Articles / Special

ಸಾಂತ್ ಜುವಾಂವ್ ದೆ’ಬ್ರಿತ್ (ಜಾನ್ ದೆ ಬ್ರಿಟ್ಟೊ)

ಯಾದ್ : ಫೆಬ್ರೆರ್ 4

John de Britto (Photo : Public Domain)

ಪುಡ್ತುಗಲಾಚ್ಯಾ ಲಿಸ್ಬನಾಂತ್ ಜನ್ಮಾಲ್ಲೊ ಜುವಾಂವ್ ದೆ’ಬ್ರಿತ್ ಅರುಳಾನಂದರ್ ಮ್ಹಣ್ಚ್ಯಾ ಮೊಠ್ವಾಸಿ ನಾಂವಾನ್ ತೆನ್ಕಾ ಇಂಡಿಯಾಂತ್ ನಾಮ್ಣೆಚೊ ಜಾಲೊ. ಇಂಡಿಯಾಂತ್ ತಾಣೆ ಕ್ರಿಸ್ತಾಕ್ ಲೊಕಾ ಮಧೆಂ ಪಾವೊಂವ್ಚ್ಯಾಂತ್ ದಾಕಯಿಲ್ಲ್ಯಾ ಧಯ್ರಾಧಿಕ್‍ಪಣಾ ಖಾತಿರ್ ಇಂಡಿಯಾಚೊ ಜುವಾಂವ್ ಬಾಪ್ತಿಸ್ತ್ ಮ್ಹಣುನ್‍ಂಚ್ ತಾಕಾ ನಾಂವ್ ಪಡ್ಲಾಂ. ತಾಕಾ ಪುಡ್ತುಗೆಜಾ ಥಾವ್ನ್ ಆಯಿಲ್ಲೊ ಸಾಂತ್ ಫ್ರಾನ್ಸಿಸ್ ಸಾವೆರ್ ಮ್ಹಣ್ಚೆಂಯ್ ಆಸಾ. ಪುಡ್ತುಗೆಜಾಚ್ಯಾ ಗ್ರೇಸ್ತ್ ಕುಟ್ಮಾಂತ್ 1-3-1647 ವೆರ್ ತಾಚೊ ಜನ್ಮ್ ಜಾಲೊ. ತಾಚೊ ಬಾಪಯ್ ಸಾಲ್ವಾದೊರ್ ದೆ’ಬ್ರಿತ್ ಪಿರೇರಾ ಬ್ರೆಜಿಲಾಚೊ ವಯ್ಸ್‍ರಾಯ್ ಜಾವ್ನಾಸ್‍ಲ್ಲೊ.

1662 ಇಸ್ವೆಂತ್ ತೊ ಕೊಯಿಂಬ್ರಾ ವಿಶ್ವವಿದ್ಯಾಲಯಾಂತ್ ಶಿಕುನ್ ಆಸ್ತಾನಾ ಜೆಜುಚ್ಯಾ ಸಭೆಕ್ ಭರ್ತಿ ಜಾಲೊ. ತಾಣಿ ತಾಕಾ 1673 ಇಸ್ವೆಂತ್ ಮಧುರೆ (ತಮಿಳ್ನಾಡ್) ಮಿಸಾಂವ್ ವಾವ್ರಾಕ್ ಧಾಡ್ಲೊ. ಹಾಂಗಾಸರ್ ಆಯಿಲ್ಲೆಂಚ್ ತಾಣೆ ಭಾರತೀಯ್ ಲೊಕಾಂಕ್ ಆಕರ್ಶಣ್ ಕರ್ಚೆ ಖಾತಿರ್ ‘ಅರುಳ’ ಮ್ಹಣ್ಚೆಂ ನಾಂವ್ ಘೆತ್ಲೆಂ ಆನಿ ಮರವರ್ ವರ್ಗಾಚ್ಯಾ ಲೊಕಾಸವೆಂ ವಾವ್ರ್ ಸುರ್ವಾತ್ಲೊ. 1687 ಇಸ್ವೆಂತ್ ತಾಕಾ ಆನಂದರ್ ಮ್ಹಣ್ಚ್ಯಾ ರಾಯಾನ್ ಬಂಧಿಂತ್ ಘಾಲೊ, ತೊ ಲಿಸ್ಬನಾಕ್ ಪಾಟಿಂ ಪರ್ತಾಲೊ ತರಿ 1690 ಇಸ್ವೆಂತ್ 24 ಸಾಂಗಾತ್ಯಾಂ ಸವೆಂ ಪರ್ತ್ಯಾಂ ಇಂಡಿಯಾಕ್ ಪಾಟಿಂ ಆಯ್ಲೊ ಆನಿ ಸುವಾರ್ತಾ ಪರ್ಗಟುಂಕ್ ಲಾಗ್ಲೊ. ಸಾದ್ಯಾ ಲೊಕಾಕ್ ಸಲೀಸಾಯೆನ್ ದೊತೊರ್ನ್ ಸಮ್ಜುಂಚೆ ಖಾತಿರ್ ಸೊಂಪ್ಯಾ ಭಾಶೆಚೆ ಆನಿ ಚಿಂತ್ಪಾಂಚೆ ದೊತೊರ್ನೆ ಪುಸ್ತಕ್ ತಾಣೆ ತಯಾರ್ ಕೆಲೆ. ಎಕಾ ಮೊಠ್ವಾಶ್ಯಾ ಪರಿಂ ದೇಶಿ ಮುಸ್ತಾಯ್ಕಿ ತೊ ನ್ಹೆಸ್ತಾಲೊ, ಸೊಂಪೆಂ ರಾಂದ್ವಯೆ ಜೆವಣ್ ತೊ ಜೆವ್ತಾಲೊ. ಮಾಸ್ ಮಾಸ್ಳಿ ಆನಿ ತಸಲೆಂ ಸರ್ವ್ ತಾಣೆ ತಿರಸ್ಕಾರ್ ಕೆಲೆಂ.

ಜುವಾಂವ್ ದೆ’ಬ್ರಿತಾಚ್ಯಾ ಶಿಕವ್ಣೆಕ್ ಲಾಗುನ್ ಸಭಾರ್ ಮರವಾರ್ ಲೋಕ್ ಕ್ರಿಸ್ತಾ ಥಂಯ್ ಆಯ್ಲೆ. ರಾಯ್ ತಡಿಯತೇವನ್ ಕನ್ವಡ್ತರ್ ಜಾಲೊ ಆನಿ ಹ್ಯಾ ವೆಳಾ ದೆ’ಬ್ರಿತಾಚ್ಯಾ ಶಿಕವ್ಣೆಕ್ ಲಾಗುನ್ ತಾಣೆ ತಾಚ್ಯಾ ಮ್ಹಾಲ್ಘಡ್ಯಾ ರಾಣಿಯೆಕ್ ಮಾತ್ರ್ ಆಪ್ಣಾಸವೆಂ ದವರ್ನ್ ಘೆತ್ಲೆಂ ಆನಿ ಹೆರ್ ಸರ್ವ್ ರಾಣಿಯಾಂಕ್ ಸೊಡ್ಲೆಂ. ಅಶೆಂ ಸೊಡ್‍ಲ್ಲ್ಯಾ ರಾಣಿಯಾಂ ಪಯ್ಕಿ ಎಕ್ಲೆಚೊ ಮಾವ್ಳೊ ಶೆಜಾರ್ಚೊ ಬಳ್ವಂತ್ ರಾಯ್ ಜಾವ್ನಾಸ್‍ಲ್ಲೊ. ತಾಣೆ ಆಪ್ಲ್ಯಾ ಭಾಚಿಯೆಕ್ ಜಾಲ್ಲೊ ಅಕ್ಮಾನ್ ತಿರ್ಸುಂಕ್ ಕ್ರಿಸ್ತಾಂವಾಂಚೆರ್ ಮೊಡ್ತ್ ಮಾರ್ಲಿ ಆನಿ ಹಜಾರೊ ಕ್ರಿಸ್ತಾಂವಾಂಕ್ ಮಾರ್ನ್ ಕಾಡ್ಲೆಂ. ದೆ’ಬ್ರಿತಾಕ್ ರಮಾನಾಡ್ ವೋಡ್ನ್‍ವೆಲೊ ಆನಿ ಥಂಯ್ಸರ್ 4-2-1693 ವೆರ್ ಮಾರ್ನ್ ಕಾಡ್ಲೊ.

ಅಶೆಂ ಕ್ರಿಸ್ತಾ ಖಾತಿರ್ ಆನಿ ತಾಚ್ಯಾ ಇಗರ್ಜ್‍ಮಾತೆ ಖಾತಿರ್ ಮಾಡ್ತಿರ್ ಮೆಲ್ಲ್ಯಾ ದೆ’ಬ್ರಿತಾಕ್ 21-08-1853 ವೆರ್ ಪಾಪಾ ಪಿಯುಸ್ ನೊವ್ಯಾನ್ ಭಾಗೆವಂತ್ ಪಾಸಾರ್ಲೊ ಆನಿ 22-06-1947 ವೆರ್ ಪಾಪಾ ಪಿಯುಸ್ ಬಾರಾವ್ಯಾನ್ ತಾಕಾ ಸಾಂತಾಂಚೊ ಮುಕುಟ್ ದಿಲೊ. ಸಾಂತ್ ಜುವಾಂವ್ ದೆ’ಬ್ರಿತಾಚ್ಯಾ ಮಾಡ್ತಿರ್ಪಣಾಚ್ಯಾ ಜಾಗ್ಯಾರ್ ದರ್ಯಾತಡಿರ್ ತಾಂಬ್ಡಿ ರೇಂವ್ ಆಸಾ ಆನಿ ತಿ ಸಾಂತಾಚ್ಯಾ ರಗ್ತಾನ್ ತಾಂಬ್ಡಿ ಜಾಲ್ಯಾ ಮ್ಹಣುನ್ ಪ್ರತೀತ್ ಆಸಾ. ದಿಂಡಿಗಲ್, ನಾಗಪಟ್ಟಣಮ್ ಆನಿ ತೆನ್ಕಾ ತಮಿಳ್‍ನಾಡಾಂತ್ಲ್ಯಾ ಲೊಕಾಕ್ ದೆ’ಬ್ರಿತ್ ಭೋವ್ ಮೊಗಾಚೊ ಸಾಂತ್ ಜಾವ್ನಾಸಾ.

ಕೃಪಾ : ’ಸಾಂತಿಪಣಾಚ್ಯಾ ವಾಟೆರ್’
(ಸಾಂತ್‍ಭಕ್ತ್, ಮರಿ, ಶ್ರೇಷ್ಟ್ ಭಡ್ವೆ, ಪಾಪ್‍ಸಾಯ್ಬಾಂಚೊ ಆನಿ ಸದಾಂಚ್ಯಾ ಗರ್ಜೆಚ್ಯಾ ಮಾಗ್ಣ್ಯಾಂಚೊ ವಿವರ್ ಪುಸ್ತಕ್)

ಸಂಗ್ರಾಹಕ್ : ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ
ಪರ್ಗಟ್ಣಾರ್ : ಜೆ ಜೆ ಪಬ್ಲಿಕೇಶನ್ಸ್, ಮಂಗ್ಳುರ್

First Impression : December 2016