Articles / Special

ಸಾಂತ್ ಗೊನ್ಝಾಲೊ ಗಾರ್ಸಿಯಾ

ಯಾದ್ : ಫೆಬ್ರೆರ್ 6

Statue of St Gonsalo Garcia of Bassein, India (Photo : Wikimedia Commons)

ಭಾರತಾಂತ್ ಜನ್ಮಾಲ್ಲ್ಯಾಂ ಪಯ್ಕಿ ಪಯ್ಲೊ ಸಾಂತ್ ಮ್ಹಣುನ್ ಆಪೊವ್ನ್ ಘೆಂವ್ಚಿ ಕೀರ್ತ್ ಭಾಸ್ಸೆಯ್ನಾಂತ್ಲ್ಯಾ ಅಗಾಶಿಂತ್ ಜನ್ಮಾಲ್ಲ್ಯಾ ಫ್ರಾನ್ಸಿಸ್ಕನ್ ಸಾಂತ್ ಗೊನ್ಝಾಲೊ ಗಾರ್ಸಿಯಾಚಿ ಜಾವ್ನಾಸಾ. 1557 ಇಸ್ವೆಂತ್ ತೊ ಪುಡ್ತುಗೇಜ್ ಬಾಪಯ್ ಆನಿ ಬಾಸ್ಸೇಯ್ನ್‍ಗಾರ್ನ್ ಆವಯ್ಕ್ ಜನ್ಮಾಲೊ. ತಾಣೆ ಆಪ್ಲೆಂ ಸುರ್ವಿಲೆಂ ಶಿಕಪ್ ಬಾಸ್ಸೇಯ್ನಾಂತ್ಲ್ಯಾ ಜೆಜ್ವಿತ್ ಇಸ್ಕೊಲಾಂತ್ ಸಂಪಯ್ಲೆಂ, ಶಿಕ್ಪಾ ವೆಳಿಂ ತೊ ಸದಾಂ ಇಗರ್ಜೆಚ್ಯಾ ವಾವ್ರಾಂತ್ ವೆಸ್ತ್ ಆಸ್ತಾಲೊ. 1572 ಇಸ್ವೆಂತ್ ಆಪ್ಲ್ಯಾ ತರ್ನ್ಯಾ ಪ್ರಾಯೆರ್‍ಚ್ ತೊ ಜೆಜ್ವಿತಾಂ ಸವೆಂ ಲಾಯಿಕ್ ಸೊಡೆಲಿಸ್ತ್ ಸಾಂಗಾತಿ ಜಾವ್ನ್ ಜಪಾನಾಂತ್ ಮಿಸಾಂವ್ ವಾವ್ರಾ ಖಾತಿರ್ ಸುಟ್ಲೊ. ಥಂಯ್ಸರ್ ಏಕ್ ಫಾಂಕಿವಂತ್ ಕಾತೆಕಿಸ್ತ್ (ದೊತೊರ್ನ್ ಶಿಕವ್ಣ್‍ದಾರ್) ಜಾವ್ನ್ ತಾಣೆ ಲೊಕಾಚಿ ಸೆವಾ ಕೆಲಿ. ತಾಚೆಂ ಮಯ್ಪಾಸಿ ವರ್ತನ್ ಸರ್ವಾಂಕ್ ಆಕರ್ಶಕ್ ಜಾಲೆಂ. ತಾಕಾ ಜೆಜ್ವಿತ್ ಜಾಂವ್ಕ್ ವರ್ತೆಂ ಮನ್ ಆಸ್‍ಲ್ಲೆಂ ತರಿ ತಾಚೆಂ ಭಾರತೀಯ್ ಮೂಳ್ ಹ್ಯಾ ವಾಟೆಂತ್ ಆಡ್ ಆಯ್ಲೆಂ.

ಜೆಜ್ವಿತಾಂಚೊ ಸಾಂಗಾತ್ ಸೊಡ್ನ್ ತಾಣೆ ಅಲಕಾವೊ ಶೆರಾಕ್ ವೆಚೆಂ ಪಡ್ಲೆಂ, ಥಂಯ್ಸರ್ ತೊ ಏಕ್ ಫಾಂಕಿವಂತ್ ವರ್ತಕ್ ಜಾವ್ನ್ ಬದ್ಲಾಲೊ. ಕ್ರಮೇಣ್ ಜಪಾನಾಂತ್ ಭೋವ್ ಗ್ರೇಸ್ತ್ ವ್ಯಾಪಾರಿ ತೊ ಜಾಲೊ ತರಿ ಕ್ರಿಸ್ತಾಕ್ ಸಾಕ್ಸ್ ದೀಂವ್ಕ್ ತೊ ವಿಸ್ರೊಂಕ್‍ನಾ. ಧಾರ್ಮಿಕ್ ಜಾವ್ನ್ ಕ್ರಿಸ್ತಾಕ್ ಸಾಕ್ಸ್ ದಿಂವ್ಚಿ ಆಶಾ ತಾಚೆ ಥಂಯ್ ಜಿವಂತ್ ಆಸ್‍ಲ್ಲಿ. ನಿಮಾಣೆ ತೊ ಫಿಲಿಪಯ್ನ್ಸಾಂತ್ಲ್ಯಾ ಮನಿಲಾಂತ್ ಆಸ್ಚ್ಯಾ ಫ್ರಾನ್ಸಿಸ್ಕನಾಂಚ್ಯಾ ಧರ್ಮ್‍ಮೆಳಾಂತ್ ಭರ್ತಿ ಜಾಲೊ. ಫ್ರಾನ್ಸಿಸ್ಕನ್ ಧರ್ಮ್‍ಸಭೆಂತ್ ಏಕ್ ನಾಮ್ಣೆಚೊ ಪ್ರಸಂಗ್‍ದಾರ್ ಜಾವ್ನ್ ತಾಣೆ ನಾಂವ್ ಕೆಲೆಂ. ಸ್ಪೇಯ್ನಾನ್ ಆಪ್ಲ್ಯಾ ಫಿಲಿಪಯ್ನ್ಸ್ ವಸ್ಣುಕೆಥಾವ್ನ್ ಏಕ್ ಮಿಶಿಯೋನೆರ್ ಪಂಗಡ್ ಜಪಾನಾಕ್ ಧಾಡುಂಕ್ ಚಿಂತ್ಲೆಂ ತವಳ್ ಗಾರ್ಸಿಯಾಕ್‍ಯಿ ತಾಂತುಂ ಧಾಡ್ಲೊ. 1593 ಂತ್ ತೊ ಹಿರಾಡೊ (ಜಪಾನ್) ಪಾವ್ಲೊ. ಗಾರ್ಸಿಯಾಚಿ ಸಾಧಿ ಜೀಣ್ ಆನಿ ಕಳ್ಮಿತ್ ನಾಸ್ತಾನಾ ವಾವುರ್ಚಿ ರೀತ್, ತಾಚೊ ಮಯ್ಪಾಸಿ ಸ್ವಭಾವ್ ಜಪಾನಾಂತ್ ಕ್ರಿಸ್ತಾಕ್ ವೆಗಾನ್ ಪ್ರಸಾರ್ ಕರ್ಚ್ಯಾಂತ್ ಯಶಸ್ವಿ ಜಾಲೊ. ಸಭಾರ್ ಕುಟ್ಮಾ ಆನಿ ಮಂಥನಾಚೆ ಸಯ್ತ್ ಕ್ರಿಸ್ತಾಂವ್ ಜಾಂವ್ಕ್ ಲಾಗ್ಲೆ.

ಕ್ರಿಸ್ತಾಚೊ ಸಂದೇಶ್ ಜಪಾನಾಂತ್ ವಿಸ್ತಾರುಂಕ್ ಲಾಗ್‍ಲ್ಲೆ ಪರಿಂ ದುಸ್ಮಾನ್‍ಯಿ ಚಡುಂಕ್ ಲಾಗ್ಲೆ. ಹ್ಯಾ ಮಧೆಂ ವಿಶೇಸ್ ದುರಾದೃಷ್ಟನ್ ಮ್ಹಣ್ಚೆಪರಿಂ ಸೊನ್ಯಾರುಪ್ಯಾನ್ ಭರ್‍ಲ್ಲೆಂ ಸಾನ್‍ಫಿಲಿಪ್ಪೆ ತಾರುಂ ವಾರ್ಯಾವಾದಾಳಾಕ್ ಶಿರ್ಕುನ್ ಜಪಾನಾಚ್ಯಾ ತಡಿಕ್ ಆಪ್ಟಾಲೆಂ. ಜಪಾನೀ ಅಧಿಕಾರಿಂನಿ ತ್ಯಾ ತಾರ್ವಾಚ್ಯಾ ತಾರ್ವೊಟ್ಯಾ ಫ್ರಾನ್ಸಿಸ್ಕೋ ದೆ ಒಲಾಂದಾ ಲಾಗಿಂ ಉಲಯ್ತಾನಾ ತಾಣೆ ದಳ್ಬಾರ್ ದಾಕಯ್ಲೆಂ ಆನಿ ‘ಇಸ್ಪಾನಿಯಾಚ್ಯಾ ರಾಯಾಕ್ ಕೋಣ್‍ಂಚ್ ಮುಕಾರ್ ರಾವುಂಕ್ ಸಕಾನಾ ತಾಣೆ ಕ್ರಿಸ್ತಾಂವ್ ಧರ್ಮ್ ಸಗ್ಳ್ಯಾ ಸಂಸಾರಾಕ್ ಪಾವಯ್ಲಾ ಮಾತ್ರ್ ನ್ಹಂಯ್ ತ್ಯಾ ಸವೆಂ ಅರ್ದೊ ಸಂಸಾರ್‍ಚ್ ಆಪ್ಲ್ಯಾ ಮುಟಿರ್ ಘೆತ್ಲಾ’
ಮ್ಹಣ್ ತೊ ಹಂಕಾರ್ ಉಲಯ್ಲೊ. ಹಾಚೆ ನಿಮ್ತಿಂ ಚಿಡಾಲ್ಲ್ಯಾ ಆನಿ ಕ್ರಿಸ್ತಾಂವಾಂಚೆರ್ ದುಬಾವ್‍ಲ್ಲ್ಯಾ ಜಪಾನೀಸ್ ಅಧಿಕಾರಿಂನಿ ಸಮುರಾಯ್ ಶೊಗುನ್ ತೊಯೊತೋಮಿಚ್ಯಾ ಮುಕೇಲ್ಪಣಾರ್ ಕ್ರಿಸ್ತಾಂವಾಂಕ್ ಚಡ್ ಕರ್ನ್ ಶಿಕೊವ್ಣ್‍ದಾರಾಂಕ್ ಬಂಧೆಂತ್ ಘಾಲೊ ಆನಿ ಬಡೊಂವ್ಕ್ ಸುರ್ವಾತ್ಲೆಂ. ಗೊನ್ಝಾಲೊ ಗಾರ್ಸಿಯಾ ಆನಿ ತಾಚ್ಯಾ ಹೆರ್ ಸಾಂಗಾತ್ಯಾಂಕ್ (ತ್ಯಾ ಪಯ್ಕಿ ಪ್ರಮುಕ್ ಪೀಟರ್ ಬಾಪ್ತಿಸ್ತಾ ಆನಿ ಪಾವ್ಲು ಮಿಕಿ) ಬಂಧೆಂತ್ ಘಾಲೆಂ.

ಹ್ಯಾ ಬಂಧಿವಾನಾಂಕ್ ವಿಶೇಸ್ ಶಿಕ್ಷಾ ಲಾಂವ್ಚ್ಯಾ ಉದ್ದೇಶಾನ್ 4-1-1597 ವೆರ್ ಕ್ಯೋಟೊ ಥಾವ್ನ್ ನಾಗಾಸಾಕಿ ಸುಮಾರ್ 600 (ಸಯ್ಶಿಂ) ಮಯ್ಲಾಂ ಚಲಯ್ಲೆಂ 4-2-1597 ವೆರ್ ಗಾರ್ಸಿಯಾಕ್ ಆನಿ ತಾಚ್ಯಾ ಸಾಂಗಾತ್ಯಾಂಕ್ ನಿಶಿಗೋಕಾ ಗುಡ್ಯಾರ್ ಖುರ್ಸಾರ್ ಮಾರ್ಲೆಂ. ತಾಚೆ ಸವೆಂ ತೇಗ್ ಜೆಜ್ವಿತ್ ಆನಿ ಸುಮಾರ್ 15 ಫ್ರಾನ್ಸಿಸ್ಕನ್ ತಿಸ್ರ್ಯಾ ಒಡ್ದಿಚೆ ಚೆರ್ಕೆ ಆಸ್‍ಲ್ಲೆ. ತಾಂಕಾಂ ಖುರ್ಸಾರ್ ಮಾರ್ಲ್ಯಾ ಉಪ್ರಾಂತ್ ತಾಂಚ್ಯಾ ಕಡ್ವಳಾಕ್ ಭಾಲಿಯೊ ತೊಪುನ್ ತಾಂಕಾಂ ಜಿವೆಶಿಂ ಮಾರ್ಲೆಂ.

ಹ್ಯಾ ಮಾಡ್ತಿರ್ಪಣಾಚ್ಯಾ ಥೊಡ್ಯಾಚ್ ತೆಂಪಾನ್ ನಾಗಾಸಾಕಿ ಆನಿ ಭೊಂವಾರಿಂ ಸಭಾರ್ ಅಜಾಪಾಂ ಘಡುಂಕ್ ಲಾಗ್ಲಿಂ ಆನಿ ಖುಣಾ ದಿಸುಂಕ್ ಲಾಗ್ಲಿಂ ಜಪಾನಾಚೆರ್ ಚಡ್ ಆನಿ ಚಡ್ ಪರಿಣಾಮ್ ಜಾಲೊ. 1627 ಇಸ್ವೆಂತ್ ಪಾಪಾ ಉರ್ಬಾನ್ ಆಟ್ವ್ಯಾನ್ ಗಾರ್ಸಿಯಾ ಆನಿ ತಾಚ್ಯಾ ಸಾಂಗಾತ್ಯಾಂಕ್ ಭಾಗೆವಂತ್ ಪಾಸಾರ್ಲೆಂ. ಸುಮಾರ್ 200 ವರ್ಸಾಂ ಉಪ್ರಾಂತ್ 8-6-1862 ವೆರ್ ಪಾಪಾ ಪಿಯುಸ್ ಬಾರಾವ್ಯಾನ್ ತಾಕಾ ಆನಿ ತಾಚ್ಯಾ ಸಾಂಗಾತ್ಯಾಂಕ್ ಸಾಂತಿಪಣಾಚೊ ಕುರೊವ್ ದಿಲೊ ಹ್ಯಾ ನಿಮ್ತಿಂ ತೊ ಭಾರತಾಚೊ ಪಯ್ಲೊ ಭಾರತೀಯ್ ಸಾಂತ್ ಜಾಲೊ.

ಕೃಪಾ : ’ಸಾಂತಿಪಣಾಚ್ಯಾ ವಾಟೆರ್’
(ಸಾಂತ್‍ಭಕ್ತ್, ಮರಿ, ಶ್ರೇಷ್ಟ್ ಭಡ್ವೆ, ಪಾಪ್‍ಸಾಯ್ಬಾಂಚೊ ಆನಿ ಸದಾಂಚ್ಯಾ ಗರ್ಜೆಚ್ಯಾ ಮಾಗ್ಣ್ಯಾಂಚೊ ವಿವರ್ ಪುಸ್ತಕ್)

ಸಂಗ್ರಾಹಕ್ : ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ
ಪರ್ಗಟ್ಣಾರ್ : ಜೆ ಜೆ ಪಬ್ಲಿಕೇಶನ್ಸ್, ಮಂಗ್ಳುರ್

First Impression : December 2016