Articles / Special

ಲಾಯಿಕ್ ಭಾವಾಡ್ತ್ಯಾಂಚೊ ಆಯ್ತಾರ್ (27.06.2021) ಆಚರಣ್ ಕರ್ಚ್ಯಾ ಸಂದರ್ಭಿಂ ಲಾಯಿಕಾಂಚ್ಯಾ ಮಿಸಾಂವಾವಿಶಿಂ ದೋನ್ ಉತ್ರಾಂ ವಾಂಟುನ್ ಘೆಂವ್ಕ್ ಆಶೆತಾಂ. ಪಾಟ್ಲ್ಯಾ ಎಕಾ ವರ್ಸಾಥಾವ್ನ್ ಲಾಯಿಕಾಂಚೊ ಆನಿ ಧಾರ್ಮಿಕಾಂಚೊ ಸಂಬಂಧ್, ಸಳಾವಳ್ ಉಣೊ ಜಾಲ್ಲೆಪರಿಂ ಭೊಗ್ತಾ? ಸತ್ ಗಜಾಲ್ ಕಿತೆಂ ಮ್ಹಳ್ಯಾರ್ ಲಾಯಿಕ್ ಭಾವಾಡ್ತಿ ಮುಕೆಲಿ ಪವಿತ್ರ್ ಸಭೆಚ್ಯಾ, ಸೊಮ್ಯಾಚ್ಯಾ ವಾವ್ರಾಂತ್ ಪಯ್ಲ್ಯಾ ಪಂಗ್ತಿರ್ ಪಾವ್ಲ್ಯಾತ್. ಆಜ್ ಆಮ್ಚೆ ಲಾಯಿಕ್ ‘Frontline Corona Warriors’ ಜಾವ್ನ್ ಪಿಡೆ ವಿರೋಧ್ ಜೀವ್ ರಿಸ್ಕೆರ್ ಘಾಲ್ನ್ ಝುಜ್ ಮಾಂಡಿತ್ ಆಸಾತ್. ‘ಹಿಂದೂಸ್ಥಾನ್ ಟೈಮ್ಸ್’ ಪ್ರಕಾರ್ ಪಾಟ್ಲ್ಯಾ ಎಕಾ ವರ್ಸಾಥಾವ್ನ್ 11 ಮಿಲ್ಲಿಯಾ ಕೊವಿಡ್ ಝುಜಾರಿ 24x7 ಸೆವಾ ದೀವ್ನ್ ಆಸಾತ್.

ಏಕ್ ವರ್ದೆ ಪ್ರಕಾರ್ ಮಂಗ್ಳುರಾಂತ್ ಸುಮಾರ್ 65 ಎನ್‍ಜಿಒ, 8 ಮೆಡಿಕಲ್ ಕೊಲೆಜ್ ಆಸ್ಪತ್ರ್ಯೊ ಆನಿ ಸಭಾರ್ ದಾಕ್ಟ್ಯೊ ವ್ಹಡ್ಲ್ಯೊ ಆಸ್ಪತ್ರ್ಯೊ, 100 ವಯ್ರ್ ಸರ್ಕಾರಿ ಭಲಾಯ್ಕೆ ಕೇಂದ್ರಾಂ ಕೊರೊನಾ ಪಿಡೆ ಖಾತಿರ್ ಸೆವಾ ದಿತಾತ್. ಮಂಗ್ಳುರ್ ದಿಯೆಸೆಜ್ ‘Covid Task Force’ ರಚುನ್ ಫಾ| ಮುಲ್ಲರ್ಸ್ ಕಂಕ್ನಾಡಿ, ದೇರಳಕಟ್ಟೆ, ತುಂಬೆ ಸಾಂಗಾತಾಚ್ ಬಜ್ಪೆ, ಬದ್ಯಾರ್, ಪುತ್ತೂರ್, ಕಿನ್ನಿಗೋಳಿ, ಅಲಂಗಾರ್ ಆಸ್ಪತ್ರ್ಯಾಂನಿ 24 x 7 ಸೆವಾ ದಿತೆಚ್ ಆಸಾತ್. ಹ್ಯಾ ಸರ್ವ್ ಶೆತಾಂನಿ, ಲಾಯಿಕ್, ದಾಕ್ತೆರ್, ನರ್ಸ್, ವಾರ್ಡ್ ಕುಮ್ಕೆದಾರಾಂ, ನಿತಳಾಯೆ ವಾವ್ರಾಡಿ, ಆಂಬುಲೆನ್ಸ್ ಡ್ರಾಯ್ವರ್, ಪಯ್ಲ್ಯಾ ಪಂಗ್ತಿರ್ ಆಸಾತ್. ಹಾಂಚೆ ಸವೆಂ ಕಥೊಲಿಕ್ ಸಭೆಚೆ ಆನಿ ಐಸಿವಯ್‍ಎಮ್ ಸಾಂದೆ, ಫಿರ್ಗಜೆಂತ್ ಯಾಜಕಾಂಚ್ಯಾ ಆನಿ ಧಾರ್ಮಿಕಾಂಚ್ಯಾ ಮಾರ್ಗದರ್ಶನಾಖಾಲ್ ಲಾಯಿಕ್ ಭಾವ್-ಭಯ್ಣಿಂ ಹಾತಾಕ್ ಹಾತ್ ದೀವ್ನ್ ವಾವ್ರ್ ಕರಿತ್ ಆಸಾತ್.

ಕೊವಿಡ್ ಪಿಡೆಸ್ತಾಂಕ್ ಆಮ್ಚ್ಯಾ ಸಿಮಿಸ್ತ್ರೆಂತ್ ನಿಕೆಪುಂಕ್ ದುಬಾವ್ ಆನಿ ಭ್ಯೆಂ ಆಸ್‍ಲ್ಲ್ಯಾ ವೆಳಾರ್ ಆಮ್ಚೆ ಲಾಯಿಕ್ ಭಾವ್ ಮರಣ್ ನಿರ್ವಹಣ್ ಕರ್ತಲ್ಯಾಂಕ್ ಸಾಂಗಾತಾ ಹಾಡುನ್, ತಾಂಕಾಂ ತರ್ಭೆತಿ ದೀವ್ನ್ ಭಿರಾಂತೆವಿಣ್ ಸರ್ವ್ ಧಾರ್ಮಿಕ್ ವಿಧಿ ನಿಯಾಮಾಂ ಪರ್ಮಾಣೆಂ ಮಾತ್ಯೆಕ್ ಪಾವವ್ಯೆತ್ ಮ್ಹಳ್ಳೆಂ ಚಿಂತಪ್ ದೀಂವ್ಕ್ ಸಕ್ಲ್ಯಾತ್.

ಆದ್ಲ್ಯಾ ವರ್ಸಾ ಚೆನ್ನಯ್‍ಂತ್ ಡಾ| ಸಾಯ್ಮನ್ ‘ನೀವ್ ಹೋಪ್’ ಆಸ್ಪತ್ರೆಚೊ ಮ್ಯಾನೇಜಿಂಗ್ ಡಾಯ್ರೆಕ್ಟರ್ ಕೊವಿಡ್ ಪಿಡೆಂತ್ ಸೆವಾ ದೀವ್ನ್, ತೆಚ್ ಪಿಡೆಂತ್ ಮರಣ್ ಪಾವ್ಲೊ. ತಾಕಾ ನಿಕೆಪುಂಕ್ ಸಿಮೆಸ್ತ್ರಿಕ್ ವ್ಹರ್ತಾನಾ, ಸಿಮೆಸ್ತ್ರೆಂತ್ ಮಾತ್ಯೆಕ್ ಪಾಂವ್ಕ್ ನಜೊ ಮ್ಹಣ್ ಸುಮಾರ್ ಶೆಂಭೊರ್ ಜಣಾಂನಿ ತೊಣ್ಕೆ, ದಾಂಡೆ ಘೆವ್ನ್ ಆಂಬುಲೆನ್ಸ್ ಡ್ರಾಯ್ವರಾಂಚೆರ್, ಸಾಂಗಾತ್ಯಾ ದಾಕ್ತೆರಾಂಚೆರ್ ಹಲ್ಲೊ ಕೆಲೊ ಮ್ಹಣ್ತಾ ಸಾಂಗಾತಿ ದಾಕ್ತೆರ್ ಪ್ರದೀಪ್.

ಭಾರತೀಯ್ ವಯ್ಜಕೀಯ್ ಸಂಸ್ಥ್ಯಾ (IMA- ಇಂಡಿಯನ್ ಮೆಡಿಕಲ್ ಅಸೋಸಿಯೇಶನ್) ಪ್ರಕಾರ್ ಎದೊಳ್‍ಚ್ 747 ದಾಕ್ತೆರಾಂನಿ, 116 ನರ್ಸಾಂನಿ, 199 ಭಲಾಯ್ಕೆ ಶೆತಾಂತ್ ವಾವುರ್ಚ್ಯಾ ಕಾಮೆಲ್ಯಾಂನಿ ತಾಂಚೊ ಜೀವ್ ದಿಲಾ. ಕರ್ನಾಟಕಾ ಎಕಾ ರಾಜ್ಯಾಂತ್‍ಚ್ ಶಿಕ್ಷಣ್ ಶೆತಾಂತ್ ವಾವುರ್ಚ್ಯಾ 130 ಶಿಕ್ಷಕಾಂನಿ ತಾಂಚೊ ಜೀವ್ ಅರ್ಪಿಲಾ. ಕೊವಿಡ್ ಪಿಡೆಸ್ತಾಂಚಿ ಸೆವಾ ಕರ್ತಲ್ಯಾಂ ವಿಶಿಂ ಪಾಪಾ ಫ್ರಾನ್ಸಿಸ್ “ಹ್ಯಾ ಕಾಳಾರ್ ಮ್ಹಜ್ಯಾ ಸೆಜಾರಿ ದಾರಾರ್ ಏಕ್ ಸಾಂತ್ ಜಾಲಾ” ಮ್ಹಣ್ತಾ. ತೊ ಮುಂದರುನ್ ಸಾಂಗ್ತಾ, “ಕೊವಿಡ್ ಪಿಡಾ ನಿವಾರುಂಕ್ ದಾಕ್ತೆರ್, ನರ್ಸ್, ಸ್ವಯಂಸೇವಕ್, ರೆಲಿಜಿಯೊಸ್ ಭಯ್ಣಿಂ, ಯಾಜಕ್, ದುಖಾನಾಂತ್ ವಾವ್ರ್ ಕರ್ಚೆ ಆಜ್ ತೆ ಸರ್ವ್ ‘ವೀರ್ ಜಯ್ತೆವಂತ್’ ಜಾಲ್ಯಾತ್.”

ದುಸ್ರಿ ವಾತಿಕಾನ್ ವಿಶ್ವಸಭಾ ಲಾಯಿಕ್ ಭಾವಾಡ್ತ್ಯಾಂಕ್ ಪವಿತ್ರ್ ಸ್ನಾನಾಂತ್ ತಿದೊಡೆಂ ಮಿಸಾಂವ್ ಲಾಭ್ಲಾಂ ಮ್ಹಣ್ ಉಲ್ಲೇಕ್ ಕರ್ತಾ. ಸೊಮ್ಯಾಥಂಯ್ ತೆ ಯಾಜಕ್, ಪ್ರವಾದಿ ಆನಿ ರಾಯ್, ಆಜ್ ಆಮ್ಚೆ ಲಾಯಿಕ್ ಸೊಮ್ಯಾಸವೆಂ ಹೆಂ ಮಿಸಾಂವ್ ಜಿಯೆವ್ನ್ ಆಸಾತ್. ತಾಂಚ್ಯಾ ಕುಟ್ಮಾಚ್ಯಾ ಮಾಗ್ಣ್ಯಾ ಸವೆಂ ಯಾಜಕ್ಪಣಾಚೆಂ, ಭಿಯಾವಿಣೆಂ ಕ್ರಿಸ್ತಾಕ್ ಸಾಕ್ಸ್ ದಿಂವ್ಚ್ಯಾಂತ್ ಪ್ರವಾದ್ಪಣಾಚೆಂ ಆನಿ ನಿಸ್ವಾರ್ಥ್‍ಪಣಿಂ ರಾಯಾನ್ ಪರ್ಜೆಕ್ ದಿಂವ್ಚ್ಯಾ ಸೆವೆಚೆಂ ಮಿಸಾಂವ್ ತೆ ತಾಂಚ್ಯಾ ಭಾವಾ ಭಯ್ಣಿಂಸವೆಂ ಚಲವ್ನ್ ಆಸಾತ್. ಆಪ್ಲೊ ಜೀವ್ ರಿಸ್ಕೆರ್ ಘಾಲ್ನ್ ಮುಕಾರ್ ಸರ್ಚ್ಯಾ ‘Frontline Covid Warriors’ ಲಾಯಿಕ್ ಭಾವಾ ಭಯ್ಣಿಂಕ್ ಆಮ್ಚೆ ನಮಾನ್. ಲಾಯಿಕಾಂಚೊ ಪಾತ್ರೊನ್ ಸಾಂತ್ ತೊಮಾಸ್ ಮೋರ್ ಲಾಯಿಕಾಂಕ್ ತಾಂಚ್ಯಾ ಮಿಸಾಂವಾಂತ್ ಪ್ರೇರಣ್ ಜಾಂವ್.

ಮಾ| ಬಾ| ಜೆ ಬಿ ಕ್ರಾಸ್ತಾ
ಕಾರ್ಯದರ್ಶಿ
ಲಾಯಿಕ್ ಭಾವಾಡ್ತ್ಯಾಂಚೊ ಆಯೋಗ್, ಮಂಗ್ಳುರ್ ದಿಯೆಸೆಜ್