Articles / Special

Article published in Raknno, February 19 - 25, 2021

ಪ್ರಾಚಿತ್ ಕಾಳಾಕ್ ಚಿಂತಪ್ - 3

ಜೆಜುಚೊ ವಿಚಾರ್ ರಾತಿಚೊ ಜಾಲ್ಲೊ? ಕಿತ್ಲೊ ಸಾರ್ಕೊ?

ಅಪ್ರಾಧ್, ರಾತಿಚೆಂ ಇತ್ಯರ್ಥ್ ಕರ್ಚೆಂ ಆಡ್ವಾರ್ಲಾಂ:

ಮೊಸೆಸ್ ಬಿನ್ ಮೈಮಾನ್ ಹಾಕಾ ಮೈಮಾನೈಡ್ಲಿಸ್ ಮ್ಹಣುನ್ ಆಪಯ್ತಾತ್. ಹೊ ಎಕ್ಲೊ ಜುದೆವ್ ತತ್ವ್‍ಶಾಸ್ತ್ರಿ 1138-7204 ಕಾಳಾರ್ ಜಿಯೆಲ್ಲೊ. ತಾಚ್ಯಾ ಬರ್ಪಾಂನಿ ಏಕ್ ವಿಶೇಸ್ ಮಹತ್ವಾಚೊ ವಿಷಯ್, ತಾಣೆಂ ಸಂಸಾರಾಕ್ ಕಳಿತ್ ಕೆಲಾ. ತೊ “ಖಂಯ್ಚ್ಯಾಯ್ ಎಕಾ ಮನ್ಶಾನ್ ಅಪ್ರಾಧ್ ಕೆಲಾ ತರ್ ತಾಚೊ ಅಪ್ರಾಧ್ ರಾತಿಚೆಂ ಇತ್ಯರ್ಥ್ ಕರುಂಕ್ ಆಡ್ವಾರ್ಲಾಂ” ಮ್ಹಣ್ ತವಳ್ಚ್ಯಾ ಕಾನುನ್ ಶಾಸ್ತ್ರಾಂತ್ ಬರೊವ್ನ್ ಘಾಲಾಂ ಮ್ಹಣ್ ಬರಯ್ತಾ. ಎಕಾ ಕಾಳಾರ್ ರಾತಿಚೆಂ ಜಿವಾಕ್ ಘಾಯ್ ಕರ್ಚ್ಯೆ ತಸಲೆಂ ಅಪರೇಷನ್ ಕರುಂಕ್ ಆಡ್ವಾರ್ಲಲ್ಯೆ ಬರಿಂ ಮನ್ಶಾ ಜಿವಿತಾಕ್ ಬದ್ಲಾಮ್ ಘಾಲ್ಚ್ಯೆ ತಸಲೆ ಖಂಯ್ಚ್ಯೆಯ್ ವಿಚಾರ್ ರಾತಿಂ ಕರುಂಕ್ ನಜೊ ಮ್ಹಳ್ಳೊ ತಾಚೊ ವಾದ್.

ಮೊಸೆಸ್ ಬಿನ್ ಮೈಮಾನ್, ಹ್ಯಾ ಜುದೆವ್ ಶಾಸ್ತ್ರಿನ್ ತಾಚ್ಯಾ ಬರ್ಪಾಂನಿ, ಜೆಜುಕ್ ಧರ್‍ಲ್ಲೊ ರಾತಿಚೆಂ, ಉಪ್ರಾಂತ್ ತಾಚೊ ವಿಚಾರ್ ಕೆಲ್ಲೊ ರಾತಿಂಚ್ ಮ್ಹಣ್ ಬರಯ್ತಾ. ರಾಷ್ಟ್ರಂತ್ ಏಕ್ ಕಾನುನ್ ಜಾರಿ-ಚಾಲು ಆಸ್ತಾನಾ, ತ್ಯಾ ಕಾನುನಾ ವಿರೊಧ್ ಜೆಜುಕ್ ಕಯ್ದ್ ಕರುನ್, ಉಪ್ರಾಂತ್ ತಾಕಾ ಅನ್ನಾಸಾ, ಕೈಫಾಸಾ ಘರ್, ಪಿಲಾತಾ ಆನಿ ಹೆರೊದಿಚ್ಯಾ ರಾವ್ಳೆರಾಂತ್ ಉಪ್ರಾಂತ್ ಸಾನೆದ್ರಿನ್ ಸಭೆಂತ್ ವಿಚಾರ್ ಕೆಲಲೊ ಪಳೆತಾನಾ, ಹಾಂತುಂ ಕಿತೆಂ ಪುಣಿ ವ್ಹಡ್ ಏಕ್ ಫಿತುರಿ ಆಸ್ಲಲ್ಯೆ ಬರಿಂ ದಿಸ್ತಾ? ಹ್ಯೆ ವಿಶಿಂ ಪವಿತ್ರ್ ಪುಸ್ತಕಾಚ್ಯಾ ದಾಖ್ಲ್ಯಾ ಸವೆಂ ಥೊಡಿಂ ಘಡಿತಾಂ ವ್ಹರೊವ್ನ್ ಪಳೆವ್ಯಾಂ.

ತವಳ್ ರಾತ್ ಜಾಲ್ಲಿ:

ಜೆಜು ನಿಮಾಣೆಂ ಜೆವಣ್ ತಾಚ್ಯಾ 12 ಶಿಸಾಂ ಸಾಂಗಾತಾ ಜೆವ್‍ಲ್ಲೊ. ಹೊ ವೇಳ್ ಖಂಯ್ಚೊ? ಮಾತೆವ್ ವಾಂಜೆಲಿಸ್ತ್ ಬರಯ್ತಾ, ‘ಸಾಂಜ್ ಜಾತಾನಾ, ಆಪ್ಲ್ಯಾ ಬಾರಾ ಶಿಸಾಂ ಸಾಂಗಾತಾ ಜೆಜು ಜೆವ್ಣಾಕ್ ಬಸ್ಲೊ’. (ಮಾತೆವ್ 26:20) ಜುವಾಂವ್ ವಾಂಜೆಲಿಸ್ತ್, ಜೆಜುನ್ ತಾಚ್ಯಾ ಶಿಸಾಂಚೆ ಪಾಂಯ್ ಧುಂವ್ಚೆ, ಉಪ್ರಾಂತ್ ಜೆವ್ಣಾ ವಿಶಿಂ ಆನಿ ಸಿಂತಿಮೆಂತಾಚ್ಯೆ ಶಿಕೊವ್ಣೆಚೊ ವಿವರ್ ದಿತಾ. ಹ್ಯಾ ವಿವರಾಂತ್ ಜೆಜುನ್ ಶಿಸಾಂ ಕಡೆ ಸಂಭಾಷಣ್ ಕೆಲ್ಲ್ಯೆ ವಿಶಿಂ ಆನಿ ಜೆವ್ಣಾಚ್ಯೆ ಆಕ್ರೆಕ್ ಜುದಾಸಾ ಲಾಗಿಂ ಉಲೊವ್ನ್ ಮ್ಹಳ್ಳಿಂ ಉತ್ರಾಂ ಅಶಿಂ ಆಸಾತ್. ಜುದಾಸ್ ತುರ್ತಾನ್ ಭಾಯ್ರ್ ಗೆಲ್ಲೊ, ಆನಿ ತೊ ಬರಯ್ತಾ, ‘ತವಳ್ ರಾತ್ ಜಾಲ್ಲಿ’. (ಜುವಾಂವ್ 13:30)

ದಿವೆ ಆನಿ ಚುಡಿ:

• ನಿಮಾಣ್ಯಾ ಜೆವ್ಣಾ ಉಪ್ರಾಂತ್ ಜೆಜು ಗೆತ್ಸೆಮನಿ ಮೊಳ್ಯಾಕ್ ಮಾಗ್ಣೆಂ ಕರುಂಕ್ ಗೆಲೊ. ಮುಕ್ಲ್ಯಾ ವಾಕ್ಯಾಂತ್ ತವಳ್ ರಾತ್ ಮ್ಹಣ್ ಸ್ಪಷ್ಟ್ ಜಾತಾ. ಜುದಾಸ್ ತಿ ಸುವಾತ್ ಜಾಣಾ ಆಸ್‍ಲ್ಲೊ, ದೆಕುನ್ ಜುದಾಸ್ ಆನಿ ಫಾರಿಜೆವಾಂನಿ ದಿಲ್ಲ್ಯಾ ರಾಕ್ವಲ್ಯಾಂಕ್ ಘೆವ್ನ್ ದಿವೆ, ಚುಡಿ ಆನಿ ಹಾತೆರಾಂ ಸವೆಂ ಥಂಯ್ಸರ್ ಆಯ್ಲೊ” (ಜುವಾಂವ್ 18:3). ರಾತ್ ದೆಕುನ್ ದಿವೆ, ಆನಿ ಚುಡಿ ಘೆವ್ನ್ ಜೆಜುಕ್ ಧರುಂಕ್ ಆಯ್ಲಲೆ. ಬೈಬಲಾಚೆ ಶಾಸ್ತ್ರಿ, ಸುಮಾರ್ ಮಧ್ಯಾನೆ ರಾತಿಂ ಬಾರಾ ಥಾವ್ನ್ ಏಕ್ ವರಾ ಭಿತರ್ ತಾಕಾ ಗೆತ್ಸೆಮನಿ ಮೊಳ್ಯಾಂತ್ ಧರ್‍ಲ್ಲೊ ಮ್ಹಳ್ಳೆಂ ಬರಯ್ತಾತ್.
• ಹ್ಯಾ ಉಪ್ರಾಂತ್ ತಾಕಾ ಏಕ್ ಥಾವ್ನ್ ತೀನ್ ವರಾಂ ಭಿತರ್ ಅನ್ನಾಸ್, ಕೈಫಾಸ್, ಶ್ರೇಷ್ಟ್ ಯಾಜಕಾ, ಉಪ್ರಾಂತ್ ಪಿಲಾತಾಚ್ಯಾ ರಾವ್ಳೆರಾಕ್ ಆನಿ ಸಾನೆದ್ರಿನ್ ಸಭೆಕ್ ಮ್ಹಣ್ತಾನಾ ಉಣೆಂ ಮ್ಹಳ್ಯಾರ್ ತೀನ್ ಥಾವ್ನ್ ಚಾರ್ ವರಾಂ ಪುಣಿ ಕಾಡ್ಲ್ಯಾಂತ್ ಮ್ಹಣ್ ಅಂದಾಜ್ ಕರ್ಯೆತ್.

ರಾತ್ ಮ್ಹಣ್ ರುಜು ಕರ್ಚ್ಯಾಕ್ ಆನಿ ಥೊಡೆ ದಾಖ್ಲೆ (ನವ್ಯಾ ಸೊಲ್ಲ್ಯಾಂತ್):

1. ಉಜ್ಯಾ ಉಜ್ವಾಡಾನ್ ಆಗ್ಟ್ಯಾ ಸರ್ಶಿಂ ಬಸುನ್ ಆಸ್ಲಲ್ಯಾ ಪೆದ್ರುಕ್ ಕೊಣ್ ಎಕ್ಲ್ಯೆ ಚಾಕರ್ನಿನ್ ದೆಕ್ಲೊ ಆನಿ ತಾಕಾ ಸಾರ್ಕೊ ಪಳೆವ್ನ್ ತಿ ಮ್ಹಣಾಲಿ “ತುಂ ಜೆಜುಚ್ಯಾ ಶಿಸಾಂ ಪಯ್ಕಿ ಎಕ್ಲೊ ನ್ಹಯ್?” (ಲೂಕ್ 22:56). ಭಾಯ್ರ್ ಆಂಗ್ಣಾಂತ್ ಕಾಳಕ್ (ರಾತ್) ದೆಕುನ್ ಉಜೊ ಘಾಲ್ಲೊ, ಸಾಂಗಾತಾಚ್ ಹಿಂವಾ ಥಾವ್ನ್ ರಕ್ಷಣ್ ಜೊಡುಂಕ್.
2. ಪೂಣ್ ಪೆದ್ರು ಮ್ಹಣಾಲೊ; “ಅಳೆಯಾ, ತುಂ ಕಿತೆಂ ಮ್ಹಣ್ತಾಯ್ ತೆಂ ಮ್ಹಾಕಾ ಸಮ್ಜನಾ.” ಆನಿ ತ್ಯೆಚ್ ಘಡಿಯೆ, ತೊ ಉಲೊವ್ನ್ ಆಸ್ತಾನಾಂಚ್ ಕೊಂಬ್ಯಾನ್ ಸಾದ್ ಘಾಲೊ. (ಲೂಕ್ 22:60) ಹ್ಯಾ ಉತ್ರಾಂನಿ ಜೆಜುಚಿ ತನ್ಖಿ ರಾತಿಚ್ ಜಾಲ್ಲಿ ಮ್ಹಳ್ಳೆಂ ಸ್ಪಷ್ಟ್ ಜಾತಾ.
3. ಉಪ್ರಾಂತ್ ಜೆಜುಕ್ ತೆ ಕೈಫಾಸಾಚ್ಯಾ ಘರಾ ಥಾವ್ನ್ ರಾಜ್ಯಾಧಿಪತಿಚ್ಯಾ ನಿವಾಸಾಕ್ ವ್ಹರ್ನ್ ಗೆಲೆ. ತವಳ್ ಫಾಂತೆಂ ಜಾಲ್ಲೆಂ. ಆತಾಂ ರಾತ್ ವಚುನ್ ಉಜ್ವಾಡ್ತಾ ಮ್ಹಳ್ಳೆಂ ವಾಂಜೆಲಿಸ್ತ್ ಜುವಾಂವ್ ಬರಯ್ತಾ (ಜುವಾಂವ್ 18:28).
4. ದೀಸ್ ಉಜ್ವಾಡ್ತಚ್ ಜುದೆವಾಂಚೆ ಮ್ಹಾತ್ಬಾರಿ, ಪ್ರಧಾನ್ ಯಾಜಕ್ ಆನಿ ಶಾಸ್ತ್ರಿ ಸಾಂಗಾತಾ ಮೆಳ್ಳೆ ಆನಿ ಜೆಜುಕ್ ಆಪ್ಲ್ಯೆ ಸಭೆ ಹುಜಿರ್ ಹಾಡ್ನ್ ಆಯ್ಲೆ (ಲೂಕ್ 22:60) (ಮಾತೆವ್ 27:1). ರಾತ್ ಜಾವ್ನ್ ದೀಸ್ ಉಜ್ವಾಡ್ತಾನಾಚ್ ಮ್ಹಳ್ಳೆಂ ಉತ್ರಾಂನಿ ಸ್ಪಷ್ಟ್ ಜಾತಾ ಜೆಜುಕ್ ರಾತಿಂಚ್ ತನ್ಖೆಕ್ ಉಬೊ ಕೆಲ್ಲೊ’.

ರಾತಿಚ್ಯಾ ವೆಳಾರ್ ಜೆಜುಕ್ ತನ್ಖಿ ಕರುಂಕ್ ಖಂಯ್ಸರ್ ವ್ಹರುನ್ ಗೆಲೆ?

• ಕೆದ್ರೊನ್ ವ್ಹಾಳಾ ಪಲ್ತಡಿ, ಗೆತ್ಸೆಮನಿ ಮೊಳ್ಯಾಂತ್
• ತಾಕಾ ಧರುನ್ ಅನ್ನಾಸ್, ಶ್ರೇಷ್ಟ್ ಯಾಜಕಾಚ್ಯಾ ಆನಿ ಕೈಫಾಸಾಚ್ಯಾ ಘರಾ- ತವಳ್ ವೇಳ್ ಏಕ್ ವರ್?
• ಸಾನೆದ್ರಿನ್ ಸಭಾ (ಲೂಕ್ 22:59) ಕೈಫಾಸಾಚ್ಯಾ ಘರಾಂತ್, ತಾಚ್ಯಾ ರಾವ್ಳೆರಾಂತ್? (ಮಾರ್ಕ್ 14:53)
• ಪಿಲಾತಾಚೊ ವಿಚಾರ್ ತ್ಯಾ ಉಪ್ರಾಂತ್ ಹೆರೊದ್ ಅಂಟಿಫಸಾಚೊ ವಿಚಾರ್
• ಪತ್ರ್ಯಾನ್ ಪಿಲಾತಾಚ್ಯಾ ರಾವ್ಳೆರಾಕ್ (ದೀಸ್ ಉಜ್ವಾಡ್ತಚ್) (ಲೂಕ್ 22:66)
• ಪಿಲಾತಾಚ್ಯಾ ರಾವ್ಳೆರಾಕ್ (ಮಾರ್ಕ್ 15:1) ಉಪ್ರಾಂತ್ ಜೆಜುಕ್ ರೊಮಾಚ್ಯಾ ಶೆಜಾರ್ಯಾಂಚ್ಯೆ ಅಧೀನ್ ಕೆಲೊ.
• ತ್ಯಾ ಉಪ್ರಾಂತ್ ‘ಗೊಲ್ಗೊಥಾ’ಕ್ ಖುರ್ಸಾಕ್ ಖಿಳಾಂವ್ಚ್ಯಾಕ್.

ಫುಡ್ಲ್ಯಾ ವಾಂಟ್ಯಾಂತ್: ಜೆಜುಚಿ ನಿಮಾಣಿ ತನ್ಖಿ ಖಾಸ್ಗಿ ಘರಾಂತ್ ಕೆಲ್ಲಿ ಹೆಂ ಸಾರ್ಕೆಂಗಿ?

- ಬಾ| ಜೆ. ಬಿ ಕ್ರಾಸ್ತಾ