Articles / Special

Article published in Raknno, February 26 - March 4, 2021

ಪ್ರಾಚಿತ್ ಕಾಳಾಕ್ ಚಿಂತಪ್ - 4

ಜೆಜುಚಿ ನಿಮಾಣಿ ತನ್ಖಿ ಖಾಸ್ಗಿ ಘರಾಂತ್ ಕೆಲ್ಲಿ, ಹೆಂ ಸಾರ್ಕೆಂಗಿ?

ಜುದೆವಾಚ್ಯಾ ರಬ್ಬಾನಿಕ್ ಕಾನುನಾ ಪರ್ಮಾಣೆಂ, ಏಕ್ ಕಯ್ದಿಕ್ ಪರಾಧಿನ್ (arrest) ಕರ್ಚ್ಯೆ ಪಯ್ಲೆಂ ತಾಕಾ ತಾಚ್ಯಾ ಚುಕಿಚೊ ವಾ ಅಪ್ರಾಧಾಚೊ ವಿವರ್ ಕಳೊವ್ನ್ ಉಪ್ರಾಂತ್ ಕಯ್ದ್ ಕರ್ಚಿ ರಿವಾಜ್ ಆಸ್‍ಲ್ಲಿ. ಜೆಜುಕ್ ಪರಾಧಿನ್ ಕರುಂಕ್ ಕೆದ್ರೊನ್ ವ್ಹಾಳಾ ಪಲ್ತಡಿ ಗೆತ್ಸೆಮನಿ ಮೊಳ್ಯಾಂತ್ ಜುದಾಸ್, ಶಿಪಾಯಾಂಚಿ ಏಕ್ ತುಕಡಿ ಆನಿ ಪ್ರಧಾನ್ ಯಾಜಕಾಂನಿ ಆನಿ ಫಾರಿಜೆವಾಂನಿ ಧಾಡುನ್ ದಿಲ್ಲೆ ರಾಕ್ವಲಿ ಆಯ್ಲಲೆ. ಹೊ ವಿಷಯ್ ಜೆಜುಕ್ ಕಳಿತ್ ನಾತ್‍ಲ್ಲೊ. ದೆಕುನ್ ಜೆಜು ಆಯ್ಲಲ್ಯಾಂಕ್ ವಿಚಾರ್ತಾ “ತುಮಿ ಕೊಣಾಕ್ ಸೊದ್ತಾತ್?” (ಜುವಾಂವ್ 18:4). ಜುದಾಸಾಕ್ ಪಳೆವ್ನ್ ಜೆಜುನ್ ಮ್ಹಳೆಂ “ಜುದಾಸಾ, ಉಮೊ ಘೆವ್ನ್ ಮನ್ಶಾಪುತಾಕ್ ತುಂ ಪರಾಧಿನ್ ಕರ್ತಾಯ್‍ಮೂ?” (ಲೂಕ್ 22:48). ಹಾಂತುಂ ಕಳಿತ್ ಜಾತಾ ಜೆಜುಕ್ ಪರಾಧಿನ್ ಕರ್ಚ್ಯೆ ವಿಶಿಂ ಕಳಿತ್ ನಾತ್‍ಲ್ಲೆಂ. ಕಯ್ದಿಚೊ ಅಪ್ರಾಧ್ ಸಾನೆದ್ರಿನ್ ಸಭೆಂತ್ ದೋಗ್ ಸಾಕ್ಷಿ ಮುಕಾರ್ ರುಜು ಜಾವ್ನ್ ಅಪ್ರಾಧಿ ಮ್ಹಳ್ಳೆಂ ಫೈಸಲ್ ದಿಂವ್ಚಿ ರಿವಾಜ್. ಜೆಜುಚ್ಯಾ ವಾಂಟ್ಯಾಕ್ ತಾಕಾ ಮೊಳ್ಯಾಂತ್ ಧರ್ಲೊ ಆನಿ ತಾಚಿ ತನ್ಖಿ ಕರುಂಕ್ ಖಾಸ್ಗಿ ಮನ್ಶಾಚ್ಯಾ ಘರಾ ಆನಿ ರಾವ್ಳೆರಾಕ್ ವ್ಹೆಲೊ.

ಜೆಜುಚಿ ತನ್ಖಿ ಖಾಸ್ಗಿ ಘರಾಂತ್, ರಾವ್ಳೆರಾಂತ್:

• “ತವಳ್ ಸೈನಿಕಾಂನಿ ಸೇನಾಧಿಪತಿನ್ ಆನಿ ಜುದೆವಾಂನಿ ಧಾಡ್ಲಲ್ಯಾ ರಾಕ್ವಲ್ಯಾಂನಿ ಜೆಜುಕ್ ಧರ್ಲೊ ಆನಿ ಬಾಂದ್ಲೊ. ಪಯ್ಲೆಂ ತಾಕಾ ಅನ್ನಾಸಾ ಸರ್ಶಿಂ ವ್ಹೆಲೊ. ಅನ್ನಾಸ್ ತ್ಯಾ ವರ್ಸಾಚೊ ಶ್ರೇಷ್ಟ್ ಯಾಜಕ್ ಜಾವ್ನ್ ಆಸ್ಲಲ್ಯಾ ಕೈಫಾಸಾಚೊ ಮಾಂವ್. (ಜುವಾಂವ್ 18:12) ಶ್ರೇಷ್ಟ್ ಯಾಜಕಾನ್ ಜೆಜುಚ್ಯಾ ಶಿಸಾಂ ವಿಶಿಂ ಆನಿ ತಾಚ್ಯೆ ಶಿಕೊವ್ಣೆ ವಿಶಿಂ ವಿಚಾರ್ ಕೆಲೊ. (ಜುವಾಂವ್ 18:19-24) ಅಶೆಂ ರಾತಿಚೆಂ ಗರ್ಜೆ ವಿಣೆಂ ವಯುಕ್ತಿಕ್ ಘರಾಂನಿ ಜೆಜುಚೊ ವಿಚಾರ್ ಕೆಲೊ.
• ಅಶೆಂ ಪಿಲಾತಾನ್ ನಿತಿಯಾಸಣಾರ್ ಬಸುನ್ ಆಸ್ತಾನಾ, ತಾಚ್ಯೆ ಪತಿಣೆನ್ ತಾಕಾ ಜಾಗೃಣ್ ಧಾಡ್ಲೆಂ: ತುಂ ನಿರಾಪ್ರಾಧಿ ಮನ್ಶಾಚ್ಯಾ ರಗ್ಳ್ಯಾಂಕ್ ವಚನಾಕಾ. ತಾಚ್ಯೆ ನಿಮ್ತಿಂ ಗೆಲೆತ್ಯೆ ರಾತಿಂ ಹಾಂವೆಂ ಸಪ್ಣಾಂತ್ ಜಾಯ್ತೆಂ ಸೊಸ್ಲಾಂ. (ಮಾತೆವ್ 27:19) ಖಾಸ್ಗಿ ಘರಾಂತ್ ತಾಚಿ ಪತಿಣ್ ತ್ಯಾ ವೆಳಾರ್ ರಾವ್ಳೆರಾಂತ್ ಆಸ್‍ಲ್ಲಿ ಮ್ಹಳ್ಳ್ಯಾ ದಾಖ್ಲ್ಯಾ ಸವೆಂ, ಜೆಜುಚಿ ತನ್ಖಿ ಖಾಸ್ಗಿ ಘರಾಂತ್ ಜಾಲ್ಲ್ಯಾಕ್ ದುಸ್ರಿ ಸಾಕ್ಸ್ ಗರ್ಜ್ ನಾ!
• “ಉಪ್ರಾಂತ್ ಜೆಜುಕ್ ತೆ ಕೈಫಾಸಾಚ್ಯಾ ಘರಾ ಥಾವ್ನ್ ರಾಜ್ಯಾಧಿಪತಿಚ್ಯಾ ನಿವಾಸಾಕ್ ವ್ಹರ್ನ್ ಗೆಲೆ. ಭಷ್ಟ್ ಜಾವ್ನ್ ಪಾಸ್ಕಾಂಚೆಂ ಜೆವಣ್ ಜೆಂವ್ಕ್ ಹರ್ಕತ್ ಜಾಯ್ತ್ ಮ್ಹಣ್ ಚಿಂತುನ್ ರಾವ್ಳೆರಾಂತ್ ತೆ ಭಿತರ್ ಸರ್ಲೆನಾಂತ್.” (ಜುವಾಂವ್ 18:28)
• ಮುಕ್ಲಿ ತನ್ಖಿ ರಾತಿಚ್ಯಾ ವೆಳಾರ್‍ಚ್ ಪಿಲಾತಾಚ್ಯಾ ರಾವ್ಳೆರಾಂತ್ ಜಾಲಿ. ಜೆಜು ಏಕ್ ಗಾಲೆಲಿಯಾಗಾರ್ ಮ್ಹಣ್ ಕಳ್‍ಲ್ಲೆಂಚ್ ಪಿಲಾತಾನ್ ತಾಚಿ ತನ್ಖಿ ಕರುಂಕ್ ಹೆರೊದ್ ರಾಯಾ ಸರ್ಶಿಂ ಧಾಡ್ಲೊ. ತವಳ್ ಹೆರೊದ್ ರಾಯ್ ಜೆರುಜಲೆಮಾಂತ್‍ಚ್ ಆಸ್‍ಲ್ಲೊ (ಲೂಕ್ 23:7).
• ಹೆರೊದಿಯಾಚ್ಯೆ ತನ್ಖೆ ವೆಳಾರ್ “ಹೆರೊದಿನ್, ರಾಯಾನ್ ಜೆಜುಕ್ ಸಬಾರ್ ಥರಾಂಚಿಂ ಸವಾಲಾಂ ಕೆಲಿಂ. ಪ್ರಧಾನ್ ಯಾಜಕ್ ಆನಿ ಶಾಸ್ತ್ರಿ ಮುಕಾರ್ ಯೆವ್ನ್ ಕಠಿಣಾಯೆನ್ ತಾಚೆರ್ ಗುನ್ಯಾಂವ್ ಮಾಂಡ್ತಾಲೆ” (ಲೂಕ್ 23:9-10). ಹ್ಯಾ ಏಕ್‍ಯಿ ಸವಾಲಾಕ್ ಜೆಜುನ್ ಜಾಪ್ ದಿಂವ್ಕ್ ನಾ. ಉಪ್ರಾಂತ್ ಹೆರೊದ್ ರಾಯ್ ಜೆಜುಕ್ ಪತ್ರ್ಯಾನ್ ಪಿಲಾತಾ ಸರ್ಶಿನ್ ಧಾಡ್ತಾ. ತವಳ್ ಫಾಂತೆಂ ಜಾಲ್ಲೆಂ.
• ಜೆಜುಚಿ ತನ್ಖಿ ವಯುಕ್ತಿಕ್ ಘರಾಂತ್ ಆನಿ ರಾವ್ಳೆರಾಂತ್ ಜಾಲ್ಲಿ (ಲೂಕ್ 22:54). ಕಾನುನಾ ಪ್ರಕಾರ್ ನಮ್ಯಾರ್ಲಲ್ಯಾ ಜಾಗ್ಯಾರ್, ಸಾನೆದ್ರಿನ್ ಸಭೆಂತ್ ಮಾತ್ರ್ ಅಪ್ರಾಧ್ಯಾಂಚಿ ತನ್ಖಿ ಜಾಂವ್ಕ್ ಜಾಯ್ ಆಸ್‍ಲ್ಲಿ. ಜೆಜುಕ್ ಹೊ ನ್ಯಾಯ್ ಲಾಬ್ಲೊ ನಾ. ವಾಂಜೆಲಿಸ್ತ್ ಸಾಂಗ್ತಾ ಪೆದ್ರುನ್ ನೆಗಾರ್ ಕರ್ತಾನಾ ಕೊಂಬ್ಯಾನ್ ಸಾದ್ ಘಾಲೊ (ಜುವಾಂವ್ 18:27) ಆನಿ ಕೈಫಾಸಾಚ್ಯಾ ಘರಾ ಥಾವ್ನ್ ರಾಜ್ಯಾಧಿಪತಿಚ್ಯಾ ನಿವಾಸಾಕ್ ವ್ಹರ್ನ್ ಗೆಲೆ. ತವಳ್ ‘ಫಾಂತೆಂ ಜಾಲ್ಲೆಂ’. (ಜುವಾಂವ್ 18:28) ಸಗ್ಳ್ಯೆ ರಾತಿ ಜೆಜುಚಿ ತನ್ಖಿ, ಜೆಜುಚೊ ವಿಚಾರ್ ಜಾಲೊ ಮ್ಹಳ್ಳೆಂ ವಾಂಜೆಲಿಸ್ತ್ ದಾಖ್ಲೆ ದಿತಾತ್.
• ಜುದೆವ್ ಕಯ್ದಿಂಚೊ ವಿಚಾರ್ ಕರುಂಕ್ ಸಾನೆದ್ರಿನ್ ಸಭಾ ಪ್ರಮುಖ್ ಪಾತ್ರ್ ಘೆತಾ. ಸಾನೆದ್ರಿನ್ ಸಭೆಚಿ, ನೀತ್ ಕರ್ತಾನಾ ತಾಚ್ಯೊಚ್ ಕಾನುನ್-ರೆಗ್ರೊ ಆಸ್‍ಲ್ಲ್ಯೊ. ಹಾಂಚ್ಯೆ ಪಯ್ಕಿ ಸರ್ವ್ ಸಾಂದ್ಯಾಂನಿ ಮಾತ್ರ್, ನ್ಯಾಯ್ ಸಾಲಾಂತ್ ಹಾಜರ್ ಜಾಂವ್ಕ್ ಜಾಯ್ ಆಸ್‍ಲ್ಲೆಂ. ವಾಂಜೆಲಿಸ್ತ್ ಮಾರ್ಕ್ ಬರಯ್ತಾ, ಪಿಲಾತಾಚ್ಯಾ ತನ್ಖೆ ವೆಳಾರ್ ಪ್ರಧಾನ್ ಯಾಜಕಾಂನಿ ಲೊಕಾಕ್ ಶಿಕೊವ್ನ್ ದಿವ್ನ್ ಚಾಳ್ವಯಿಲ್ಲೆಂ. “ತಾಕಾ ಖುರ್ಸಾರ್ ಮಾರ್” ಮ್ಹಣುನ್ ಲೊಕಾನ್ ಬೊಬಾಟ್ ಮಾರ್ಲಿ. ತವಳ್ ಪಿಲಾತ್ ತಾಂಚ್ಯೆ ಲಾಗಿಂ ಮ್ಹಣಾಲೊ, “ಕಿತ್ಯಾಕ್? ಕಿತೆಂ ಚೂಕ್ ತಾಣೆಂ ಕೆಲ್ಯಾ?” ಪೂಣ್ ಆನಿಕ್‍ಯಿ ವ್ಹಡ್ಲ್ಯಾ ತಾಳ್ಯಾನ್ ಉಪ್ರಾಟ್ಯೊ ಬೊಬೊ ಮಾರ್ನ್ ಮ್ಹಣಾಲೆ, “ತಾಕಾ ಖುರ್ಸಾರ್ ಮಾರ್!” ಪಿಲಾತಾಚ್ಯೆ ಸಾನೆದ್ರಿನ್ ಸಭೆಂತ್, ಲೊಕಾಂಕ್ ಯೆಂವ್ಕ್ ನಾ, ಉಪ್ರಾಟ್ಯೊ ಬೊಬೊ ಮಾರುಂಕ್ ನಾಂತ್, ಅಶೆಂ ಸ್ಪಷ್ಟ್ ಜಾತಾಗಿ ಜೆಜುಚಿ ತನ್ಖಿ ಖಾಸ್ಗಿ ಘರಾಂತ್‍ಚ್ ಜಾಲ್ಲಿ!

ಸಾನೆದ್ರಿನ್ ಸಭೆಂತ್ ಗಲಾಟೊ:

ನ್ಯಾಯ್ ತೀರ್ಮಾನ್ ದಿತಾನಾ ಸಾನೆದ್ರಿನ್ ಸಭೆಂತ್ ಸಂಪೂರ್ಣ್ ನಿಶಬ್ಧ್ ಆಸುಂಕ್ ಜಾಯ್ ಮ್ಹಣ್ ಸಾನೆದ್ರಿನ್ ಸಭೆಂತ್ ರೆಗ್ರ್ ಆಸಾ. ಪಿಲಾತಾನ್ ತಿಸ್ರ್ಯೆ ಪಾವ್ಟಿಂ ಜೆಜುಕ್ ನಿರಾಪ್ರಾಧಿ ಮ್ಹಣ್ ಪರ್ಗಟುಂಕ್ ಪ್ರಯತ್ನ್ ಕೆಲ್ಲೆಂ ನಾ. ವಾಂಜೆಲಿಸ್ತ್ ಬರಯ್ತಾ “ಪೂಣ್ ತೆ ಆನಿಕ್‍ಯಿ ತಾಳೊ ಪಿಂಜುನ್ ತಾಕಾ ಖುರ್ಸಾರ್ ಮಾರಿಜೆ ಮ್ಹಣ್ ಉಪ್ರಾಟ್ಯೊ ಬೊಬೊ ಘಾಲುಂಕ್ ಲಾಗ್ಲೆ ಆನಿ ಕ್ರಮೇಣ್ ತಾಂಚೆಂ ಹಠ್ ಜಿಕ್ಲೆಂ (ಲೂಕ್ 23:23).

ಆತಾಂ ಆಮಿ ವಿಚಾರಿಜೆ ಆಸ್ಲಿಂ ಸವಾಲಾಂ:

1. ಜೆಜುಕ್ ಧರ್ಣಿರ್ ಕಾಳಕ್ ಪಡ್ಲಲ್ಯಾ ಉಪ್ರಾಂತ್, ಕಾನುನಾ ಭಾಯ್ರ್ ಕಸೊ ಕಯ್ದ್ ಕೆಲೊ?
2. ರಾತಿಚೆಂ ಕಯ್ದ್ ಕರುನ್, ರಾತಿಚ್ ತಾಚೊ ವಿಚಾರ್ ಕರ್ಚೊ ತೆದೊ ವ್ಹಡ್ ಕಸಲೊ ಅಪ್ರಾಧ್ ಆಸ್‍ಲ್ಲೊ?
3. ಕಾನುನಾ ಭಾಯ್ರ್ ಕಾನುನ್ ಮಿಕ್ವುನ್ ಸಂಗ್ತಿ ಘಡ್ತಾನಾ ವಿರೊಧ್‍ಪಣ್ ದಾಕಯ್ತಾಲೊ ಕೊಣಿ ನಾತ್‍ಲ್ಲೊ?
4. ರಾತಿಚೆಂ ಇತ್ಲ್ಯಾ ಆಮ್ಸೊರಾನ್ ಜೆಜುಕ್ ಕೈದ್ ಕರುನ್ ಶಿಕ್ಷಾ ದಿಂವ್ಚಿ ತಿತ್ಲಿ ಗರ್ಜ್ ಕಿತ್ಯಾಕ್ ಆಸ್‍ಲ್ಲಿ?

- ಬಾ| ಜೆ. ಬಿ ಕ್ರಾಸ್ತಾ