Articles / Special

Article published in Raknno, March 5 - 11, 2021

ಪ್ರಾಚಿತ್ ಕಾಳಾಕ್ ಚಿಂತಪ್ - 5

ಜೆಜುಕ್ ಅನ್ನಾಸಾ ಆನಿ ಕೈಫಾಸಾಚ್ಯಾ ಘರಾಂತ್ ಪಿಲಾತಾಚ್ಯಾ ಆನಿ ಹೆರೊದಿಚ್ಯಾ ರಾವ್ಳೆರಾಂತ್ ತನ್ಖಿ ಜಾಲ್ಲಿ. ತಾಚೆರ್ ತಾಣಿಂ ಎಕಾ ಪಾಟ್ಲ್ಯಾನ್ ಏಕ್ ಆರೊಪ್ ಮಾಂಡ್‍ಲ್ಲೊ. ಜುದೆವಾಂಚ್ಯಾ ರಾಬ್ಬನಿಕ್ ಕಾನುನಾ ಪರ್ಮಾಣೆಂ ಅಪ್ರಾಧ್ಯಾ ವಯ್ರ್ ಮಾಂಡ್‍ಲ್ಲೆ ಆರೊಪ್ ಸ್ಪಷ್ಟ್ ಆಸುನ್ ಏಕ್ ಆರೊಪ್ ಇತ್ಯರ್ಥ್ ಕೆಲ್ಲ್ಯಾ ಉಪ್ರಾಂತ್ ಆನ್ಯೆಕ್ ಆರೊಪ್ ಘೆಂವ್ಚಿ ರೀತ್ ಆಸ್‍ಲ್ಲಿ. ವಿಶೇಸ್ ಕಿತೆಂಗಿ ಮ್ಹಳ್ಯಾರ್ ಜೆಜುಚೆರ್ ಮಾಂಡ್‍ಲ್ಲೆ ಕ್ರಿಮಿನಲ್ ಆರೊಪ್ ಇತ್ಯರ್ಥ್ ಕರಿಜೆ ತರ್ ಸಬಾರ್ ಹಫ್ತೆ ಪುಣಿ ಜಾಯ್ ಆಸ್‍ಲ್ಲೆ. ಪೂಣ್ ಸಗ್ಳೆ ಆರೊಪ್ 9 ಘಂಟ್ಯಾಂ ಭಿತರ್ ಮುಗ್ದುನ್ ಸೊಡ್ಲ್ಯಾತ್. ಆನಿ ಹೆ ಸಗ್ಳೆ ಆರೊಪ್ ಗುಟಾನ್ ಆನಿ ಖಾಸ್ಗಿ ಥರಾನ್ ಮುಗ್ದಿಲ್ಯಾತ್. ಜುದೆವಾಂಚ್ಯಾ ಕಾನುನಾ ಪರ್ಮಾಣೆಂ, ದೋಗ್ ಸಾಕ್ಷಿ ಮುಕಾರ್ ಅಪ್ರಾಧ್ ರುಜು ಜಾಲ್ಯಾರ್ ಮಾತ್ರ್ ಶಿಕ್ಷಾ ಜಾತಾಲಿ. ಜೆಜು ವಯ್ರ್ ಮಾಂಡ್‍ಲ್ಲ್ಯಾ ಪ್ರಕರಣಾಕ್ ಎಕ್‍ಯಿ ಸಾಕ್ಷಿ ತಾಳ್ ಪಡ್ಲ್ಯೊ ನಾಂತ್. ಖಾಸ್ಗಿ ಘರಾಂತ್ ಆನಿ ರಾವ್ಳೆರಾಂತ್ ವಿಚಾರ್ ಕೆಲ್ಲೊ ಕಾನುನಾ ವಿರೊಧ್ ಜಾವ್ನ್ ಆಸ್‍ಲ್ಲೊ.

ಫಟ್ಕಿರೆ ಅಪ್ರಾಧ್ ಜೆಜುಚೆರ್ ಹಾಡ್‍ಲ್ಲೆ ಆನಿ ಖಂಯ್ಚ್ಯೊಯ್ ದೋನ್ ಸಾಕ್ಷಿ ನಾಸ್ತಾನಾ ಆರೊಪ್ ಏಕ್ ಪಕ್ಷೀಯ್ ಜಾವ್ನ್ ತೀರ್ಮಾನ್ ಕೆಲೊ. ಜೆಜುಚೆರ್ ಮಾಂಡ್‍ಲ್ಲೊ ಏಕ್‍ಚ್ ಏಕ್ ಆರೋಪ್ ರುಜು ಕರುಂಕ್ ತಾಂಕಾಂ ಜಾಂವ್ಕ್ ನಾ. ತವಳ್ ಪ್ರಧಾನ್ ಯಾಜಕ್ ಆನಿ ಸಗ್ಳಿ ಸಾನೆದ್ರಿನ್ ಸಭಾ ಜೆಜುಕ್ ಮರ್ಣಾಚೆಂ ಫರ್ಮಾಣ್ ದಿಂವ್ಚ್ಯೆ ಖಾತಿರ್ ಖಂಯ್ಚಿಯ್ ಏಕ್ ಸಾಕ್ಸ್ ಮೆಳತ್‍ಗಾಯ್ ಮ್ಹಣ್ ಸೊದ್ತಾಲಿ, ಪೂಣ್ ಏಕ್‍ಯಿ ತಾಂಕಾಂ ಮೆಳ್ಳಿ ನಾ. ಸಬಾರ್ ಜಣ್ ಮುಕಾರ್ ಯೆವ್ನ್ ತಾಚ್ಯೆ ವಿರೊಧ್ ಫಟ್ ಸಾಕ್ಸ್ ಸಾಂಗಿಲಾಗ್ಲೆ, ಪೂಣ್ ತಾಂಚೆ ಸಾಕ್ಷಿಂಕ್ ಎಕಾಮೆಕಾ ತಾಳ್ ಪಡ್ಲೆಂನಾ. ಶೆಕಿಂ ಥೊಡೆ ಜಣ್ ಉಟ್ಲೆ ಆನಿ ತಾಚೆರ್ ಫಟ್ ಫಿರ್ಯಾದ್ ಮಾಂಡುನ್ ಮ್ಹಣಾಲೆ: “ಹಾತಾಂನಿ ಬಾಂದ್‍ಲ್ಲೆಂ ಹೆಂ ದೆವಾಳ್ ಹಾಂವ್ ಮೊಡ್ತಲೊಂ ಆನಿ ಹಾತಾಂನಿ ನಾತ್‍ಲ್ಲೆಂ ಆನ್ಯೆಕ್ ದೆವಾಳ್ ತಿನ್‍ಚ್ ದಿಸಾಂನಿ ಹಾಂವ್ ಉಬಾರ್ತಲೊಂ’ ಮ್ಹಣ್ ಹ್ಯಾ ಮನ್ಶಾನ್ ಮ್ಹಳ್ಳೆಂ ಆಮಿ ಆಯ್ಕಲಾಂ.” (ಮಾರ್ಕ್ 14:55-59) ತಶೆಂ ಜಾಲ್ಯಾರ್‍ಯಿ ತಾಂಚ್ಯೆ ಸಾಕ್ಷಿಂಕ್ ಎಕಾಮೆಕಾ ತಾಳ್ ಪಡ್ಲೆಂನಾ.

ಪಯ್ಲೊ ಆರೊಪ್ : ಧಾರ್ಮಿಕ್ ಮುಖೆಲ್ಯಾಂನಿ ಮುಕಾರ್ ಹಾಡ್‍ಲ್ಲೆ ಕಾಯ್ದೆಶಿರ್ ಆರೋಪ್ (indictment) ಹಾಕಾ ಸಾಕ್ಷಿ ಲಾಬ್ಲೆನಾಂತ್. ಜೆಜುನ್ ‘ಹಾತಾಂನಿ ಬಾಂದ್‍ಲ್ಲೆಂ ಹೆಂ ದೆವಾಳ್’ ಮ್ಹಳ್ಳೆಂ ತೆಂ ಹೆರೊದಿನ್ ಬಾಂದ್‍ಲ್ಲ್ಯಾ ದೆವಾಳಾ ವಿಶಿಂ ನ್ಹಯ್. ಬಗರ್ ತಾಚ್ಯಾಚ್ ಕುಡಿ ವಿಶಿಂ. ತೊ ಮ್ಹಣ್ತಾ “ಹಾತಾಂನಿ ಬಾಂದ್‍ಲ್ಲೆಂ ಹೆಂ ದೆವಾಳ್ ಹಾಂವ್ ಮೊಡ್ತಲೊಂ ಆನಿ ಹಾತಾಂನಿ ಬಾಂದುಂಕ್ ನಾತ್ಲಲೆಂ ಆನ್ಯೆಕ್ ದೆವಾಳ್ ತಿನ್‍ಂಚ್ ದಿಸಾಂನಿ ಹಾಂವ್ ಉಬಾರ್ತಲೊಂ”. (ಮಾರ್ಕ್ 14:56) ವಾಂಜೆಲಿಸ್ತ್ ಜುವಾಂವ್ ಜೆಜುಚಿಂ ಉತ್ರಾಂ ಸ್ಪಷ್ಟ್ ಬರಯ್ತಾ. ಹೆಂ ದೆವಾಳ್ ತುಮಿ ಮೊಡ್ನ್ ಘಾಲಾ ಆನಿ ತೀನ್ ದಿಸಾಂನಿ ಹಾಂವ್ ತೆಂ ಪತ್ರ್ಯಾನ್ ಉಬಾರ್ತಲೊಂ. (ಜುವಾಂವ್ 2:19,21) ಜೆಜು ತಾಚ್ಯಾ ಜಿವಂತ್ಪಣಾ ವಿಶಿಂ ತಾಚ್ಯೆಚ್ ಕುಡಿ ವಿಶಿಂ ಉಲಯ್ತಲೊ.

ದುಸ್ರೊ ಆರೊಪ್ : ಶ್ರೇಷ್ಟ್ ಯಾಜಕಾನ್ ತಾಚ್ಯೆ ಲಾಗಿಂ ಮ್ಹಳೆಂ: ಜಿವಂತ್ ದೆವಾಚ್ಯೆ ನಾಂವಿಂ ಸಪುತ್ ಘಾಲ್ನ್ ಹಾಂವ್ ತುಕಾ ವಿಚಾರ್ತಾಂ; ಸಾಂಗ್ ತುಂ ಕ್ರಿಸ್ತ್ ದೆವಾಚೊ ಪೂತ್ ವ್ಹಯ್ ಮ್ಹಣುನ್. ಜೆಜುನ್ ತಾಕಾ ಜಾಪ್ ದಿಲಿ; “ತೆಂ ತುಂಚ್ ಸಾಂಗ್ತಾಯ್”. “ಹ್ಯಾ ಶಿವಾಯ್ ಹಾಂವ್ ತುಮ್ಕಾಂ ಸಾಂಗ್ತಾಂ: ಹ್ಯಾ ಫುಡಾಂ ಮನ್ಶಾಪುತಾಕ್ ಸರ್ವ್ ಪದ್ವೆದಾರ್ ದೆವಾಚ್ಯಾ ಉಜ್ವ್ಯಾಕ್ ಬಸುನ್ ಆಸ್ಲಲೊ ತುಮಿ ಪಳೆತಲ್ಯಾತ್.” ತಿತ್ಲ್ಯಾರ್ ಶ್ರೇಷ್ಟ್ ಯಾಜಕ್ ಆಪ್ಲೆಂ ಆಂಗ್ ವಸ್ತುರ್ ಪಿಂಜುನ್ ಮ್ಹಣಾಲೊ: ಹಿ ದೇವ್ ನಿಂದಾಚ್ ಸಯ್! ಆನಿ ಆಮ್ಕಾಂ ಸಾಕ್ಷಿಂಚಿ ಗರ್ಜ್ ಕಿತೆಂ? ತಾಣೆಂ ಕೆಲ್ಲಿ ದೇವ್ ನಿಂದಾ ಆತಾಂಚ್ ಆಯ್ಕಲಿ. ಆತಾಂ ತುಮ್ಚ್ಯೊ ಅಭಿಪ್ರಾಯ್ ಕಿತೆಂ? ತಾಣಿಂ ಜಾಪ್ ದಿಲಿ: ತಾಕಾ ಮರಣ್ ಫಾವೊ” (ಮಾತೆವ್ 26:63-66)

ಹಾಂಗಾಸರ್ ಮಾರ್ಕ್ 14:63 ಆನಿ ಮಾತೆವ್ 26:65 ಬರಯ್ತಾತ್, ಶ್ರೇಷ್ಟ್ ಯಾಜಕಾನ್ ಆಪ್ಲೆಂ ವಯ್ಲೆಂ ವಸ್ತುರ್ ಪಿಂಜ್ಲೆಂ. ಲೆವಿಶಾಸ್ತ್ರ್ ಸಾಂಗ್ತಾ “ಆಪ್ಲ್ಯಾ ಭಾವಾಂ ಯಾಜಕಾಂ ಮಧ್ಲ್ಯಾ ಪ್ರಧಾನ್ ಯಾಜಕಾನ್, ತಾಚ್ಯಾ ಮಾತ್ಯಾರ್ ಅಭಿಶೆಕಾಚೆಂ ತೆಲ್ ವೊತ್ಲಾಂ ಆನಿ ಜಾಕಾ ಮುಸ್ತಾಯ್ಕಿ ನ್ಹೆಸೊವ್ನ್ ದಿಕ್ಷಿತ್ ಕೆಲಾಂ, ಆಪ್ಲೆ ಕೇಸ್ ಉಗಯ್ನಾಸ್ತಾಂ ಸೊಡ್ಚೆ ನ್ಹಯ್ ವಾ ಆಪ್ಲಿ ಮುಸ್ತಾಯ್ಕಿ ಪಿಂಜ್ಚಿ ನ್ಹಯ್” (ಲೆವಿಶಾಸ್ತ್ರ್ 21:10 ಆನಿ 10:6). ಆಂಗ್ ವಸ್ತುರ್ ಪಿಂಜ್‍ಲ್ಲೆಂ ಕಾನುನಾ ವಿರೊಧ್.

ತಿಸ್ರೊ ಆರೊಪ್ : ತೊ ಆಪುಣ್‍ಚ್ ದೆವಾಚೊ ಪೂತ್ ಮ್ಹಣ್ ಮ್ಹಣ್ತಾ! ಪ್ರಧಾನ್ ಯಾಜಕಾಂನಿ, ಶಾಸ್ತ್ರ್ಯಾಂನಿ ಜೆಜುಕ್ ವಿಚಾರ್ಲೆಂ ತುಂ ಕ್ರಿಸ್ತ್ ವ್ಹಯ್ ಜಾಲ್ಯಾರ್ ಆಮ್ಕಾಂ ಸಾಂಗ್ (ಲೂಕ್ 22:66) ತರ್ ತುಂ ದೆವಾಚೊ ಪೂತ್? ಜೆಜುನ್ ತಾಂಕಾಂ ಜಾಪ್ ದಿಲಿ: “ಹಾಂವ್ ಮ್ಹಣ್ ತುಮಿಚ್ ಸಾಂಗ್ಲೆಂ”. ತೆ ಮ್ಹಣಾಲೆ ಆನಿಕ್ ಸಾಕ್ಷ್ಯಾಂಚಿ ಆಮ್ಕಾಂ ಗರ್ಜ್ ಕಿತೆಂ? ಆಮಿಂಚ್ ತಾಚ್ಯಾ ತೊಂಡಾಂತ್ಲೆಂ ಆಯ್ಕಲೆಂ ನ್ಹಯ್? ಜೆಜುನ್ ತಾಕಾಚ್ ಆಪುಣ್‍ಚ್ ದೆವಾಚೊ ಪೂತ್ ಮ್ಹಣ್ ಮ್ಹಳ್ಳೆಂ ನಾ. ಕೊಡ್ತಿನ್ ತುಂ ದೆವಾಚೊ ಪೂತ್ ಮ್ಹಣ್ ರುಜು ಕರ್ ಮ್ಹಣ್ ವಿಚಾರುಂಕ್ ನಾ. ಪೂಣ್ ತಾಣಿಂ ಜೆಜು ತಶೆಂ ಮ್ಹಣ್ತಾ ಮ್ಹಣ್ ಚಿಂತ್ಲೆಂ. ತಾಚ್ಯೆ ಪರ್ಗಟ್ ಜಿಣಿಯೆಚ್ಯಾ ವೆಳಾರ್ ಧಾರ್ಮಿಕ್ ಮುಖೆಲಿ ತವಳ್ ತವಳ್ ಜೆಜು ಕಡೆ ತುಂ ಕೊಣ್ ಮ್ಹಣ್ ವಿಚಾರ್ತಾಲೆ. ಥೊಡ್ಯಾ ಮ್ಹಯ್ನ್ಯಾಂ ಪಯ್ಲೆಂ ತಾಣಿಂ ತಾಚ್ಯೆ ಕಡೆ ವಿಚಾರ್‍ಲ್ಲೆಂ: “ಕೆದೊಳ್ ಪರ್ಯಾಂತ್ ತುಂ ಆಮ್ಕಾಂ ಅಶೆಂಚ್ ದುಬಾವಾರ್ ದವರ್ತಾಯ್? ತುಂ ಕ್ರಿಸ್ತ್ ನ್ಹಯ್ ಜಾಲ್ಯಾರ್ ಆಮ್ಕಾಂ ಸ್ಪಷ್ಟ್ ಸಾಂಗುನ್ ಸೊಡ್. ಜೆಜುನ್ ತಾಂಕಾಂ ಜಾಪ್ ದಿಲಿ: “ಹಾಂವೆಂ ಹಾಚ್ಯೆ ಆದಿಂಚ್ ತುಮ್ಕಾಂ ಸಾಂಗ್ಲಾಂ, ಪೂಣ್ ತುಮಿ ಸತ್ಮಾನಿನಾಂತ್”. (ಜುವಾಂವ್ 10:24)

ಚವ್ತೊ ಆರೊಪ್ : ಹಾಣಿಂ ಆಮ್ಚ್ಯೆ ಪರ್ಜೆಕ್ ಉಪ್ರಾಟಯ್ತಾನಾ, ಶೆಜಾರ್ ಚಕ್ರವರ್ತಿ ಖಂಡಣಿ ದಿಂವ್ಕ್ ಆಡಾಯ್ತಾನಾ ಆಪುಣ್ ಕ್ರಿಸ್ತ್ ರಾಯ್ ಮ್ಹಣ್ತಾನಾ ಆಮಿ ತಾಕಾ ಧರ್ಲಾ. ಪಿಲಾತಾನ್ ಜೆಜುಕ್ ವಿಚಾರ್ಲೆಂ: “ತುಂ ಜುದೆವಾಂಚೊ ರಾಯ್?” ಜೆಜುನ್ ಜಾಪ್ ದಿಲಿ ತೆಂ ತುಂಚ್ ಸಾಂಗ್ತಾಯ್. ಉಪ್ರಾಂತ್ ಪಿಲಾತ್ ಲೊಕಾಂಕ್ ಮ್ಹಣಾಲೊ “ಮ್ಹಾಕಾ ಹ್ಯಾ ಮನ್ಶಾ ಥಂಯ್ ಕಸಲೊಚ್ ಗುನ್ಯಾಂವ್ ಮೆಳನಾ”. (ಲೂಕ್ 23:1-4)

ಪಾಂಚ್ವೊ ಆರೊಪ್ : ಆಪ್ಲೆಂ ಶಿಕೊವ್ಣೆನ್ ಜುದೆಯಾಚ್ಯಾ ಸಗ್ಳ್ಯಾ ಲೊಕಾಕ್ ತೊ ಉಚಾಂಬಳ್ ಕರ್ತಾ. ಗಾಲೆಲಿಯಾ ಥಾವ್ನ್ ಸುರು ಕರ್ನ್ ಹಾಂಗಾಂ ಪರ್ಯಾಂತ್ ತಾಚಿ ಸಳಾವಳ್ ಪಾವ್ಲ್ಯಾ. (ಲೂಕ್ 23:5) ಗಾಲೆಲಿಯಾ ಮ್ಹಣ್ ಕಳ್ಳಲೆಂಚ್ ತಾಕಾ ಹೆರೊದಿ ಸರ್ಶಿಂ ವ್ಹರ್ತಾತ್. ಥಂಯ್ಸರ್ ಪ್ರಧಾನ್ ಯಾಜಕ್ ಆನಿ ಶಾಸ್ತ್ರಿ ಮುಕಾರ್ ಯೆವ್ನ್ ಕಠಿಣಾಯೆನ್ ತಾಚೆರ್ ಗುನ್ಯಾಂವ್ ಮಾಂಡ್ತಾಲೆ. (23:10) ಪೂಣ್ ಹೆರೊದಿಕ್ ತಾಚೆರ್ ಕಸಲೊಚ್ ಗುನ್ಯಾಂವ್ ಮೆಳ್ಳೊನಾ (ಲೂಕ್ 23:15)

ಸವೊ ಆರೊಪ್ : “ಪಳೆಯಾ ತಾಣೆಂ ಕೆಲ್ಲಿ ದೇವ್‍ನಿಂದಾ ತುಮಿಚ್ ಆಯ್ಕಲಿ, ಆತಾಂ ತುಮ್ಚಿ ಅಭಿಪ್ರಾಯ್ ಕಿತೆಂ? ತಾಣಿಂ ಸಕ್ಡಾಂನಿ ತಾಕಾ ಮರಣ್ ಫಾವೊ ಮ್ಹಣುನ್ ತೀರ್ಪ್ ದಿಲೆಂ” (ಮಾರ್ಕ್ 14:64) ಹೊ ಆರೊಪ್ ಶ್ರೇಷ್ಟ್ ಯಾಜಕಾಚೊ. ಹ್ಯಾ ಆರೊಪಾ ವಿಶಿಂ ಕೊಣೆಯ್ ಪರಿಶೀಲನ್ ಕೆಲೆಂ ನಾ. ಜೆಜುಚಿಂಚ್ ಉತ್ರಾಂ ಆಯ್ಕುನ್ ತೊ ದೇವ್‍ನಿಂದಾ ಉಲಯ್ತಾ ಮ್ಹಳೆಂ, ಶಿವಾಯ್ ತಿಂ ಉತ್ರಾಂ ತೊ ಕಿತ್ಯಾಕ್ ಉಲಯ್ತಾ ತಾಚೊ ಆರ್ಥ್ ಕಿತೆಂ ಮ್ಹಳ್ಳೆಂ ತನ್ಖಿ ಜಾಲಿ ನಾ. ಫಾವೊತೆ ವಿಚಾರ್ ಕರಿನಾಸ್ತಾ, ತಕ್ಷಣ್ ಎಕಾಚ್ ಫರಾ ಆನಿ ಲೊಕಾ ಜಮ್ಯಾ ಉದ್ವೆಗಾನ್ ಆನಿ mob mentalit ಲಾಗುನ್ ತಾಕಾ ಮರಣ್ ಮ್ಹಣ್ ತೀರ್ಪ್ ದಿಂವ್ಕ್ ಲಾಗ್ಲೆ. ರಾಬ್ಬನಿಕ್ ಕಾನುನ್ ಸಾಂಗ್ತಾಕಿ ಮರಣ್ ಶಿಕ್ಷಾ ದಿಂವ್ಚ್ಯಾಕ್ ಉಣೆಂ ತರಿ ಏಕ್ ದೀಸ್ ಪುಣಿ ತನ್ಖಿ ಕರಿಜೆ.

ಆರೊಪಾ ವಯ್ರ್ ಆರೊಪ್ ಹಾಡ್ಲೆ ಪೂಣ್ ಖಂಯ್ಚ್ಯೆಯ್ ಆರೊಪ್ ರುಜು ಕರುಂಕ್ ಜಾಲೆಂ ನಾ. ವಾಂಜೆಲಿಸ್ತ್ ಮಾರ್ಕ್ ಬರಯ್ತಾ, ತವಳ್ ಪ್ರಧಾನ್ ಯಾಜಕ್ ಆನಿ ಸಗ್ಳಿ ಸಾನೆದ್ರಿನ್ ಸಭಾ ಜೆಜುಕ್ ಮರ್ಣಾಚೆಂ ಫರ್ಮಾಣ್ ದಿಂವ್ಚ್ಯೆ ಖಾತಿರ್ ಖಂಯ್ಚಿಯ್ ಏಕ್ ಸಾಕ್ಸ್ ಮೆಳತ್‍ಗಾಯ್ ಮ್ಹಣ್ ಸೊದ್ತಾಲಿ. ಪೂಣ್ ಏಕ್‍ಯಿ ತಾಂಕಾಂ ಮೆಳ್ಳಿ ನಾ. ಸಬಾರ್ ಜಣ್ ಮುಕಾರ್ ಯೆವ್ನ್ ತಾಚ್ಯೆ ವಿರೊಧ್ ಫಟ್ ಸಾಕ್ಸ್ ಸಾಂಗಿಲಾಗ್ಲೆ. ಪೂಣ್ ತಾಂಚ್ಯೆ ಸಾಕ್ಷಿಂಕ್ ಎಕಾಮೆಕಾ ತಾಳ್ ಪಡ್ಲೆಂ ನಾ (ಮಾರ್ಕ್ 14:55-56).

ಜೆಜುಚಿ ಸಗ್ಳಿ ತನ್ಖಿ ಏಕ್ ಕಡೆ ಥಾವ್ನ್ ಸುರು ಜಾವ್ನ್ ಖಂಯ್‍ಗಿ ಪಾವ್‍ಲ್ಲಿ. ತನ್ಖಿ ವಿಷಯ್ ಸ್ಪಷ್ಟ್ ನಾಸ್ತಾನಾ, ಆಂಬ್ಯಾ ಥಾವ್ನ್ ಕುಂಬ್ಯಾಕ್ ಉಡ್ಲಲ್ಯೆ ಪರಿಂ ದಿಸ್ತಾ. ಎಕ್ಲ್ಯಾಕಿ ಜೆಜುಚೆರ್ ಅಪ್ರಾಧ್ ಮಾಂಡುಂಕ್ ಜಾಂವ್ಕ್ ನಾ. ದೊಗಾ ಸಾಕ್ಷಿ ಮುಕಾರ್ ಆರೊಪ್ ಖಂಯ್ಚೊಯ್ ರುಜು ಜಾಲೊ ನಾ, ತರಿ ಜೆಜುಕ್ ಮರ್ಣಾಚೆಂ ಫರ್ಮಾಣ್?