ಪ್ರಕ್ರಿಯಾ ಸುರ್ವಾತ್ಲಿ ತರಿ ಥೊಡ್ಯಾ ಕಾರಣಾಂಕ್ ಲಾಗುನ್ ತಿ ಪಾಟಿಂ ಪಡಾತ್ ಗೆಲಿ. ತಾಚ್ಯಾ ಮಧ್ಯಸ್ಥೆನ್ ಸಭಾರ್ ಅಜಾಪಾಂ ಘಡ್ತಾಲಿಂ. 21-1-1995 ವೆರ್ ತಾಕಾ ಪಾಪಾ ಜುವಾಂವ್ ಪಾವ್ಲು ದುಸ್ರ್ಯಾನ್ ಭಾಗೆವಂತ್ ಪರ್ಗಟ್ಲೊ ಆನಿ ನಿಮಾಣೆ 14-1-2015 ವೆರ್ ಪಾಪಾ ಫ್ರಾನ್ಸಿಸಾನ್ ತಾಕಾ ಸಾಂತ್ ಪರ್ಗಟ್ಲೊ.

ಕೃಪಾ : ’ಸಾಂತಿಪಣಾಚ್ಯಾ ವಾಟೆರ್’
(ಸಾಂತ್‍ಭಕ್ತ್, ಮರಿ, ಶ್ರೇಷ್ಟ್ ಭಡ್ವೆ, ಪಾಪ್‍ಸಾಯ್ಬಾಂಚೊ ಆನಿ ಸದಾಂಚ್ಯಾ ಗರ್ಜೆಚ್ಯಾ ಮಾಗ್ಣ್ಯಾಂಚೊ ವಿವರ್ ಪುಸ್ತಕ್)

ಸಂಗ್ರಾಹಕ್ : ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ
ಪರ್ಗಟ್ಣಾರ್ : ಜೆ ಜೆ ಪಬ್ಲಿಕೇಶನ್ಸ್, ಮಂಗ್ಳುರ್

First Impression : December 2016